Profeta yej ito̱ka̱ꞌ Sofonías
Sofonías 1:4‑6; 2:1‑13
102
Dios kitajto̱lmáꞌ profeta yej ito̱ka̱ꞌ Sofonías iga ijkí̱n makijli ige̱ntej yej cha̱ntitoyaj Judá:—Amejeme̱n yawij mitzki̱xti̱tij ipan amopaís, iwá̱n inewi amoyo̱lka̱mej iwá̱n inewi yej ankipiáj iga ayá̱ꞌ anne̱weyimati̱ltiáj, ma̱jwaꞌ ankiweyimati̱ltiáj i̱dolojmej.
Dios no̱ kijlij ige̱ntej:
—Inochi amejemej yej ayá̱ꞌ anne̱weyimati̱ltiáj iwá̱n anmotankua̱ketzaj iyi̱xtaj i̱dolojmej, nia nimitzpolo̱tij yej ancha̱ntitokej Jerusalén, iwá̱n nia nimitzpolo̱tij nochi yej ancha̱ntitokej ipan iní̱n ta̱jli de Judá. Nia nikma̱nawi̱tij ino̱mej yejsan moconfia̱rojtokej ipan nej.
Iwá̱n Sofonías no̱ kijtoj:
—Nokni̱wa̱n, xikajte̱waka̱n iga ankichi̱waj yej aye̱kti mie̱j aya mitzikno̱chi̱waj Jehová Dios. Xikte̱mo̱ka̱n Jehová Dios, nochi amejemej yej ayá̱ꞌ anmoweyimatij ipan amoa̱lmajmej, xikchi̱waka̱n ken yéj kijtowa iwá̱n xikchi̱waka̱n yej ye̱kti. Ximoali̱mpamatika̱n, anka ijkó̱n wel anmoma̱nawi̱skej kua̱ꞌ yawi tapolo̱ti Jehová Dios. Iga Dios ayá̱ꞌ tejémejsan yawi te̱polo̱ti, no̱ yawi kipolo̱ti iya̱ltepe̱mej filisteojmej, moabi̱tajmej iwá̱n amoni̱tajmej, yej te̱pi̱najtijkej tejemej yej te̱tapejpen Dios.