Profeta yej ito̱ka̱ꞌ Ezequiel
Ezequiel 1:1‑3; 2:6‑7; 7:23‑27; 33:7‑11; 36:16‑36
104
Onoya se̱ sacerdote yej ito̱ka̱ꞌ Ezequiel yej cha̱ntitoya ipan país yej ito̱ka̱ꞌ Judá. Dios kitapejpen Ezequiel iga mamochi̱wa iprofe̱taj. Kua̱ꞌ Nabucodonosor asiꞌ Judá, kiwi̱gaꞌ preso miaꞌ israeli̱tajmej, Ezequiel no̱ kiwi̱gakej Babilonia. Ompa Dios kine̱xtilij yej yawi mochi̱wati, kijlij:—Amo ximajmawi siga mitzajajwaj o mitzijiyaj iga tej tia tikijli̱ti yej nia nimitzijli̱ti; malej iga ayá̱ꞌ mitzkakisnekij, iga ino̱mej ayá̱ꞌ mote̱makaj iga kichi̱waj ken nej nikneki.
Ijkó̱n iga Ezequiel kijlij israeli̱tajmej ompa kua̱ꞌ onoyaj Babilonia, iga Jerusalén yawij kixi̱xiti̱natij iga israeli̱tajmej kikajtéjkeja Dios iwá̱n kiweyimati̱ltiaja i̱dolojmej. Ezequiel kijtoj no̱ kensan kijtójkeja sekin profe̱tajmej iga Dios yawi kikno̱chi̱wati ino̱mej yej kikuejkuesowaj israeli̱tajmej. Dios kijtoj iga kichi̱was iní̱n iga nochi yej onoꞌ ipan iní̱n ta̱jli makimati iga yéj Dios iwá̱n ateyi seꞌ.
Seꞌ día Dios kijlij Ezequiel:
—Nia nimitzijli̱ti yej tia tikijli̱ti moge̱ntej. Xikijli iga nia nikikno̱chi̱watij siga ayá̱ꞌ moyo̱lpataj iwá̱n siga akikajte̱waj iga kiweyimatij i̱dolojmej iwá̱n iga kichijtókejoꞌ má̱j yej aye̱kti. Iga nej ijkí̱n nikijliá yej kichi̱waj yej aye̱kti: “Tej yej tikchi̱wa yej aye̱kti, tia timikiti.”
Dios kino̱no̱tzaꞌ Ezequiel:
—Siga tej Ezequiel ayá̱ꞌ tikijliá la gente iga nia nikikno̱chi̱watij iga kichi̱waj yej aye̱kti, iwá̱n yejemej akikajte̱waj iga kichi̱waj yej aye̱kti, yejemej yawij mikitij iga ijkó̱n kichijtokej, iwá̱n tej no̱ motechko iga yawij mikitij. Eꞌ siga tikijliá iga nia nikikno̱chi̱watij, siga ayá̱ꞌ kikajte̱waj iga kichi̱waj yej aye̱kti iwá̱n yejemej ayá̱ꞌ mitztajto̱lkui̱liáj, sino que ma̱jsan kichi̱waj yej aye̱kti, entonces yejemej yawij mikitij iga ijkó̱n kichijtokej, eꞌ ayꞌyéj tej motechko iga mikiskej.
Dios no̱ kiti̱tan Ezequiel iga ijkí̱n makijli ino̱mej gente: “Nej nisatoꞌ, inó̱n iga anikneki mamikika̱n yej kichi̱waj yej aye̱kti; ma̱jwaꞌ nikneki iga makikajte̱waka̱n iga kichi̱waj yej aye̱kti iwá̱n mamelaꞌisatoka̱n nokta. Inó̱n iga amejeme̱n yej ipilowa̱n ipilówa̱mpa Israel, siga ayá̱ꞌ ankinekij ximikika̱n, xikajte̱waka̱n iga ankichi̱waj yej aye̱kti.”
Seꞌ ve̱j Dios kijlij Ezequiel:
—Kua̱ꞌ israeli̱tajmej cha̱ntitoyaj ipan ita̱lmej, poxsan kichijkej yej aye̱kti ken yejemej kinekikej iwá̱n ken kua̱ꞌ kimopakej ta̱jli iga tamiktijkej wa̱n nochi yej aye̱kti kichijkej. Inó̱n iga poxsan nikuesowilijkej iwá̱n niki̱xtijkej ipan ita̱lmej iwá̱n nikti̱tankej iga mamocha̱nti̱tij ipan sekin pai̱smej. Eꞌ no̱ya̱n ka̱nsan asiáj israeli̱tajmej kaja̱wilmatiáj noto̱ka̱ꞌ iga ino̱mej gente de ino̱mej pai̱smej kijtowa̱yaj: “Iní̱mejya in ige̱ntej Dios yej kiki̱xtij ipan ita̱lmej.” Iní̱n poxsan ne̱yo̱lmiktia̱ya; eꞌ asis día iga nikchi̱was iga xa̱ka̱n sej ipan amota̱lmej, iwá̱n nimitzperdona̱rowili̱skej yej ankichijkej yej aye̱kti, iwá̱n iga ankiweyimati̱ltijkej i̱dolojmej. Amejemej poxsan anyo̱ltakuaktikej, inó̱n iga ayá̱ꞌ ankinekij ankichi̱waj ken nej nikijtowa, eꞌ nikpatas ken iga antajla̱mikij, ijkó̱n ankiyo̱lmakáskeja iga ankichi̱waskej ken nej nikijtowa. Nimitzmakaskej noEspí̱ritoj iwá̱n yéj mitzpale̱wi̱skej iga xinejnemika̱n ipan noojwi iwá̱n xikchi̱waka̱n ken nikijtowa. Anmocha̱nti̱skej ipan ta̱jli ka̱n nikijlij amotajwe̱wetkej; iwá̱n antajla̱mikiskej kenkua̱ꞌ se̱san amoa̱lmajmej ankipiáj, iwá̱n ankipiaskej se̱san amorre̱ymej. Nochi iní̱n nikchi̱was, eꞌ ayéj iga tejté̱ ankichijkej yej ye̱kti, sino que iga nej nimitztapejpenkej iwá̱n iga nej amoDio̱s.
’Poxsan nimitzye̱ꞌchi̱waskej iwá̱n ayoꞌ má̱j anmajmaya̱ntoskej. Ampi̱wiskej, iwá̱n ijkó̱n sekin nacio̱mej yej mitzyawalojtokej, kimatiskej iga nej nikojpachi̱wa yej xití̱ntoꞌya iwá̱n wel sej nikchi̱wa iga maonolo ka̱n ayoꞌ onolowa̱ya.