Saúl yajki yej áchtopa rey iga israeli̱tajmej
1 Samuel 8:1‑9; 9:15‑16; 10:1; 11:15; 15:1‑16, 22‑26, 32‑33; 16
75
Kua̱ꞌ Samuel wé̱weja, kita̱lij iyo̱mexti ipilowa̱n iga jue̱zmej iga mamanda̱ro̱ka̱n ipan país Israel, eꞌ yejemej ayá̱ꞌ taye̱ꞌjuzga̱rojkej ken kichi̱waya itaj, sino que kitajtaniajpa tomi̱n ka̱nsan agaj makichi̱wili̱ka̱n justicia. Inó̱n iga we̱wetkej de Israel kijli̱toj Samuel:—Tej tiwé̱weja iwá̱n mopilowa̱n ayá̱ꞌ taye̱ꞌjuzga̱rowaj ken tej tikchi̱waya. Nejemej niknekij se̱ rey yej mane̱manda̱ro̱ka̱n ken sekin pai̱smej kipiáj sejsé̱ irre̱ymej. Xiktapejpena se̱ ta̱gaꞌ iga mane̱manda̱ro̱ka̱n.
Samuel ayá̱ꞌ kiye̱ꞌitaꞌ yej kijlijkej. Iwá̱n Samuel tajtoj wa̱n Dios, iwá̱n Dios kijlij:
—Xikchi̱wa kensan mitzijliá la gente, iga ayéj tej mitzkajte̱waj sino que nej, iga ayá̱ꞌ kinekij iga manikmanda̱ro̱ka̱n.
Iwá̱n Dios kine̱xtilij Samuel a̱ꞌyéj kitapejpen iga mamochi̱wa rey, iwá̱n kijlij:
—Mo̱sta ken iná̱n, wi̱ꞌ se̱ ta̱gaꞌ yej ipilówa̱mpa Benjamín mitzno̱tzaki. Iní̱n ta̱gaꞌ xikua̱pa̱tzo iga aceite iga xik‑ungi̱roa iga mamochi̱wa rey ipan Israel, yéj yawi kima̱nawi̱ti israeli̱tajmej iga ayoꞌ makimanda̱rojtoka̱n filisteojmej.
Seꞌya día, wa̱laj se̱ ta̱gaꞌ yej ito̱ka̱ꞌ Saúl yej ipiltzi̱n Cis, tajto̱ko iwá̱n Samuel. Iwá̱n Dios kijlij Samuel:
—Iní̱n ta̱gaꞌ yej nimitzijlij yej yawi kimanda̱ro̱ti Israel.
Iwá̱n Samuel kikuiꞌ se̱ ja̱rrojtzi̱n yej kipiá aceite iwá̱n kitoya̱wilij ipan itzontekon Saúl iga ki‑ungi̱roj iga mane̱si iga yéj kitapejpen Dios iga mamochi̱wa rey ipan Israel.
Se̱ día Samuel kijlij Saúl:
—Ijkí̱n kijtowa Dios: “Nej nia nikikno̱chi̱wati amaleci̱tajmejb iga ki‑ojtzakuilijkej israeli̱tajmej kua̱ꞌ ki̱skej Egipto kua̱ꞌ nemi ya̱yaj Canaán. Xaj iwá̱n xikmijmikti amaleci̱tajmej: tajta̱gaꞌ, siwa̱tkej iwá̱n ko̱kone̱ꞌ, xikmikti no̱ ito̱rojmej, iborre̱gojmej, icame̱llojmej iwá̱n ibu̱rrojmej.”
Iwá̱n Saúl kinechkoj doscientos diez mil tajta̱gaꞌ, iwá̱n yajkij kimikti̱toj inochi amaleci̱tajmej iga espada, eꞌ ayá̱ꞌ kimiktijkej Agag, irre̱y amaleci̱tajmej, iwá̱n no̱ kiwajligakej borre̱gojmej yej má̱j tojtomaktiꞌ iwá̱n to̱rojmej yej tojtomaktiꞌ iga akimiktijkej.
Eꞌ Dios kijlij Samuel yej Saúl kichij. Iwá̱n Samuel yajki kite̱moto Saúl ipan ojti iwá̱n Saúl kijtoj:
—Yej Dios ne̱tekimáꞌ iga manikchi̱wa, níkchija.
Samuel kitajtan:
—Siga tíkchija yej Dios mitztekimáꞌ, ¿te ígataj nikaktoꞌ tzajtzitokej borre̱gojmej, iwá̱n to̱rojmej?
Iwá̱n Saúl kijtoj:
—Solda̱dojmej kiwajligakej yej katka itatkimej amaleci̱tajmej. Kiwajligakej borre̱gojmej yej má̱j tojtomaktiꞌ iwá̱n to̱rojmej yej má̱j tojtomaktiꞌ iga kimakaskej ofrenda toDio̱s, eꞌ nochi yej ka̱wiꞌ nikmiktijkej.
Samuel kijlij:
—Tej, ¿kén tikita?, ¿katiapa a̱n má̱j kiye̱ꞌita Dios, regalo o iga mamochi̱wa ken yéj kijtowa? Xikaki yej nia nimitzijli̱ti: Dios má̱j kiye̱ꞌita yej kichi̱wa ken yéj kijtowa, que rega̱lojmej. Eꞌ siga ayá̱ꞌ tikchi̱waj ken yéj kijtowa, tikchi̱waj yej aye̱kti kensan yej moconsulta̱rowa iwá̱n yej motamatiliá. Iwá̱n se̱ yej ayá̱ꞌ kineki kichi̱wa ken Dios kijtowa, kichi̱wa yej aye̱kti kensan yej kiweyimati̱ltiá ídolo. Iná̱n iga tej ayá̱ꞌ tikchij ken kijtoj Dios, yéj no̱ mitzkajtej iga ayoꞌ xono rey.
Iwá̱n Saúl kijlij Samuel:
—Nikchij yej aye̱kti iga nikmajmawilij noge̱ntej. Inó̱n iga nikchij ken kijtowa la gente iwá̱n ayá̱ꞌ nikchij ken Dios ne‑ijlij.
Samuel kijlij:
—A̱man Dios mitzki̱xtij iga tirre̱y ipan Israel iwá̱n seꞌya kimáꞌ iga mamochi̱wa rey yej má̱j wel que tej. Xine̱wajliguili el rey de Amalec.
Iwá̱n Samuel kichij ken Dios kineꞌ iwá̱n kimiktij Agag, irre̱y amaleci̱tajmej.
Má̱j má̱j, Dios kijlij Samuel a̱ꞌyéj yawi mochi̱wati irre̱y israeli̱tajmej ken onoya Saúl. Kijlij iga yawi ka̱witi iga rey, se̱ de ipilowa̱n Isaí, se̱ ta̱gaꞌ yej cha̱ntitoꞌ Belén. Inó̱n iga Samuel yajki Belén iga kitato Isaí.
Isaí kipiaya ocho ipilowa̱n iwá̱n kua̱ꞌ Samuel kitaꞌ yej te̱ko̱ko, kijtoj anka ino̱nya yej Dios kitapejpen iga mamochi̱wa rey, iga wejkapan iwá̱n ye̱ꞌne̱siá.
Eꞌ Dios kijlij Samuel:
—Amo xiktachi̱li ken iga ye̱ꞌne̱si, niga iwejkapanka, iga ayéj yéj, yej niktapejpen. Nej ayá̱ꞌ nikita yej amejeme̱n ankitaj, iga amejeme̱n ankitaj yej onoꞌ amo‑i̱xtaj, nej niktachi̱liá iya̱lmaj.
Isaí sejsé̱ sejsé̱ kino̱tztiajki siete ipilowa̱n, eꞌ Dios ayá̱ꞌ kitapejpen nisé̱ de yejemej. Iwá̱n Samuel kitajtan Isaí:
—¿Ayꞌya tikpiá seꞌ mopiltzi̱n?
Isaí kijtoj:
—Políwisan yej má̱j te̱tzo̱yo̱ꞌ, yej kicuidarojtoꞌ borre̱gojmej.
Samuel kijlij:
—Xiktati̱tanili iga mawi̱ki.
Kua̱ꞌ asiꞌ chokotzi̱n, Samuel kitaꞌ iga ye̱ꞌne̱siá, iwá̱n Dios kine̱xtilij iga ino̱nya yej kitapejpen. Iwá̱n Samuel kikua̱pa̱tzoj iga aceite iga ki‑ungi̱roj in inó̱n chokotzi̱n yej ito̱ka̱ꞌ David, iwá̱n nochípaya onoya iyEspí̱ritoj Dios iwá̱n David. Eꞌ como Saúl manda̱rojtóyaoꞌ Israel, David aya manda̱rowa̱ya.
Iga Saúl ayá̱ꞌ kichij ken kijtowa Dios, iyEspí̱ritoj Dios kikajtej. Iwá̱n Dios kiti̱tanilij se̱ ma̱lespí̱ritoj iga makikno̱chi̱wa. Iwá̱n Saúl tati̱tan iga makiwi̱guili̱ka̱n agaj yej wel kitzotzona arpac iga maye̱ꞌono, iga ina̱wati̱lka arpa kipale̱wiá iga wel maono tamelá̱. Iwá̱n como David pox wel kitzotzonaya arpa, inó̱n iga kino̱tzkej cha̱n el rey. Saúl aya kimatiá iga Dios kitapéjpenya David iga mamochi̱wa rey ipan israeli̱tajmej. David kitzotzonaya arpa ite̱noj el rey, iwá̱n kua̱ꞌ el rey kikajté̱waya inó̱n ma̱lespí̱ritoj, David ya̱ya sej icha̱n iga kicuida̱rowa itaj iborre̱gojmej.