Manda̱rowa David
2 Samuel 5:3‑4, 10; 7:16; 8:1‑14; 11:1‑5, 14‑21, 27‑12:14
79
Kua̱ꞌ míguiꞌya Saúl, la gente kita̱lij David iga mamochi̱wa rey. David kipiaya treinta año kua̱ꞌ pe̱waꞌ manda̱roj, iwá̱n manda̱roj cuarenta años. Dios kipoxye̱ꞌchij David iga kichi̱waya nochi yej Dios kijtowa̱ya. Se̱ ve̱j Dios ijkí̱n kijlij David:—Se̱ de mopilowa̱n ipilówa̱mpa yawi manda̱ro̱ti nochipa, iwá̱n kimanda̱ro̱j noge̱ntej yej niktapejpen.
Dios kipale̱wij David, ijkó̱n iga kita̱nilij re̱ymej iga kikui̱lij ino̱mej ta̱jli yej Dios kijlij iyikyapatajwa̱n iga yawi kimakati. Iwá̱n ka̱nsan ya̱ya David, Dios ki‑o̱mema̱wia̱ya.
Se̱ ve̱j kua̱ꞌ isolda̱dojmej David yajkij momijmikti̱toj iwá̱n ipilówa̱mpa Amón yej kijliáj amoni̱tajmej, David ka̱wiꞌ Jerusalén; iwá̱n se̱ día kua̱ꞌ ne̱nejnentoya ipan ipala̱cioj, kitaꞌ se̱ mo̱nsajsiwa̱ꞌ yej ito̱ka̱ꞌ Betsabé, yej isiwa̱ꞌ Urías, se̱ de isolda̱dójmejpa David yej nentinemiá ka̱n momijmiktilo. David kitaꞌ iga inó̱n siwa̱ꞌ pox mo̱nsajtiꞌ iwá̱n ke̱le̱wij. Iwá̱n tati̱tan iga makikui̱li̱tij in inó̱n siwa̱ꞌ, iwá̱n masiꞌ íwa̱n. Iwá̱n inó̱n siwa̱ꞌ yajki sej icha̱n, eꞌ xo̱lo̱yówiꞌya. Iwá̱n kimati̱ltij David. Kua̱ꞌ David kimatiꞌ iga kixo̱lo̱yó̱tija Betsabé, kitekimáꞌ icapitán iga kua̱ꞌ pé̱wasya momijmiktilo makitapano̱lti̱ka̱n Urías ka̱nsan makimikti̱ka̱n.
Kua̱ꞌ David kimatiꞌ iga Urías miꞌya, kikuiꞌ Betsabé iga isiwa̱ꞌ, iwá̱n má̱j má̱j Betsabé kitaꞌ se̱ ichoochi̱n. Eꞌ Dios ayá̱ꞌ kiye̱ꞌitaꞌ iga David ijkó̱n kichij, inó̱n iga Dios kiti̱tan Natán yej profetaa iga matajto iwá̱n David. Kua̱ꞌ Natán asiꞌ ite̱noj David ijkí̱n kijlij:
—Onoya o̱me ta̱gaꞌ ipan se̱ weyi‑a̱ltepe̱ꞌ, se̱ poxsan motapialia̱ya iwá̱n seꞌ ayá̱ꞌ motapialia̱ya. Inó̱n yej motapialia̱ya, kipiaya miaꞌ borre̱gojmej iwá̱n va̱cajmej, eꞌ yej ayá̱ꞌ motapialia̱ya kipiáyasan se̱ siwa̱borre̱gojtzi̱n yej kikowaꞌ iwá̱n yéj kiskaltij. Inó̱n siwa̱borre̱gojtzi̱n moskaltij ite̱noj ite̱ko iwá̱n ipilowa̱n, kipiaya ken tikita isiwa̱piltzi̱n. Se̱ día wa̱laj se̱ paxa̱lowa̱ni cha̱n ta̱gaꞌ yej motapialia̱ya, eꞌ iní̱n ta̱gaꞌ ayá̱ꞌ kineꞌ makimikti yej yéjpa iborre̱goj, niga iva̱caj iga makikualti ipaxa̱lowa̱ni yej wa̱laj ícha̱n, ma̱jwaꞌ kikui̱lij isiwa̱borre̱gojtzi̱n ta̱gaꞌ yej ayá̱ꞌ motapialia̱ya iga kitamáꞌ ipaxa̱lowa̱ni.
Kua̱ꞌ iní̱n kikáꞌ David, poxsan kuesiwiꞌ iwá̱n kijlij Natán:
—Yej ijkó̱n kichij mamomíktiya nokta, iwá̱n makipaga̱ro cuatro veces inó̱n borre̱gojtzi̱n, iga ayá̱ꞌ kikne̱lij inó̱n yej ayá̱ꞌ motapialiá.
Iwá̱n Natán kijlij David:
—Tejwaꞌ in inó̱n ta̱gaꞌ, iwá̱n ijkí̱n mitzijliá toDio̱s: “Nej nimitzta̱lij iga rey ipan iní̱n país, iwá̱n nimitzma̱nawij iga amo mamitzmikti Saúl. Tej timotapialiá, tikpiá miaꞌ mosiwa̱ꞌ. ¿Te iga ayá̱ꞌ tine̱tajto̱lkuiꞌ iga tikchij yej aye̱kti malej iga tikmatitoꞌ iga nejwaꞌ nimitzitztoꞌ? Tikmiktij Urías, iwá̱n tiksiwa̱kui̱lij, inó̱n iga nia nimitzikno̱chi̱wati, iwá̱n ipiltzi̱n Betsabé yawi mikiti.” Iní̱n yej mitzijlij Dios.
Iwá̱n David kijlij Natán:
—Nikchij yej aye̱kti iyi̱xtaj Dios.
Iwá̱n Natán kijtoj:
—Dios mitze̱lka̱wilij yej tikchij yej aye̱kti, iwá̱n ayá̱ꞌ timikis. Eꞌ como tikofende̱roj poxsan Dios, mopiltzi̱n yej nacé̱rojoꞌ yawi mikiti.