Profeta yej ito̱ka̱ꞌ Joel
Joel 1:1‑2:14, 28‑32, 3:1‑5
98
Iní̱n yej toTe̱ko kitekimáꞌ Joel iga makijli israeli̱tajmej yej igé̱ntejpa:—Amejeme̱n yawij mitzikno̱chi̱watij iga nochi yej ankipiáj yawij mitzxi̱xiti̱nili̱tij, iwá̱n amejeme̱n yawij mitzwi̱gatij preso ipan seꞌ pai̱smej.
No̱ Joel kijtoj:
—Dios yawi mitzye̱ꞌchi̱watij siga sej ankitokaj iyojwi, siga ayꞌya ankichi̱waj yej aye̱kti iwá̱n siga ankicre̱dowaj Dios iga inochi amoa̱lmajmej, iga yéj pox taye̱ꞌita iwá̱n ayá̱ꞌ nimaní̱n kuesiwi. Te̱perdona̱rowa iwá̱n tee̱lka̱wiliá yej tikchijkej yej aye̱kti.
Iwá̱n iga yej mochi̱was kua̱ꞌ wi̱ꞌ iyEspí̱ritoj Dios, Dios ijkí̱n kijlij Joel:
—Kua̱ꞌ ayꞌya wejka iga niwi̱ꞌ, nikti̱tanis noEspí̱ritoj ipan la gente no̱ya̱n ipan iní̱n ta̱jli, iwá̱n ipilowa̱n ipilówa̱mpa ini̱mej gente kipowaskej notájto̱l. Totajwe̱wetkej kochte̱mikiskej iwá̱n chokomej kitaskej yej nej nikochte̱mikti̱skej. Iwá̱n ipan ino̱mej días no̱ nikti̱tanili̱j noEspí̱ritoj amoescla̱vojmej, tajta̱gaꞌ iwá̱n siwa̱tkej, iwá̱n no̱ kipowaskej notájto̱l. Nia nikchi̱wati tejté̱ yej ayí̱ꞌ mo‑ita ipan cielo iwá̱n ipan ta̱jli, iwá̱n inewi yej onokej ipan ta̱jli yawij majmawitij. Cielo yawi chi̱liwiti ken tikita esti, iwá̱n ipan ta̱jli onos tiwelo̱n, iwá̱n pox tapo̱ktajtiás. Ayoꞌ to̱nas iga pox tapo̱ktajtitos, iwá̱n la luna no̱ chi̱liwis, inó̱n mochi̱was kua̱ꞌ ali̱nsan poliwi iga níwi̱ꞌya, íkua̱ꞌ nochi yawij majmawitij iga nej nia nitajuzga̱ro̱ti. Iwá̱n inochi yej ne̱tajtanili̱j iga manikma̱nawi, nia nikma̱nawi̱tij.