Salomón kichi̱wa itio̱pan Dios, iwá̱n iya̱lmaj kikui seꞌ ojti yej ayéj iyojwi Dios
1 Reyes 5:5‑6:38; 7:13‑51; 8:1‑6, 10‑11, 65‑66; 11:1‑13
82
Kua̱ꞌ Salomón onoya iga rey, íkua̱ꞌya pe̱waꞌ iga kichi̱wa seꞌ tio̱pan. Kuetaxtio̱pan yej onoyay, chijtoya iga kuetax iwá̱n kuawiꞌ, eꞌ iná̱n kichi̱waj se̱ weyitio̱pan de teꞌti iwá̱n de kuawiꞌ. Iga iní̱n kichij Salomón kino̱tzaꞌ miles de tajta̱gaꞌ de seꞌ nacio̱mej iga matekipano̱ka̱n. No̱ tati̱tan iga kino̱tzaꞌ treinta mil israeli̱tajmej, de ini̱mej kikuikej más de tres mil iga kimanda̱rowa̱yaj yej tekipanowaj.Kiwi̱guilijkej siete años iga kiye̱kawi̱ltijkej inó̱n tio̱pan iwá̱n ta‑ijtikpa ka̱ltijkej iga oro. Ijko̱nsan ken chijtoya seꞌ kuetaxtio̱pan, ijko̱nsan no̱ yej móchijoꞌ tio̱pan; no̱ inó̱n tio̱pan tajkotzaktoya iga se̱ tzótzol, iwá̱n ta‑ijtiꞌ kajakijkej nochi yej ompa moneki kensan kipiaya yej áchtopa kuetaxtio̱pan.
Kua̱ꞌ ye̱káwiꞌya weyitio̱pan, Salomón kinechkoj nochi israeli̱tajmej iga kilwichi̱lijkej weyitio̱pan iwá̱n kiti̱tan sacerdo̱tejmej iga makikuitij iya̱rcaj Dios yej onoya ka̱n kuetaxtio̱pan. Kua̱ꞌ kiwajligákeja iwá̱n kakijkej tio̱pan‑ijtiꞌ yej móchijoꞌ, iní̱n weyitio̱pan te̱miꞌ iga mixti yej ta̱wiá, sacerdo̱tejmej ki̱skej iga akijyo̱wijkej ipode̱r Dios.
Iwá̱n kitakui̱kilijkej Dios iga kiweyimati̱ltijkej. Salomón kitajtanilij Dios iga makicuida̱ro inó̱n weyitio̱pan yej móchijoꞌ. Iwá̱n sacerdo̱tejmej kitatijkej miles de borre̱gojmej iwá̱n to̱rojmej iga ofrenda iga Dios. Inochimej pa̱ktoyaj iga Dios kipale̱wijkej iga kiye̱kawi̱ltijkej inó̱n weyitio̱pan iwá̱n iga kipiayaj se̱ rey yej taye̱ꞌgoberna̱rowa.
Rey Salomón kipiáꞌ miaꞌ isiwa̱ꞌ de sejséꞌ pai̱smej yej ayá̱ꞌ kicre̱dojtoyaj Dios, iwá̱n kua̱ꞌ we̱wejtiꞌ, ino̱mej isiwa̱mej kichi̱waltijkej iga makiweyimati̱lti idio̱smej yejeme̱n iwá̱n iga inó̱n kichij Salomón kikajtej yej melaꞌDio̱s. No̱ kichij itio̱pamej idio̱smej isiwa̱mej; iga iní̱n, Dios kuesiwiꞌ iwá̱n Salomón, iwá̱n kijlij:
—Iga atikchij ken timotajto̱ltijkej iwá̱n ayá̱ꞌ tikchij ken nimitztekimáꞌ, ayꞌya má̱j tikmanda̱ro̱j noge̱ntej, iwá̱n mopiltzi̱n ayá̱ꞌ yawi manda̱ro̱ti ken tej timanda̱rowa̱ya. Eꞌ iní̱n ayá̱ꞌ nikchi̱was kua̱ꞌ tónogoꞌ iga nikpoxnekiá motaj David. Ijkó̱n, kua̱ꞌ timikis, mopiltzi̱n mochi̱was rey, eꞌ yáwisan kimanda̱ro̱ti o̱me tribu: Judá iwá̱n Benjamín; seꞌ diez tribu kipiatij seꞌ rey.