Naamán kitato Eliseo iga makipajti
2 Reyes 5
88
Ipan país de Siria, onoya se̱ ta̱gaꞌ yej ito̱ka̱ꞌ Naamán. Inó̱n ta̱gaꞌ kimanda̱rowa̱ya isolda̱dojmej rey de Siria. Naamán ni alí̱n ayá̱ꞌ majmawiá, iwá̱n el rey poxsan kinekiá Naamán iga yéj kita̱nilij inewi iyenemi̱gojmej. Eꞌ inó̱n ta̱gaꞌ kipiaya se̱ enfermedad yej ito̱ka̱ꞌ lepra,a yej kipala̱ntijtia̱ya ikajlo̱ꞌ.Cha̱n Naamán onoya se̱ takotzi̱n de Israel. Ompa kiwi̱gakej iga makipale̱wi isiwa̱ꞌ Naamán. Se̱ día takotzi̱n ijkí̱n kijlij isiwa̱ꞌ Naamán:
—Ne‑iga ipan estado de Samariab onoꞌ se̱ iprofe̱taj Dios. Siga katka mowe̱wej mayawi makitajtanili̱ti iga makipajti, yéj kichi̱was.
Naamán kimatiꞌ yej kijtoj takotzi̱n iwá̱n yajki kijli̱to rey de Siria. Iwá̱n el rey kijtoj:
—Ye̱kti iga tiwa̱laj. Xaj iná̱n Samaria iga xitajto̱ti iwá̱n iprofe̱taj Dios. Nej nia nimitzmakati se̱ a̱maꞌ iga xikmaka irre̱y israeli̱tajmej.
Iwá̱n Naamán yajki. Kiwi̱gaꞌ poxsan komati tomi̱n iwá̱n diez sota̱ntzótzol iga kimakas profeta. Iwá̱n no̱ kiwi̱gaya a̱maꞌ ka̱n ijkí̱n ijkuilijtoya: “Yej kiwi̱ga iní̱n a̱maꞌ, ito̱ka̱ꞌ Naamán, ije̱fej nosolda̱dojmej. Yéj kipiá lepra iwá̱n nimitzti̱taniliá iga xikpajti.”
Kua̱ꞌ el rey de Israel kitaꞌ inó̱n a̱maꞌ, kitzaya̱n itzótzol iga poxsan majmawiꞌ, iwá̱n kijtoj:
—Nej ayéj niDio̱s iga wel manitamikti iwá̱n wel sej manitaojpa‑ixiti. ¿Te iga ne̱ti̱tanilij iní̱n ta̱gaꞌ? Nej awel nikpajtiliá ile̱praj. Taꞌ xikitaka̱n iní̱n kiyokate̱mowa ka̱nsan mape̱wa iga manimomijmikti̱ka̱n.
Kua̱ꞌ Eliseo kimatiꞌ iga el rey poxsan majmatoꞌ, kiti̱tan yej kijli̱toj el rey:
—¿Te iga tiktza̱tzaya̱n motzótzol? ¿Te iga timajmawi? Xine̱ti̱tanili in inó̱n yej enfermo iwá̱n no̱ya̱n yawi momatiti iga pan país Israel, kena, onoꞌ iprofe̱taj Dios.
Iwá̱n Naamán yajki ipan ikuacarre̱taj yej kitila̱ntiá kawa̱yojmej, iwá̱n kiketzaltij ikalte̱noj Eliseo. Iwá̱n Eliseo kiti̱tan Giezi yej imo̱nsoj iga ijkí̱n kijli̱to Naamán:
—Xaj xima̱tzompolakiti siete ve̱j ipan we̱ya̱ꞌ Jordán iwá̱n tia tipajtiti.
Eꞌ Naamán poxsan kuejkuesitiajki iwá̱n ijkí̱n kijtoj:
—Nej nikijtoj anka ima̱tika Eliseo ki̱sas iwá̱n kite̱ne̱wi̱j ito̱ka̱ꞌ iDio̱s iwá̱n ne̱chijchimis ka̱n pala̱ntoꞌ nokajlo̱ꞌ iwá̱n niye̱ktiasya. A̱ꞌtimej yej onoꞌ nocha̱mpa má̱j ye̱ka̱ꞌ que inochi a̱ꞌtimej yej onoꞌ Israel; puej siga a̱ꞌti in yej ne̱pajti̱j, má̱j ye̱kti nia nima̱tzompolakiti ipan we̱ya̱ꞌ yej onoꞌ nocha̱mpa iwá̱n nipajtis.
Iwá̱n Naamán poxsan kuejkuesitiajki.
Eꞌ imo̱nsojmej kijlikej:
—Note̱ko, siga inó̱n profeta mamitzti̱tani katka iga xikchi̱wa tejté̱ ken yej pox difícil, tikchi̱wáyasan. Iná̱n, ¿te iga ayá̱ꞌ tikchi̱wa ken mitzijlij iga xaj xima̱tzompolakiti ipan we̱ya̱ꞌ Jordán iwá̱n pájtisya mokajlo̱ꞌ?
Iwá̱n Naamán kichij ken kijtojkej imo̱nsojmej. Naamán kalaꞌ ipan we̱ya̱ꞌ yej ito̱ka̱ꞌ Jordán. Ma̱tzompolaꞌ siete ve̱j achó̱n ke̱ꞌsan kijlij iprofe̱taj Dios, iwá̱n achitiáꞌ.
Iwá̱n Naamán yajkij sej cha̱n Eliseo iwá̱n yej íwa̱n nemiáj, iwá̱n ijkí̱n kijlij Eliseo:
—Iná̱n nikmati iga ateyi seꞌ Dios ken yej onoꞌ Israel. Iná̱n nimitzijliá iga xikui yej nigaj nimitzwajliguiliá iga momako̱ka.
Eliseo kijtoj:
—Dios isatoꞌ iwá̱n ne‑itztoꞌ, inó̱n iga ayá̱ꞌ nia nimitzkui̱li̱ti yej tine̱wajliguilij.
Malej iga Naamán kijlia̱ya iga makikui, eꞌ Eliseo ayá̱ꞌ kineꞌ. Iwá̱n Naamán kijlij Eliseo:
—Iná̱n nike̱man ayá̱ꞌ nia nikmakati ofrenda yej na̱mo̱ldio̱smej. Inochi iná̱n nia nikmakati Jehová.
Iwá̱n Eliseo kijlij:
—Xiye̱ꞌyawi ipan moojwi.
Iwá̱n Naamán yajki. Eꞌ kua̱ꞌ aya wejka ya̱ya, Giezi yej imo̱nsoj Eliseo, kijtoj pan iya̱lmaj: “Noje̱fej kikne̱lij Naamán. ¿Te iga a̱n ayá̱ꞌ kikuiꞌ yej kimakaya Naamán? Nej nia niktalo̱chti̱ti iga nej mane̱makaka̱n yej kimakayaj Eliseo iga yéj ayá̱ꞌ kineꞌ kikuiꞌ.”
Iwá̱n Giezi kitalo̱chtij Naamán. Kua̱ꞌ Naamán kitaꞌ iga itepotztaj motalojtiwi̱ꞌ Giezi, kiketzaltij ikuacarre̱taj iwá̱n kitajtan:
—¿Te̱ tikte̱mowa?
Iwá̱n Giezi kijtoj:
—Até̱ nikte̱mowa. Noje̱fej ne̱ti̱tan iga manimitzijli̱ki iga yéguinoꞌ asikej o̱me chokomej yej profe̱tajmej, wa̱lkej ipan tepe̱yoj. Iná̱n mitztajtaniliá iga xikmaka tres mil tomi̱n de plata iwá̱n o̱me sota̱ntzótzol.
Naamán kijlij:
—Xikui, nigaj onoꞌ seis mil tomi̱n de plata iwá̱n iní̱n o̱me sota̱ntzótzol.
inewi yej kimakakej iwá̱n yajki ki̱ya̱nato icha̱n. Iwá̱n kalakito ka̱n onoꞌ Eliseo, iwá̱n Eliseo kitajtan:
—¿Ka̱n tinemiá Giezi?
Iwá̱n yéj kijtoj:
—Note̱ko, nej akanaj nemi nia.
Iwá̱n Eliseo kijlij:
—Dios ne̱ne̱xtilij kua̱ꞌ temoj inó̱n ta̱gaꞌ ipan ikuacarre̱taj iga mitzkaguiꞌ. Aye̱kti yej tikchij. Inó̱n iga ile̱praj Naamán yawi mitzasiti tej iwá̱n mopilowa̱n iwá̱n ipilówa̱mpa mopilowa̱n, iwá̱n nike̱man ayá̱ꞌ anyawij ampajtitij.
Kua̱ꞌ ki̱saꞌ Giezi iyi̱xtaj Eliseo, isempan kipo̱po̱loj lepra yej kipiaya Naamán.