Dios kiwi̱ga Elías ipan cielo
2 Reyes 2:1‑18
87
Kua̱ꞌ Dios kiwi̱gaꞌ Elías ipan cielo, Eliseo ompa no̱ nemiá. Nemi ki̱sayaj ipan a̱ltepe̱ꞌ yej ito̱ka̱ꞌ Gilgal kua̱ꞌ Elías kijlij Eliseo:—Nigaj xika̱wi iga Dios ne̱ti̱tani Betel.
Eꞌ Eliseo kijtoj:
—Iyi̱xtaj Dios iwá̱n tej mo‑i̱xtaj, nimitzijliá iga nia̱ti mowa̱n.
Iwá̱n yajkij Betel, iwá̱n iprofe̱tajmej Dios yej icha̱mej Betel, ki̱skej iga ki‑o̱mema̱wi̱toj Elías wa̱n Eliseo. Iwá̱n profe̱tajmej kijlijkej Eliseo:
—¿Ix tikmati iga Dios a̱man yáwiya kiwi̱gati momae̱stroj?
Eliseo kijtoj:
—Kena, nikmati, eꞌ amo xikijto̱ka̱n nité̱.
Iwá̱n Elías sej kijtoj:
—Eliseo, nígajoꞌ xika̱wi iná̱n, iga Dios ne̱ti̱tani Jericó.
Eꞌ yéj kijtoj:
—Nia mowa̱n.
Ijkó̱n iga senyajkij Jericó, iwá̱n Dios iprofe̱tajmej yej icha̱mej Jericó, kijlijkej Eliseo:
—¿Ix tikmati iga Dios yáwiya kiwi̱gati momae̱stroj?
Yéj kijtoj:
—Kena, nikmati; eꞌ amo xikijto̱ka̱n nité̱.
Elías kijlij Eliseo:
—Nimitztekiꞌijliá iga xika̱wi nigaj iga Dios ne̱ti̱tani iga maniá we̱ya̱ꞌ Jordán.
Iwá̱n Eliseo kijtoj:
—Nia mowa̱n.
Iwá̱n yajkij iyo̱mextimej, iwá̱n yajki no̱ ino̱mej cincuenta profe̱tajmej, kitokatiajkij. Kua̱ꞌ asikej a̱te̱noj moketzkej, iwá̱n ino̱mej profe̱tajmej wéjkasan moketzkej. Iwá̱n ompa Elías kikuiꞌ itzótzol, iwá̱n kikolochoj iwá̱n íga kiwi̱teꞌ a̱ꞌti. Iwá̱n a̱ꞌti moyojyokatij, iwá̱n ijkó̱n iga iyo̱mextimej panojkej ka̱n tawa̱ktoꞌ.
Kua̱ꞌ onóyaja a̱sentápal, Elías kijlij Eliseo:
—Xine̱tajtanili yej tikneki manikchi̱wa iga tej mie̱j aya ne̱wi̱ga Dios, iga tia tika̱witi mose̱lti.
Eliseo kijlij:
—Nimitztajtaniliá iga manimochi̱wa profeta ijkó̱n kensan tej, iga Dios no̱ mane̱tajto̱lmaka iwá̱n manikchi̱wa kensan tej.
Iwá̱n Elías kijtoj:
—Tine̱tajtanilij yej awel nimitzmaka, eꞌ siga tine‑itas kua̱ꞌ Dios ne̱wi̱gas, tikmatis iga Dios mitzmaꞌya inó̱n yej tiktajtan. Eꞌ siga ayá̱ꞌ tine‑itas, ayá̱ꞌ tia tikpiati inó̱n yej tiktajtan.
Iwá̱n mie̱j ta̱tapojtia̱yaj we̱jki̱sako se̱ carreta de tiwelo̱n iwá̱n kawa̱yojmej no̱ de tiwelo̱n, panoj itza̱la̱n Eliseo iwá̱n Elías. Iwá̱n Elías yajki ipan cielo ipan se̱ ajkamalakaꞌ. Iwá̱n kua̱ꞌ iní̱n kitaꞌ Eliseo tzájtziꞌpa iga kijtoj:
—Nomae̱stroj, ¡tej má̱j tikpale̱wij Israel que inochi solda̱dojmej yej kinentiáj carre̱tajmej yej kitila̱naj kawa̱yojmej!
Iwá̱n Eliseo mokno̱matiꞌ iwá̱n nike̱man ayꞌya kitaꞌ Elías.
Eliseo kikuiꞌ tzótzol yej iga mokechtejkuiyaya Elías yej kixi̱nij, iwá̱n Eliseo kitechoj we̱ya̱ꞌ Jordán, kiwi̱teꞌ iga tzótzol iwá̱n kijtoj:
—Jehová, xine̱pale̱wi ijkó̱n kensan tikpale̱wij Elías.
Kua̱ꞌ inó̱n kichij, moyojyokatij a̱ꞌti iwá̱n ijkó̱n iga wel panoj Eliseo. Iwá̱n profe̱tajmej yej kitztoyaj ken iga kichij, kijtojkej:
—¡Eliseo no̱ya kipiá poxsan poder kensan Elías!
Iwá̱n yajkij ki̱xna̱mikitoj in Eliseo iwá̱n mokua̱to̱lojkej iyi̱xtaj, iwá̱n kijlikej:
—Eliseo, nigaj nonokej iga manimitzpale̱wi̱ka̱n. Nij nemij nowa̱mej cincuenta yej amajmawij iga maya̱ka̱n makite̱mo̱tij momae̱stroj. Anka iyEspí̱ritoj Dios kajkoꞌ iwá̱n anka kanaj kika̱wato ipan tepe̱yoj o kanaj ipan planada.
Eꞌ yéj kijtoj:
—Ayꞌya xa̱ka̱n xikte̱mo̱tij.
Eꞌ yejemej ma̱jsan kitejtekiꞌijlijkej, este que kijtoj:
—Xá̱ka̱nwaꞌ xikte̱mo̱tij.
Iwá̱n ino̱mej profe̱tajmej kiti̱tankej cincuenta tajta̱gaꞌ iga kite̱mojtinemiáj Elías e̱yi día; eꞌ ayá̱ꞌ kasikej.
Kua̱ꞌ yajkij sej Jericó ka̱n Eliseo ka̱wiꞌ, Eliseo kijtoj:
—Nimitzijlijkej iga amo xa̱ka̱n iga aya̱ꞌsan ankasiskej.