Saúl pox majmawi iga Dios kikájteja
1 Samuel 28:3‑19; 31:1‑7
78
Ino̱mej día solda̱dojmej yej filisteojmej monechkojkej iga yawij momijmikti̱tij iwá̱n israeli̱tajmej. Kua̱ꞌ Saúl kitaꞌ iga komati nemij solda̱dojmej yej filisteójmejpa, poxsan majmawiꞌ. Kineꞌ matajto iwá̱n Dios, eꞌ Dios ayꞌya kino̱tzaꞌ. Iwá̱n kineꞌ matajtoj iwá̱n Samuel, yej iprofe̱taj katka Dios, eꞌ íkua̱ꞌwaꞌ Samuel míguiꞌya.Malej iga Saúl ompa ipan Israel kikijki̱xtij yej motamatiliáj, eꞌ ka̱wíkajoꞌ sekin, iwá̱n Saúl tati̱tan iga mamote̱mo̱ti ino̱mej yej motamatiliáj, iga kinekiá matajto iwá̱n Samuel. Tati̱tanimej kimati̱ltijkej iga ipan se̱ a̱ltepe̱ꞌ yej ito̱ka̱ꞌ Endor onoya se̱ siwa̱ꞌ yej motamatiliá. Ijkó̱n iga Saúl iwá̱n o̱me ta̱gaꞌ yajkij. Kipatakej itzotzolmej iga amo maki̱xmatika̱n iwá̱n yajkij tayowaka̱n kitatoj inó̱n siwa̱ꞌ iwá̱n Saúl kijtoj:
—Nikneki manitajto iwá̱n Samuel.
Iwá̱n inó̱n siwa̱ꞌ yej motamatiliá kino̱tzilij iya̱lmaj Samuel, iwá̱n kua̱ꞌ kitaꞌ iga ómpaya wi̱ꞌ, siwa̱ꞌ momajtij iwá̱n tzajtziꞌ iga kijlij Saúl:
—¿Te iga tine̱kajkayaj? ¡Mataj tejwaꞌ el rey Saúl!
Iwá̱n el rey Saúl kijtoj:
—Amo ximajmawi. ¿Xine‑ijli te̱ tikitaꞌ?
Iwá̱n siwa̱ꞌ kijtoj:
—Nemi wi̱ꞌ se̱ totajwe̱wej, tejkuixtiwi̱ꞌ iga itzótzol.
Saúl kimatiꞌ iga ino̱nwaꞌ Samuel, iwá̱n kijlij Samuel:
—Pox nimoyo̱lmiktijtoꞌ iga filisteojmej ne̱mijmikti̱jnekij, iwá̱n Dios nekájteja iwá̱n ayꞌya ne̱no̱tza. Inó̱n iga nimitzno̱tzaꞌ, iga xine‑ijli te̱ nikchi̱was.
Iwá̱n Samuel kijtoj:
—Dios mitzsemaꞌya iga ayá̱ꞌ tikchij kua̱ꞌ mitzijlij iga xikmikti inochi amaleci̱tajmej. Mo̱sta filisteojmej yawij mitzmikti̱tij tej iwá̱n mopilowa̱n, iwá̱n Davidya sej mochi̱was rey.
Kua̱ꞌ tane̱siꞌ, filisteojmej momijmiktijkej iwá̱n israeli̱tajmej, iwá̱n kimiktijkej Jonatán iwá̱n seꞌ o̱me ipilowa̱n Saúl. Némiya kipolojtia̱yaj ige̱ntej Saúl, iwá̱n yej kinentia̱yaj tawijto̱lmej kitechojkej. Iwá̱n Saúl kikuiꞌ yej yejpa iyespa̱daj iwá̱n motekualtij iyakapan wa̱n miꞌ. Kua̱ꞌ israeli̱tajmej kitakej iga Saúl iwá̱n ipilowa̱n mikíkeja, cholojkej iwá̱n ompa kikajtejkej iya̱ltepe̱mej, iwá̱n filisteojmej wa̱lkej iwá̱n ompay mocha̱ntijkej ipan ino̱mej a̱ltepe̱mej.