Samuel kita̱liáj iga juez
1 Samuel 3:19‑4:4, 10‑18; 5:1‑4, 6, 11‑12; 6:10‑13; 7:2‑13
74
Samuel weyáꞌ, iwá̱n Dios onoya íwa̱n, iwá̱n no̱ya̱n ipan Israel kimatiáj iga Samuel imelaꞌprofe̱taj Dios yej nochipa kichi̱wa ken kineki Dios.Íkua̱ꞌ israeli̱tajmej ki̱skej iga momijmikti̱toj wa̱n filisteojmej, iwá̱n kipolojkej, mikikej ken cuatro mil israeli̱tajmej. Iwá̱n totajwe̱wetkej de Israel kijtojkej iga mamowi̱ga no̱ iya̱rcaja Dios ka̱n momijmiktilo, eꞌ Dios ayá̱ꞌ kipale̱wij israeli̱tajmej. Filisteojmej kikuikej inó̱n arca yej kipiaya o̱me teꞌti ka̱n Dios kijkuiloj iley, iwá̱n kimiktijkej israeli̱tajmej iwá̱n sekin israeli̱tajmej cholojkej. Filisteojmej no̱ kimiktijkej iyo̱mexti ipilowa̱n Elí.
Iwá̱n se̱ ta̱gaꞌ motalojtiajki iga kimatilti̱to Elí yej mochij ka̱n momijmiktilo̱ꞌ. Inó̱n yej tamati̱lti̱to kijtoj:
—Nonochimej nicholojkej iga nikmajmawilijkej filisteojmej iwá̱n miaꞌ yej de nejéme̱mpa mikikej. No̱ mikikej iyo̱mexti mopilowa̱n, iwá̱n iya̱rcaj Dios no̱ kikuikej filisteojmej.
Kua̱ꞌ inó̱n ta̱gaꞌ kijtoj yej mochij iwá̱n iya̱rcaj Dios, Elí poxsan momajtij iwá̱n wetziꞌ, ajketztiajki, iwá̱n mokechposteꞌ. Inó̱n ve̱j kiwi̱gayay 98 años iwá̱n ayꞌ tachaya. Ijkó̱n iga Elí miꞌ. Onoya iga juez ipan iya̱ltepe̱ꞌ cuarenta años.
Kua̱ꞌ kikuíkeja iya̱rcaj Dios, filisteojmej kiwi̱gakej iya̱rcaj Dios ipan iya̱ltepe̱mej iwá̱n kakijkej ipan itio̱pamej, kita̱lkej ite̱noj idio̱smej yej ito̱ka̱ꞌ Dagón.
Kua̱ꞌ tane̱siꞌ, filisteojmej kasitoj Dagón, yej idió̱smejpa wétztoꞌya ta̱lpan ite̱noj iya̱rcaj Dios. Iwá̱n kiketzkej Dagón iwá̱n kita̱lkej ka̱n sej onoya. Ipan seꞌya día, sej kasitoj Dagón wetztoꞌ ta̱lpan ite̱noj iya̱rcaj Dios, eꞌ iní̱n ve̱j, itzontekon iwá̱n ima̱mej po̱posteꞌ, ka̱wiꞌ petz icué̱rpojsan.
Wa̱laj no̱ ipan filisteojmej se̱ kokolis yej pox kualo iwá̱n miaꞌ mikikej. Inó̱n iga majmawikej iga ompa kipiayaj iya̱rcaj Dios, iwá̱n filisteojmej kijlijkej irre̱ymej iga makimaka̱n sej israeli̱tajmej inó̱n arca. Iwá̱n ino̱mej reyes kichijkej carreta. Kikuikej o̱me vaca yej tachi̱chitiaoꞌ, yej aya i̱ꞌ kita̱liliáj yugo iwá̱n kenyuga̱rojkej iga makitila̱na carreta. Iwá̱n ipilowa̱n ini̱mej va̱cajmej kitzakuakej kola̱lijtiꞌ. Iwá̱n kita̱lkej iya̱rcaj Dios ipan carreta, ite̱noj no̱ kita̱lkej regalo iga Dios, iwá̱n ki‑ojmakakej. Kinekiáj makitaka̱n siga ino̱mej va̱cajmej ya̱tij ka̱n me̱roj ita̱lmej israeli̱tajmej, ijkó̱n kimatiskej iga Dios yej ta‑ikno̱chijtoꞌ.
Iwá̱n ino̱mej va̱cajmej tzajtzitiajkij, yajkij ka̱n nokta ita̱lmej israeli̱tajmej. Filisteojmej yej manda̱rowaj kiwejkatokatiajkij inó̱n carreta. Ijkó̱n iga iya̱rcaj Dios asiꞌ sej ka̱n onokej israeli̱tajmej. Kua̱ꞌ israeli̱tajmej kitakej iya̱rcaj Dios pox pa̱kikej.
Filisteojmej inó̱n ve̱j manda̱rowa̱yaj ipan israeli̱tajmej kua̱ꞌ Samuel kita̱lkej iga juez. Panoj veinte años, iwá̱n inochi israeli̱tajmej mokno̱matiáj iga Dios kikajtéjkeja. Iwá̱n Samuel kijlij la gente:
—Xikojpacre̱doka̱n Jehová iga inewi amoa̱lmajmej; xiktajkalika̱n amo‑i̱dolojmej yej ankipiáj iwá̱n ayꞌ xikchi̱waka̱n yej aye̱kti. Xiktajtanili̱ka̱n Dios iga mamitze̱lka̱wili̱ka̱n yej ankichijkej yej aye̱kti. Ijkó̱n Jehová yawi mitzma̱nawi̱tij iga amo mamitzta̱nili̱ka̱n filisteojmej.
Iwá̱n israeli̱tajmej kitajkalkej iyi̱dolojmej iwá̱n sej kite̱ne̱wijkej Dios. Iwá̱n Samuel tatekimáꞌ iga israeli̱tajmej mamonechko̱ka̱n ipan se̱ a̱ltepe̱ꞌ yej ito̱ka̱ꞌ Mizpa, ompa mayuna̱rojkej inó̱n día iwá̱n kitajtanilijkej Dios iga make̱lka̱wili̱ka̱n yej aye̱kti kichijkej.
Kua̱ꞌ filisteojmej kimatikej iga israeli̱tajmej nechkatoyaj Mizpa, filisteojmej kijtojkej anka israeli̱tajmej monechkojkej iga kimikti̱jnekij yejemej. Inó̱n iga, mie̱j israeli̱tajmej ora̱dojtoyaj, filisteojmej asikej iga makimijmikti̱ka̱n israeli̱tajmej.
Iwá̱n Samuel kitatij se̱ borrego iga ofrenda iwá̱n kino̱tzaꞌ Dios, kitajtanilij iga makipale̱wi̱ka̱n. Iwá̱n mie̱j nemi kitatiá inó̱n borrego, tatikui̱niꞌ pox recio ite̱noj filisteojmej, iwá̱n poxsan momajtijkej iwá̱n sencholojkej. Ijkó̱n iga kipolojkej filisteojmej iga Dios kipale̱wij israeli̱tajmej.