Salomón taye̱ꞌjuzga̱rowa iga kitajtanilij Dios
1 Reyes 3:5‑14, 16‑22, 24‑28
81
Kua̱ꞌ Salomón ónoꞌya iga rey, se̱ día kite̱miꞌ iga Dios ki̱xne̱xtilij iwá̱n kijlij:—Xiktajtani inochi yej tiknekis iwá̱n nia nimitzmakati.
Iwá̱n Salomón kijlij Dios:
—NoDio̱s, nej mosie̱rvoj iwá̱n tine̱ta̱lij iga manimochi̱wa rey ka̱n manda̱rojtoya notaj David, iwá̱n nichokótzi̱noꞌ iwá̱n aya nikmati te̱ nikchi̱wa. Nej nikmanda̱rojtoꞌ moge̱ntej yej tiktapejpen. Nimitztajtaniliá iga xine̱pale̱wi iga manikmati kén manikye̱ꞌgoberna̱ro moge̱ntej iwá̱n manikmati katiapa yej ye̱kti iwá̱n katiapa yej aye̱kti.
Dios kiye̱ꞌitaꞌ Salomón iga iní̱n kitajtan, iwá̱n kijlij:
—Iga iní̱n tiktajtan, iwá̱n ayá̱ꞌ tiktajtan iga miaꞌ año xono, niga xikpoxpiá tomi̱n, iwá̱n ma̱jwaꞌ tiktajtan ken iga xikye̱ꞌgoberna̱ro iní̱n gente; nej nimitzijliá iga nimitzmaꞌya yej tine̱tajtanilij. Nimitzmaꞌya se̱ moa̱lmaj yej ye̱ꞌtajla̱ntoꞌ iwá̱n wel tiktapejpenas katiapa yej ye̱kti iwá̱n yej aye̱kti, ateyiꞌ seꞌ ken tej, niga onos seꞌ ken tej. Iwá̱n no̱ nikchi̱was yej ayá̱ꞌ tine̱tajtanilij: tikpoxpiás tomi̱n iwá̱n mitzweyimati̱lti̱skej. Ateyis nisé̱ rey ken tej pan inewi movi̱daj.
Iní̱n yej Salomón kikáꞌ kua̱ꞌ te̱miktoya.
Iwá̱n ayá̱ꞌ wejkatiꞌ yajki ite̱noj el rey o̱me siwa̱tkej yej najna̱mo̱lnemij. Iyo̱mextimej kinawajtia̱yaj ixo̱lo̱mej; se̱ de inó̱n siwa̱ꞌ ichoochi̱n isatoꞌ iwá̱n seꞌ siwa̱ꞌ ichoochi̱n míktoꞌya.
Iwá̱n se̱ de inó̱n siwa̱ꞌ kijtoj:
—¡Ay norre̱y!, nej iwá̱n iní̱n siwa̱ꞌ nonoyaj ipansan se̱ kajli, ayagaj má̱j, nejéme̱nsan no̱memej. Iwá̱n nej nikitaꞌ se̱ nopiltzi̱n. Panoj e̱yi día, yéj no̱ kitaꞌ se̱ ichoochi̱n. Se̱ yówal ipiltzi̱n iní̱n siwa̱ꞌ miguiꞌ iga kikochpitzkoj. Iwá̱n yéj moketzaꞌ mie̱j nej nikochtoꞌ, ne̱kui̱lij nopiltzi̱n iwá̱n kite̱gaꞌ ka̱n yéj kochi, iwá̱n ipiltzi̱n yej míktoꞌya kita̱lij note̱noj. Kua̱ꞌ nimoketzaꞌ yowaltiꞌ iga nikchi̱chitiá nopiltzi̱n, nikitaꞌ iga miktoꞌ. Eꞌ kua̱ꞌ nikye̱ꞌitaꞌ niki̱xmatiꞌ iga ayéj nopiltzi̱n.
Iwá̱n seꞌ siwa̱ꞌ kijtoj:
—Ayéj ijkó̱n. ¡Nopiltzi̱n yej isatoꞌ, tej mopiltzi̱n yej miktoꞌ!
Iwá̱n seꞌ kijtoj:
—¡Ayá̱ꞌ! ¡Mopiltzi̱n yej miktoꞌ, nopiltzi̱n yej isatoꞌ!
Iwá̱n ijkó̱n mose̱se̱pan‑ijlijtoyaj iyi̱xtaj el rey. Iwá̱n el rey kijlij se̱ isolda̱doj:
—Kuajligaka̱n se̱ machete iwá̱n xiktajkotekika̱n choochi̱n yej isatoꞌ; xikmakaka̱n tájkol se̱ siwa̱ꞌ, iwá̱n seꞌ tájkol xikmakaka̱n seꞌ siwa̱ꞌ.
Iwá̱n siwa̱ꞌ yej mela̱ꞌiye̱ꞌ inó̱n choochi̱n yej isatoꞌ, como kipoxnekiá ipiltzi̱n, kijlij el rey:
—¡Amo xiktajkotekika̱n!, xikmakaka̱n nopiltzi̱n iní̱n siwa̱ꞌ, eꞌ amo xikmikti̱ka̱n.
Iwá̱n seꞌ kijtoj:
—Xiktajkotekika̱n, ijkó̱n ayá̱ꞌ ka̱wis niga wa̱n nej niga iwá̱n yéj.
Iwá̱n el rey kitekimáꞌ isolda̱doj:
—Xikmaka ichoochi̱n inó̱n siwa̱ꞌ yej ayá̱ꞌ kineki mamotajkoteki, iga inó̱n nokta iye̱ꞌ.
Iwá̱n siwa̱ꞌ pa̱ktiájkiya iga kiwi̱gay ipiltzi̱n.
Kua̱ꞌ israeli̱tajmej kimatikej ken iga tajuzga̱roj el rey, pe̱waꞌ iga kiweyimati̱ltijkej iga kitakej iga Dios kimáꞌ ken iga mataye̱ꞌjuzga̱ro.