Israeli̱tajmej kiwi̱gaj ipan seꞌ país yej ito̱ka̱ꞌ Asiria
2 Reyes 17:5‑6; 25:41
95
Má̱j má̱j, yej cha̱ntitokej Asiria momijmiktijkej iwá̱n israeli̱tajmej. Iwá̱n kiwi̱gakej preso la gente de Israel yej cha̱ntitoyaj ompa. Ijkó̱n iga israeli̱tajmej pa̱payi̱nikej iwá̱n ali̱nsan ka̱wikej ipan país de Israel.Ayá̱ꞌ wejkatiꞌ el rey de Asiria kiwajli̱ꞌ gente de seꞌ lugar iga mamocha̱nti̱ka̱n ipan ita̱lmej israeli̱tajmej, ipan íta̱l yej ito̱ka̱ꞌ Samaria. Wa̱lkej gente de Babilonia iwá̱n de sejséꞌ a̱ltepe̱ꞌ. Eꞌ kua̱ꞌ pejkej iga mocha̱ntijkej ipan ita̱lmej israeli̱tajmej, iga ayá̱ꞌ kiweyimatiáj Jehová Dios, Jehová kiti̱tan te̱kua̱nimej yej kimiktijkej sekin de ino̱mej gente. Iwá̱n sekin yajkij kijli̱toj el rey de Asiria:
—Nejemej yej anne̱ti̱tankej iga manicha̱ntitoka̱n ipan a̱ltepe̱mej de Samaria anikmatij kén iga manikweyimatika̱n Jehová Dios. Inó̱n iga Dios kiti̱tan te̱kua̱nimej yej nemi ne̱miktiáj.
Kua̱ꞌ inó̱n kikáꞌ el rey de Asiria, tatekimáꞌ:
—Xikui̱gaka̱n se̱ sacerdote israelita yej tikpiáj preso nij Asiria iga makine̱xtili ino̱mej gente iley Dios.
Ijkó̱n iga inó̱n se̱ sacerdote yej kiwi̱gákaja preso, sej kiwajligakej Samaria, iwá̱n yéj kine̱xtilij la gente ken iga mamoweyimati̱lti Jehová Dios.
Eꞌ sejsé̱ a̱ltepe̱mej kipiayaj idio̱smej, iwá̱n ino̱mej i̱dolojmej yajkij kika̱watoj pan tio̱pamej iwá̱n kita̱lkej na̱ꞌ alta̱rmej yej kichijkej israeli̱tajmej ipan tepe̱mej. Iwá̱n ompa kimiktilia̱yaj yo̱lka̱mej iga idio̱smej, iwá̱n sekin este kitatia̱yaj ipilowa̱n ipan tiwelo̱n iga kimakayaj ofrenda idio̱smej.
Ijkó̱n iga ino̱mej gente kiweyimati̱ltia̱yaj Jehová, eꞌ no̱ kiweyimati̱ltia̱yaj i̱dolojmej. Ino̱mej gente ipilowa̱n iwá̱n inie̱tojwa̱n ijko̱nsan no̱ kichijkej, iwá̱n iná̱n ijko̱nsan kichijtokej.