Resumen del AT 89

Jonás cholowa

Jonás 1

ToTe̱ko Dios kitekimáꞌ Jonás yej ipiltzi̱n Amitai iwá̱n kijlij: 2 “Xaj sémiya weyi‑a̱ltepe̱ꞌ Nínive, xikijli̱ti iga yej kichijtokej yej aye̱kti, ásiꞌya este no‑i̱xtaj.”

3 Eꞌ Jonás kikuiꞌ seꞌ ojti iga choloj iyi̱xtaj Dios, yajki a̱ltepe̱ꞌ Jope iga yawi a̱ltepe̱ꞌ Tarsis ka̱nkiꞌ pox wejkay onos iga Dios. Iwá̱n ompa onoya se̱ weyi á̱ka̱l yej yawi Tarsis, iwá̱n kixtaj iga wel mayawi iwá̱n yej nemij pan á̱ka̱l. 4 Eꞌ kua̱ꞌ nemi yawi tajkoláma̱r, Dios kichij iga mawi̱ki tiawa̱ꞌ iwá̱n ejekaꞌ yej pox tajpalej iwá̱n yej ompa ya̱yaj kijtowa̱yaj iga yáwiya ta̱tapa̱niti á̱ka̱l. 5 Iwá̱n yej kinentiáj á̱ka̱l poxsan momajtijkej iwá̱n kino̱tzkej idio̱smej iga makipale̱wi̱ka̱n iga amo maa̱poliwika̱n, iwá̱n no̱ kitajtajkalkej yej kiwi̱gayaj iga maajkatiá weyi á̱ka̱l. Mie̱j Jonás yajki má̱j ta‑ijtiꞌ ipan á̱ka̱l iga kochito. 6 Iwá̱n yej tatekimaka pan á̱ka̱l yajki ka̱n kochtoꞌ Jonás, iwá̱n kijlij:

—¿Té̱ tikchijtoꞌ nigaj? ¿Kén wel tikochtos? Ximoketza iwá̱n xikno̱tza moDio̱s, anka yéj wel te‑ikne̱li̱j iwá̱n ayá̱ꞌ timikiskej.

7 Iwá̱n mo‑ijlijkej sejsé̱ de yejeme̱n:

—Xinejnemika̱n iwá̱n matikchi̱waka̱n ka̱n mane̱si a̱ꞌyéj itechko iga wa̱laj iní̱n yej nemi te‑ikno̱chi̱wa.

Iwá̱n ijkó̱n kichijkej iwá̱n ompa ne̱siꞌ iga itechko Jonás. 8 Iwá̱n yejeme̱n kijlijkej:

—Iná̱n xine‑ijli̱ka̱n ken iga wa̱laj iní̱n nochi yej aye̱kti. ¿Té̱ moteki? ¿Ka̱n tiwi̱ꞌ? ¿Katiapa móta̱l? ¿Té̱ ito̱ka̱ꞌ moa̱ltepe̱ꞌ?

9 Yéj kijtoj:

—Nej nihebreo^a wa̱n noDio̱s Jehová, Dios yej kichij i̱tzti, láma̱r wa̱n ta̱jli.

10 Iwá̱n Jonás mote̱nxiton iga nemi cholowa iyi̱xtaj Dios. Iwá̱n kua̱ꞌ kikakikej yej kijtoj Jonás, yej nemij ipan á̱ka̱l poxsan majmawikej, iwá̱n kijlijkej:

—¿Te iga inó̱n tikchij? 11 ¿Iná̱n té̱ manimitzchi̱wili̱ka̱n iga mapachiwi láma̱r iga poxsan pa̱palakachijtoꞌ?

12 Iwá̱n Jonás kijtoj:

—Xine̱mo̱taka̱n lama̱rijtiꞌ, iwá̱n láma̱r yawi pachiwiti. Nej nikmati iga nej notechko wa̱laj iní̱n ejekaꞌ yej pox tajpalej.

13 Eꞌ ino̱mej yej tekipanowaj ipan á̱ka̱l pejkej iga a̱ma̱nelojkej iga inewi itajpalmej iga kinekiáj makitecho̱ka̱n a̱tate̱n, eꞌ ayá̱ꞌ wel asikej ipan a̱te̱n iga ma̱jya mopa̱palakachowa̱ya láma̱r. 14 Iwá̱n yejeme̱n kite̱ne̱wijkej toTe̱ko, kijtojkej: “Nimitztajtaniliáj tej Jehová iga amo manimikika̱n no̱ iga niawij nikmiktitij iní̱n ta̱gaꞌ. Siga iní̱n ta̱gaꞌ akichij yej aye̱kti, amo maasi noyakapamej tejté̱ yej aye̱kti, iga tej tikchi̱wa ken tej tikneki.”

15 Iwá̱n kimo̱takej Jonás ipan láma̱r iwá̱n láma̱r pachiwiꞌ iga poxsan mopa̱palakachojtoya. 16 Iwá̱n yej ompa ya̱yaj ki̱xmatikej Dios iga yej kichij iwá̱n kimiktilijkej se̱ yo̱lka̱ꞌ, iwá̱n kijtojkej iga yawij kiweyimati̱lti̱tij nochipa.

17 Iwá̱n Jehová ompa kipiaya se̱ weyito̱pojwé̱j yej kimelaꞌtoloj Jonás iwá̱n Jonás onoya e̱yi día iwá̱n e̱yi yówal iyijtiko weyito̱pojwé̱j.