Profeta yej ito̱ka̱ꞌ Isaías
Isaías 1:1‑6, 11‑13, 18‑31; 2:1‑11; 6:1‑13; 7:1‑25; 9:1, 6‑7; 11:1‑9; 35:5‑6; 40:3‑8; 42:8
96
Dios kitapejpen se̱ ta̱gaꞌ yej ito̱ka̱ꞌ Isaías iga mamochi̱wa profeta ipan país de Judá. Isaías kipojtoya tájto̱l yej Dios kimakatoya kua̱ꞌ manda̱rojtoyaj ini̱mej reyes: Uzías, Jotam, Acaz iwá̱n Ezequías, iwá̱n ijkí̱n kijlij ige̱ntej:—Ijkí̱n kijtowa Dios: “Amejéme̱nwaꞌ in annopilowa̱n yej nochipa nimitz‑o̱mema̱wijtokej, eꞌ amejeme̱n ayꞌya anne̱weyimatisnekij. Xikitaka̱n toro yej kitila̱na arado ki̱xmati ite̱ko, ijko̱nsan no̱ burro kimati ka̱n kitamaka ite̱ko, eꞌ amejeme̱n yej anoge̱ntéjmejpa ayá̱ꞌ ankimatij niga anne‑i̱xmatij. Amejeme̱n ankichi̱waj yej aye̱kti, anke̱lka̱waj iga nej amoDio̱s.”
Kijtoj no̱ Dios ipan el profeta Isaías:
—Israel, ¿notejas iga xine̱miktili̱ka̱n komati yo̱lka̱mej? Ayꞌya xine̱wajliguili̱ka̱n má̱j rega̱lojmej de ba̱ldej, siga ayá̱ꞌ ankikajte̱waj iga ankichi̱waj yej aye̱kti. Xine̱na̱ꞌtecho̱ka̱n iwá̱n nimitzye̱ꞌitaskej. Malej iga póxsanya ankichijkej yej aye̱kti, nej nia nimitze̱lka̱wili̱tij yej ankichijkej iwá̱n nimitzyo̱lchika̱waskej.
’Eꞌ siga ayá̱ꞌ ankinekij iga xikajte̱waka̱n iga ankichi̱waj yej aye̱kti iwá̱n ayá̱ꞌ ankichi̱waj yej nej nimitzijliáj, yej mitzijiyaj wi̱tzej iwá̱n mitzmikti̱skej iga nej yej amoDio̱s nikti̱tanis.
’Nochi yej kikajte̱was iga kichi̱waj yej aye̱kti iga ne̱tokaj, ino̱mej nia nikma̱nawi̱tij. Eꞌ yej ayá̱ꞌ kinekiskej mamoyo̱lpataka̱n, yawij mikitij, iga ayá̱ꞌ kinekiskej manikpale̱wi̱ka̱n.
Sej Dios ijkí̱n kijlij Isaías iga makipowili̱ka̱n yej icha̱n Judá iwá̱n Jerusalén:
—Inó̱n día kua̱ꞌ wi̱ꞌ toTe̱ko tajuzga̱ro̱ki, nochi gente yawij kiye̱ꞌitatij a̱ltepe̱ꞌ Jerusalén, iwá̱n notio̱pan mochi̱was ken tzontekon iga ompa yawi monechko̱ti inewi gente yej onoꞌ ipan iní̱n ta̱jli. Wi̱tzetij komati gente de inewi a̱ltepe̱mej, kijtojtiwi̱tzeskej: “Matia̱ka̱n Jerusalén, ipan iweyitio̱pan israeli̱tajmej iga matikakitij yej Dio̱spa imandamie̱ntoj, iga ompa yéj te̱ne̱xtili̱j iyojwi.”
Ijkó̱n yawij kijto̱tij iga Dios wi̱ꞌ manda̱ro̱ki Jerusalén iwá̱n támisya iga momijmiktilo̱j.
Isaías sej kijlij la gente:
—¡Amejeme̱n yej ipilowa̱n ipilówa̱mpa Jacob!, Dios mitzkajtéjkeja iga ankiweyimati̱ltiáj i̱dolojmej iwá̱n ayꞌya ankiweyimati̱ltiáj Dios. Iwá̱n kua̱ꞌ asis inó̱n día kua̱ꞌ Dios yawi mitzikno̱chi̱watij, siga ximi̱ya̱naka̱n ipan xapomej, aya̱ꞌsan amoma̱nawi̱skej, iga ayá̱ꞌ ankichijkej ken kijtowa toTe̱ko. Eꞌ yawi asiti día iga yéjsan ise̱lti ankiweyimatiskej.
Ipan inó̱n año kua̱ꞌ miguiꞌ el rey Uzías, el profeta Isaías kitaꞌ se̱ visión, kitaꞌ iga Dios e̱watoꞌ ipan iweyi‑asie̱ntoj yej mo̱nsajtiꞌ. Isota̱ntzótzol weyaktiꞌ este kitzakuaya weyitio̱pan. A̱ngelejmeja kiyawalojtokej Dios iwá̱n pa̱pata̱ntoyaj, sejsé̱ de yejemej kipiayaj seis iya̱stakapalmej: o̱me iya̱stakápal iga kitzakuaya ixa̱yaꞌ, iwá̱n inó̱n seꞌ o̱me iga mo‑ikxitzakuayaj iwá̱n seꞌ o̱me iga pata̱niá. Iwá̱n kijtowa̱yaj:
—ToTe̱ko Jehová Dios ayí̱ꞌ kichi̱wa yej aye̱kti, iwá̱n ipan inewi ta̱jli mone̱xtiá ipode̱r.
Isaías kijtoj iga ijkí̱n kitaꞌ:
—Mie̱j ino̱mej a̱ngelejmej yej onokej ipan cielo takui̱kayaj, itaketzalyomej weyitio̱pan kuekuechkakej iwá̱n weyitio̱pan‑ijtiꞌ no̱ya̱n tapo̱ktajtiáꞌ. Iwá̱n mie̱j iní̱n nikitztoꞌ, nikijtoj: “¡Nila̱stimaj!, iga nita̱gaꞌ yej nikchi̱wa yej aye̱kti kensan nochi tajta̱gaꞌ. Nia nimikiti, iga ayá̱ꞌ kajasi manikna̱ꞌtecho Dios iwá̱n iga niknojma‑itaꞌ Dios yej kipoxpiá poder.”
’Iwá̱n se̱ ángel pata̱ntiwa̱laj note̱noj, kiki̱tzkijtiwa̱laj se̱ tikuawiꞌ yej xo̱tatoya, yej kikuiꞌ ipan iyalta̱r Dios. Iwá̱n tikuawiꞌ ne̱ta̱lilij ipan note̱n iwá̱n kijtoj: “Taꞌ xikita, iní̱n kichijchin mote̱nkajlo̱ꞌ, iná̱n kenkua̱ꞌ ayꞌya tikchij yej aye̱kti.”
’Después nikáꞌ itájto̱l toTe̱ko yej kijtowa̱ya: “¿A̱ꞌyéj nikti̱tanis iga makipowa notájto̱l?”
’Iwá̱n nikijtoj: “Nigaj nonoꞌ, nej xine̱ti̱tani.” Iwá̱n Dios ne‑ijlij: “Xajwaꞌ iwá̱n xikijli la gente: Amejeme̱n anye̱ꞌtakakij, eꞌ ayá̱ꞌ ankentende̱rowaj; antacháj, eꞌ ayá̱ꞌ ankimatij te̱ iteki yej ankitaj. Inó̱n iga nia má̱j nimitzyo̱ltakuawayalti̱tij iwá̱n ayꞌya wel ankichi̱waskej yej nikijtowa; kenkua̱ꞌ nia nimitzi̱xtzakuatij iwá̱n ayá̱ꞌ ankentende̱ro̱skej notájto̱l. Inewi iní̱n nikchi̱was iga ayá̱ꞌ ankinekij xikajte̱waka̱n yej aye̱kti ankichi̱waj, inó̱n iga ayá̱ꞌ amoma̱nawi̱skej.”
’Nej niktajtan: “¿NoTe̱ko, este ké̱man kikajte̱waskej iga kichi̱waj yej aye̱kti ini̱mej gente?” Iwá̱n yéj kijtoj: “Este que a̱ltepe̱mej maxi̱xiti̱ntiká̱ iwá̱n kua̱ꞌ ayꞌya teyis ompa nisé̱ gente iwá̱n ipan inó̱n a̱ltepe̱ꞌ maka̱wi petz tásol, este que maniktalo̱chti yej nigaj cha̱ntitokej. Eꞌ sekin de ino̱mej mokuepaskej iga mamocha̱ntikij nigaj, iga nogé̱ntejwaꞌ ken tikita se̱ kuawiꞌ kua̱ꞌ motzonteki, ka̱wi petz ikuateponka. Iwá̱n inó̱n kuatepon sej ojpaseliá.”
Kua̱ꞌ manda̱rowa̱ya rey Acaz ipan país de Judá, el rey de Siria iwá̱n el rey de Israel kinechkojkej isolda̱dojmej iwá̱n yajkij kixi̱xiti̱natoj Jerusalén, eꞌ ayá̱ꞌ wel kixi̱xiti̱nkej.
Iwá̱n Dios kiti̱tan Isaías iga makijli̱ti Acaz iga amo mamajmawi, iga ayá̱ꞌ mochi̱was yej ini̱mej reyes kichi̱wasnekij. Isaías yajki iwá̱n kijlij:
—Ijkí̱n mitzijliá Dios: “Amo ximajmawi Acaz. Inó̱n o̱me̱n reyes ayá̱ꞌ mitzta̱nili̱skej. Iga xicre̱do yej nemi nimitzijliá iní̱n yawi mochi̱wati: Se̱ takotzi̱n kipiás se̱ ipiltzi̱n iwá̱n kitoka̱wiskej Emanuel, yej kijto̱jneki: Dios onoꞌ towa̱n. Inó̱n iga, kua̱ꞌ aya yo̱lasi chooli̱ntzi̱n iga makimati katiapa yej ye̱kti iwá̱n katiapa yej aye̱kti, ita̱lmej ino̱mej o̱me reyes yej iná̱n tikmajmawiliá yawij ka̱witij ise̱lti iga ayagaj ompa cha̱ntitoskej iga ige̱ntej yawij mikitij.”
’Eꞌ má̱j má̱j, Dios kikno̱chi̱was poxsan toge̱ntej iga yawi wi̱tzeti el rey de Asiria iwá̱n komati isolda̱dojmej iwá̱n yawij kikua̱tij inewi yej tikto̱kkej. Yawij kitati̱tij mi̱jlimej ka̱n to̱ktoꞌ u̱vajmej, kimijmikti̱skej borre̱gojmej, iwá̱n to̱rojmej iwá̱n chi̱vojmej: iwá̱n te̱pre̱sojwi̱skej ipan ita̱lmej.
Seꞌ ve̱j Isaías ijkí̱n kijlij ige̱ntej:
—Dios ne‑ijlij iga ayá̱ꞌ nochipa antako̱mititoskej iwá̱n ayá̱ꞌ nochipa moyolmiktijtolo̱j ipan íta̱l Zabulón iwá̱n ipan íta̱l Neftalí; iga yéj iga iweyipode̱r yawi mone̱xti̱ti ipan ivi̱dajmej la gente yej onokej iyi̱ka̱mpa we̱ya̱ꞌ Jordán, ipan Galilea ka̱n cha̱ntitokej yej ayéj judiyojmej. La gente yej onokej ken kua̱ꞌ ka̱n takomichka̱n iga ayá̱ꞌ ki̱xmatij Dios, kitaskej se̱ weyi tiꞌti, iwá̱n la gente yej majmawij iga yawij mikitij, yawij kita̱wi̱tij tiꞌti iga asis iná̱ꞌ yejemej se̱ yej kitapejpen Dios.
’Se̱ choochi̱n yawij ki‑onolti̱tij yej yawi te̱ye̱ꞌchi̱wati iwá̱n manda̱ro̱j no̱ya̱n ipan ta̱jli. Yawi moto̱ka̱wi̱ti admirable, tano̱no̱tzani, Dios yej kipoxpiá poder, toTaj yej nochipa onos, príncipe yej kichi̱wa iga maonolo tamelá̱. Manda̱ro̱j kensan manda̱roj to‑ikyapatajwe̱wej David, ijkó̱n nochipa tagoberna̱ro̱j, taye̱ꞌjuzga̱ro̱j, kijuzga̱ro̱j sejsé̱ kensan iga se̱ kichij.
’IyEspí̱ritoj Dios onos ipan se̱ ipiltzi̱n ipilówa̱mpa Isaí, iwá̱n kine̱xtili̱j ken iga makitapejpena katiapa yej ye̱kti iwá̱n katiapa yej aye̱kti iwá̱n no̱ kitajpalmakas. Yéj ayá̱ꞌ yawi tajuzga̱ro̱ti ken tejemej tikchi̱waj, ken iga tikitaj iwá̱n ken iga tikakij, yej sí taye̱ꞌjuzga̱ro̱j. Ka̱n yéj manda̱ro̱j no̱ya̱n onolo̱j tamelá̱; koyo̱ꞌ sen‑ye̱ꞌonoskej iwá̱n borre̱gojtzitzi̱n; te̱kua̱ni iwá̱n ca̱brajtzitzi̱n mosente̱kaskej itza̱la̱mej; to̱rojtzitzi̱n iwá̱n te̱kua̱ni senemiskej iwá̱n yo̱lka̱mej yej momatij ipan a̱ltepe̱ꞌ iwá̱n se̱ choochi̱n kicuida̱ro̱j. Vaca iwá̱n osa sentakuajtinemiskej, ipilowa̱n mosentejte̱kaskej, iwá̱n te̱kua̱ni yawi kikua̱ti ikuayo trigo ken tikita toro. Ayꞌya má̱j kikua̱j la gente iwá̱n anima̱lmej, iga no̱ya̱n ipan ta̱jli ki̱xmatiskej itájto̱l Dios, ijkó̱n ken peyajtoꞌ láma̱r.
’Pachamej yawij tachatij, iwá̱n yej ayá̱ꞌ takakij, takakiskej; ko̱xomej wi̱wito̱niskej ken masa̱mej, iwá̱n no̱nojmej takui̱kaskej. Ini̱nya nokta kichi̱was toTe̱ko.
’Ipan toa̱ltepe̱ꞌ ki̱sas se̱ ta̱gaꞌ yej yawi kijto̱ti recio itájto̱l Dios ipan desierto: “¡Wi̱ꞌya toTe̱ko!; xikajte̱waka̱n iga ankichi̱waj yej aye̱kti iwá̱n xikchi̱waka̱n ken kijtowa itájto̱l, iga wel xi‑ojkuika̱n ipan inó̱n ojti ka̱n yéj mitzojmakaj. Ayá̱ꞌ wejkatis Dios te̱titanili̱j yej wi̱ꞌ kima̱nawi̱ki inochi gente.”
’Iwá̱n nikáꞌ se̱ tájto̱l yej ne‑ijlij: “Xitajto recio”, iwá̱n nej niktajtan: “¿Te̱ nikijto̱j?” Iwá̱n ne‑ijlij: “Xikijto iga la gente ken tikita kochkiꞌ iwá̱n nochi yej kichi̱wa ken tikita se̱ xo̱chiꞌ yej onoꞌ ipan mi̱jli. Wa̱ki kochkiꞌ iwá̱n xo̱chiꞌ no̱ pili̱ni. Eꞌ itájto̱l toDio̱s nochipa onoꞌ.”
Amo mamoweyimati̱lti i̱dolojmej
Isaías 44:6, 9‑20
’Kijtowa toTe̱ko Dios: “Nej niJehová, inó̱n noto̱ka̱ꞌ, iwá̱n nej ayá̱ꞌ nikneki iga sewoꞌ makiweyimatilti̱ka̱n, sino que nejsan. Anikneki iga makiweyimati̱lti̱ka̱n i̱dolojmej. Nejsan niDio̱s, ateyi seꞌ. Ayá̱ꞌ niki̱xmati seꞌ dios.”
’Tajta̱gaꞌ yej kichi̱waj i̱dolojmej akimatij te̱ kichi̱waj, iga malej makichi̱waka̱n se̱ ídolo yej poxsan mo̱nsajtiꞌ, aya̱ꞌsan te̱pale̱wiá. Yejémejsan nokta kitaj iga i̱dolojmej ayá̱ꞌ tacháj iwá̱n ayá̱ꞌ tajla̱ntokej, achi mapi̱na̱waka̱n yej kichi̱waj i̱dolojmej. Yej kichi̱wa ídolo de tepos, kitotó̱napa tepos ipan tékol iga mayama̱niá. Kiwi̱tektiá inó̱n tepos iga martillo iwá̱n cincel iga kixa̱yaꞌtiá, iwá̱n inewi iní̱n tekipáno̱l kichi̱wa iga itájpal iwá̱n iga ima̱mej. Tekipanowa poxsan este ta̱tapoliwi iga maya̱na iwá̱n iga a̱taneki. Eꞌ bá̱ldejsan iga momaya̱nmiktiá.
’Yej kichi̱wa ídolo de kuawiꞌ, kita̱liá irre̱glaj iwá̱n kimarca̱rowa itro̱sojka kuawiꞌ iwá̱n kitzotá̱ iga cepillo. Kixa̱yaꞌtiá iga matachá ken se̱ ta̱gaꞌ, iwá̱n kua̱ꞌ támiꞌya kichi̱wa kuachoochi̱n yej kijliáj ídolo, kiwí̱gaya ícha̱n iwá̱n kiweyimati̱ltiá kenya idio̱s.
’Ta̱gaꞌ no̱ yawi kitzontekiti se̱ kuawiꞌ, iwá̱n iga ino̱nsan kuawiꞌ kikui iga ikuajkuáwil iwá̱n ino̱nsan kuawiꞌ itajkolka kichi̱wa se̱ ídolo iwá̱n despué̱j motankua̱ketza ite̱noj. Iwá̱n itajkolka inó̱n kuawiꞌ kikui iga kuajkuáwil iwá̱n kakiá tiko, mota̱liá tite̱noj iwá̱n moskowa; ompa kimana itákual iwá̱n takua este que ixwi, iwá̱n kijtowa: “Iní̱n kuajkuáwil pox xo̱ta este kitótonya kajli”. Iwá̱n kikui seꞌ itajkolka kuawiꞌ iwá̱n kichi̱wa ídolo iwá̱n motankua̱ketza ite̱noj inó̱n ídolo iwá̱n kijliá: “Xine̱pale̱wi, iga tej tinodio̱s.”
’Inó̱n ta̱gaꞌ xe̱toktiꞌ; ayá̱ꞌ ye̱ꞌtajla̱ntoꞌ iga ayá̱ꞌ kimati iga se̱ itajkolka kuawiꞌ kitatij ipan tiꞌti iwá̱n ipan itekolyo kiyoksi̱ltij ípa̱n, kixkaꞌ inakatzi̱n iwá̱n kikuaj. Iwá̱n ¿te iga motankua̱ketza iyi̱xtaj seꞌ itajkolka ino̱nsan kuawiꞌ? Ino̱nwaꞌ petz kuáwiꞌsan, no̱ akimati nité̱ iga seꞌ itajkolka yej tátaꞌya móchija nexti. Yej xe̱toꞌtiꞌ iya̱lmaj ta̱gaꞌ, kiki̱xtiá ipan ye̱ꞌojti iga iya̱lmaj amo mamoma̱nawi. Ayá̱ꞌ kimati iga isé̱ltisan mokajkayajtoꞌ.
Nochi ini̱mej tajto̱lmej kijlij Isaías ige̱ntej iga Dios kine̱xtilia̱ya.
Isie̱rvoj Dios yawi kisufri̱ro̱ti
Isaías 52:13‑53:12
Isaías no̱ kijtoj iga se̱ día yawi wi̱tzeti yej yawi mochi̱wati rey ipan Israel:
—Miaꞌ moyo̱lmajti̱skej iga kitaskej isie̱rvoj Dios, ayꞌ ye̱ꞌne̱sis ixa̱yaꞌ iga poxsan kimagaskej, ayꞌ ne̱sis ken ta̱gaꞌ. Tejemej tiawij tikitatij, eꞌ ayꞌ ye̱ꞌne̱sis, ateyis ipan yéj nité̱ yej mate̱yo̱ltila̱na. Yawij kijiyatij iwá̱n ayagaj kitajto̱lkui̱li̱j. Yéj ya̱ti se̱ ta̱gaꞌ yej kijyo̱wiá iga kimagaskej, yéj kimatis kén iga kua̱ꞌ se̱ kikno̱chi̱waj, iwá̱n tejemej ayá̱ꞌ tikye̱ꞌitaskej.
’Eꞌ melá̱ꞌ iga yéj yawi kiwi̱gati tokokolis iwá̱n yéj kipojpolo̱j iga ayꞌya matimokno̱matitoka̱n. Kua̱ꞌ nemi kikno̱chi̱waj, tiawij tikijto̱tij iga ino̱nwaꞌ Dios nemi kikno̱chi̱wa. Yawij kijiyatij iwá̱n kimagaskej iga totechkomej. Inó̱n castigo yej kajasi iga tejemej katka matikmachi̱li̱ka̱n, yéj kimachi̱li̱j iga te̱ma̱nawi̱j iga amo mate̱castiga̱ro Dios. Iwá̱n iga yéj kikno̱chi̱waskej tiawij ti‑achitiatij. Nochi tipa̱payi̱nikej ken tikita borre̱gojmej, sejsé̱ kikuiꞌ iyojwi, eꞌ yéj mikis iga kixta̱was yej aye̱kti tikchijtokej. Yawij kimagatij, eꞌ malej iga kaja̱wilmatiskej, yéj ayá̱ꞌ tajto̱j. Yawij kiwi̱gatij ken tikita se̱ borre̱gojtzi̱n ka̱n kimiktiáj, iwá̱n ken se̱ borrego kua̱ꞌ motejtekiliáj itzojmiyo, ayá̱ꞌ tzajtzis.
’Yéj yawij kiwi̱gatij ca̱rcelijtiꞌ, malej iga ayá̱ꞌ kichij nité̱, ayagaj kima̱nawi̱j, yawij kejeski̱xti̱tij, iwá̱n yawij kimikti̱tij. Eꞌ ayagaj kimatis iga nemi kikno̱chi̱waj iga nemi kixta̱wa yej aye̱kti kichij noge̱ntej. Malej iga ayí̱ꞌ kichij yej aye̱kti iwá̱n ayí̱ꞌ takajkayaj, Dios yawi kikno̱chi̱wati. Eꞌ kua̱ꞌ mikis, mochi̱was ken se̱ ofrenda iga kixta̱was yej tikchijkej yej aye̱kti, nochipa onos iwá̱n yawi kitati ipilowa̱n ipilówa̱mpa. Yawi kitati te̱ mota̱nilij iga kikno̱chijkej, iwá̱n yo̱lpa̱kis. Dios kita̱li̱j ka̱n makipoxye̱ꞌitaka̱n, iga yéj kixtaj nochi yej tikchijkej yej aye̱kti; kitakej ken yej kichij yej aye̱kti, eꞌ yéj ijkó̱n kixtaj yej tejemej tikchijkej yej aye̱kti.
ToTe̱ko kiti̱tanis se̱ rey
Isaías 55:1‑13; 61:1‑3
Dios sej kitajto̱lmáꞌ profeta Isaías, iwá̱n ijkí̱n kijlij:
—Nochi yej kinekij ma‑isatoka̱n, mawi̱tzeka̱n iwá̱n nej nikchi̱was iga nochipa maonoka̱n; ayá̱ꞌ ne‑ixta̱waskej.
’Amo xikowaka̱n tákual yej ayá̱ꞌ kipojpolowa amomaya̱n, niga xigasta̱ro̱ka̱n amotomi̱n ipan tejté̱ yej ayá̱ꞌ mitzye̱ꞌixwitiáj. Xine̱tajto̱lkakika̱n iwá̱n ken kua̱ꞌ ankikua̱skej yej má̱j ye̱kti; xine̱cre̱do̱ka̱n iwá̱n nochipa amonoskej. Iwá̱n nej nikchi̱was yej nikpromete̱rowilij amo‑ikyapatajwe̱wej David, iwá̱n nikti̱tanis se̱ rey yej yawi kipowili̱ti la gente notájto̱l, mochi̱was se̱ jefe yej kimachti̱j inewi gente. Yéj yawi kino̱tzati la gente yej ayéj de Israel iwá̱n yejemej yawij motalojtiwi̱tzetij note̱noj iga nej yej amoTe̱ko, nikweyimati̱lti̱j inó̱n rey.
’Xine̱te̱mo̱ka̱n mie̱j weljoꞌ anneasij, xine̱no̱tzaka̱n iná̱n mie̱j na̱ꞌsan nonoꞌ. Yej ayá̱ꞌ ye̱ꞌnemij, makipataka̱n ken iga nemij, iwá̱n yej kichijtoꞌ yej aye̱kti ayꞌya má̱j makichi̱wa yej aye̱kti iwá̱n sej makichi̱waka̱n ken nej nikneki iga nej amoDio̱s iwá̱n nia nimitzikne̱li̱tij, iwá̱n nia nimitzmelaꞌe̱lka̱wili̱tij yej ankichijkej yej aye̱kti. Iga ken nej nitajla̱miki ayéj ken amejeme̱n antajla̱mikij, ken annemij ayéj ken nej ninemi. Ijkó̱n ken ankitaj cielo onoꞌ ajko iwá̱n ta̱jli onoꞌ tani, ijkó̱n in notajla̱mikilis onoꞌ má̱j ajko que yej amejeme̱n ankejla̱mikij; iwá̱n nochi yej nikchi̱wa, má̱j ye̱kti que yej amejemej ankichi̱waj.
’Nej nikti̱tani tiawa̱ꞌ iga maka̱pacho ta̱jli iga wel mamochi̱wa yej ken amejemej ankito̱kaj; ijkó̱n yej tekipanowaj ipan mi̱jli kipiáj itakualmej iwá̱n isemi̱llajmej iga sej kito̱kaj. Ijko̱nsan no̱ notájto̱l, iga ayá̱ꞌ bá̱ldejsan nikijtowa, sino que kichi̱wa nochi ken nej nikneki.
’Ampa̱ktiki̱saskej iwá̱n ayá̱ꞌ anmajmawiskej iga notati̱tan yawij mitzojmakatij amejeme̱n yej anwi̱tzeskej note̱noj; amejeme̱n anye̱ꞌonoskej iwá̱n ayá̱ꞌ anmajmawiskej. Ayá̱ꞌ ankichi̱wayaj yej ye̱kti, eꞌ iná̱n anyawij ankichi̱watij yej ye̱kti, iwá̱n anne̱weyimati̱lti̱skej nochipa.
Isaías no̱ kijtoj iga itati̱tan Dios ijkí̱n tajto̱j: “IyEspí̱ritoj Dios yej noTaj, onoꞌ ipan nej. Yéj ne̱tapejpen iwá̱n ne̱ti̱tan iga manikpowili ye̱ꞌnoti̱ciaj yej ayá̱ꞌ motapialiáj, iwá̱n manikyo̱lchika̱wa yej moyo̱lmiktijtokej, iwá̱n maniki̱xti yej pre̱sojtitokej, iwá̱n maniktachalti yej pachamej, iwá̱n manikachitialti enfe̱rmojmej. Ne̱ti̱tan no̱ iga manikpowa iga asis día kua̱ꞌ Dios yawi mitzperdona̱rowili̱tij yej ankichijkej yej aye̱kti iwá̱n moma̱ti̱j ipan yej mitzijiyaj.”