Profeta yej ito̱ka̱ꞌ Amós
Amós 1:1‑2:6; 5:20‑27; 6:14; 9:11‑12
94
Onoya se̱ ta̱gaꞌ ito̱ka̱ꞌ Amós yej kicuida̱rowa̱ya borre̱gojmej iwá̱n cha̱ntitoya ite̱noj a̱ltepe̱ꞌ Belén, ipan estado de Judá. Dios kitapejpen Amós iga mamochi̱wa profeta iga makijto yej Dios kijli̱jneki la gente yej cha̱ntitokej Israel iwá̱n yej cha̱ntitokej Judá. Iní̱n yej kijtoj Dios ipan Amós:—Inewi pai̱smej yej mitzyawalojtokej nia nikikno̱chi̱watij iga mitzchi̱wilijkej yej aye̱kti, iga amejeme̱n yej nimitztapejpenkej. Inó̱n iga nia nikikno̱chi̱wati la gente yej cha̱ntitokej Siria, Filistea, iwá̱n yej cha̱ntitokej Damasco, Gaza, iwá̱n yej cha̱ntitokej Tiro, Edom, Amón iwá̱n Moab. Eꞌ ayá̱ꞌ nia nike̱lka̱wati iga amejeme̱n no̱ ankichijkej yej aye̱kti. Bá̱ldejsan anne̱wajliguili̱skej ofre̱ndajmej; ayá̱ꞌ nia nimitzkui̱li̱tij. Siga anne̱takui̱kili̱skej iga xine̱weyimati̱lti̱ka̱n, ayá̱ꞌ nia nimitzkakitij, iga amejeme̱n ayá̱ꞌ ankichi̱waj ken nej nikijtowa.
’Siga ayá̱ꞌ anmokajka̱waj iga ankichi̱waj yej aye̱kti, yej mitzijiyaj de seꞌ país yawij mitzwi̱gatij preso ipan seꞌ ta̱jli, ka̱n amonoskej iyescla̱voj iga yej ompa icha̱mej, iwá̱n inewi amoa̱ltepe̱mej xi̱xiti̱ntika̱wis.
’Eꞌ ásissan hora iga ipilowa̱n yej mopilówa̱mpa yawij ne̱weyimatilti̱tij iwá̱n ne̱tokaskej ken ne̱weyimati̱ltia̱yaj kua̱ꞌ onoya rey David. Nia nikchi̱wati ijkó̱n iga inewi la gente no̱ mane̱weyimati.
Ijkó̱n kijtoj Dios, iwá̱n ijkó̱n Amós kijlij la gente yej cha̱ntitokej Israel iwá̱n yej cha̱ntitokej Judá.