Profeta yej ito̱ka̱ꞌ Miqueas
Miqueas 1:1‑12; 2:12‑13; 3:11; 4:2‑4; 5:2
97
Miqueas kajajwaꞌ israeli̱tajmej iga kichijtokej yej aye̱kti, kijlij:—ToDio̱s yawi mitzikno̱chi̱watij iga ankichi̱waj yej aye̱kti, iga tekiwajmej kiweyimati̱ltiáj i̱dolojmej iwá̱n kikno̱chi̱waj iyikni̱wa̱n iga ayá̱ꞌ taye̱ꞌjuzga̱rowaj, sino que kitajtánijpa tomi̱n kua̱ꞌ agaj kichi̱wiliáj justicia. Sacerdo̱tejmej tekipanowaj iga san kinekij matata̱ni̱ka̱n iwá̱n profe̱tajmej kinamakaj yej kijtowaj. Inó̱n iga yawij kixiti̱natij a̱ltepe̱mej yej onokej Samaria iwá̱n a̱ltepe̱ꞌ Jerusalén iwá̱n inewi amodio̱smej, iwá̱n amejeme̱n mitzpre̱sojwi̱skej iwá̱n mitzwi̱gaskej ipan seꞌ pai̱smej.
’Eꞌ Dios ne‑ijlij iga kua̱ꞌ pánoja nochi iní̱n, wi̱ꞌ día iga yawi ki‑ojpanechko̱ti israeli̱tajmej yej ayá̱ꞌ kimiktijkej, iwá̱n sej kiwajligaskej ipan ita̱lmej.
’Kua̱ꞌ toTe̱ko reina̱ro̱j ipan inewi iní̱n ta̱jli este ipan Jerusalén, tamis iga momijmiktilo̱j iwá̱n ayꞌya má̱j mokuejkueso̱lo̱j ipan iní̱n ta̱jli. Íkua̱ꞌ ankikajte̱waskej amoespa̱dajmeja iwá̱n ankikuískeja amoara̱dojmej. No̱ ankikajte̱waskej amola̱nzajmej iwá̱n ankikuískeja yej iga moteki arroz iwá̱n ayágajoꞌ má̱j kichi̱was iga mamomijmiktilo iga támiꞌya mokuejkueso̱lo iwá̱n ayꞌya majmawilo̱j. Ijkó̱n kijtowa Dios.
Miqueas no̱ kijtoj iní̱n itájto̱l Dios iga israeli̱tajmej:
—Malej iga Belén ali̱mpa a̱ltepe̱tzi̱n ipan iní̱n país de Judá, yawij kiweyimati̱lti̱tij, iga ompa ki̱sas yej nochipa yawi kimanda̱ro̱ti ipilowa̱n ipilówa̱mpa Abraham.