Dios kino̱tza Samuel
1 Samuel 1:1‑2, 6‑11, 17‑20, 23‑24, 26‑28; 2:11; 3:1, 3‑18
73
Onoya se̱ ta̱gaꞌ yej ito̱ka̱ꞌ Elcana icha̱n ipan tepe̱yoj ka̱n cha̱ntitoyaj ipilowa̱n Efraín.a Iní̱n ta̱gaꞌ kipiaya o̱me isiwa̱ꞌ. De inó̱n o̱me isiwa̱mej, se̱ kitaya ixo̱lo̱ꞌ iwá̱n seꞌ ayá̱ꞌ kitaya. Yej akitaya ixo̱lo̱ꞌ ito̱ka̱ꞌ Ana. Yéj poxsan cho̱kaya iga seꞌ isiwa̱ꞌ Elcana kipi̱najtia̱ya iga makuejkuesiwi iwá̱n mamokno̱mati.Se̱ día Elcana iwá̱n iyo̱mexti isiwa̱ꞌ yajkij kuetaxtio̱pan iga kimakatoj ofrenda Dios. Elcana kijlij Ana:
—Ana ¿te iga ticho̱ka? iwá̱n ¿te iga atitakua? ¿Te iga timoyo̱lmiktiá? Malej iga xikpiá diez mopilowa̱n, ayá̱ꞌ mitznekiskej ken nej nimitzneki.
Eꞌ Ana yajki ise̱lti ora̱do̱to iwá̱n cho̱gaꞌ iyi̱xtaj Dios, kijlij:
—Dios, siga tine‑ikne̱liá, xikita iga nimokno̱mati iwá̱n xineejla̱miki iwá̱n xine̱maka se̱ nopiltzi̱n wa̱n nimitzmakas iga matekipano nochipa iga tej.
Ompa na̱ꞌ ikalte̱nyo tio̱pan onoya sacerdote yej ito̱ka̱ꞌ Elí. Elí kitachi̱lijtoya kua̱ꞌ Ana ora̱dojtoya, iwá̱n Elí kijtoj anka Ana ta̱wa̱n iga mote̱nyoyomotztoꞌ. Eꞌ Ana kijlij iga ayá̱ꞌ ta̱wa̱n, ijkó̱n ne̱si iga poxsan mokno̱mati iwá̱n nemi yo̱lki̱sa iyi̱xtaj Dios. Iwá̱n Elí kijlij:
—Nopiltzi̱n, xiye̱ꞌyawi, iwá̱n toDio̱s mamitzmaka yej tiktajtanilij.
Iwá̱n Ana yajki icha̱n, eꞌ ayꞌya mokno̱mati.
Dios kikáꞌ yej kitajtan Ana, iwá̱n má̱j má̱j, Ana kitaꞌ se̱ ipiltzi̱n yej kito̱kawij Samuel, iwá̱n kijtoj:
—Ijkó̱n yawi moto̱ka̱wi̱ti iga niktajtanilij Dios.b
Choochi̱n weyáꞌ iwá̱n kua̱ꞌ kika̱wáltija iga chi̱chi, iye̱ꞌ kiwi̱gaꞌ tio̱pan ka̱n onoꞌ sacerdote Elí. Iwá̱n Ana kijlij Elí:
—Nota̱taj, nej inó̱n siwa̱ꞌ yej ikya nigaj nikte̱ne̱wijtoya Dios. Niktajtantoya iga manikpiá iní̱n choochi̱n iwá̱n Dios ne̱máꞌ, inó̱n iga iná̱n nikmaka Dios iga matekipano nochipa iga yéj.
Iwá̱n Ana kimáꞌ gracias Dios.
Choochi̱n Samuel ka̱wiꞌ tio̱pan iwá̱n tekipanowa̱ya iga Dios, kipale̱wia̱ya el sacerdote Elí.
Miaꞌ año ateyito profetac ipan Israel iga makijto yej Dios kineki mamochi̱wa.
Se̱ yówal, mie̱j Samuel kochtoya tio̱pan, kikáꞌ itájto̱l Dios iga kino̱tzaꞌ, iwá̱n motalojtiajki ka̱n onoya Elí iwá̱n kijlij:
—Nigaj nonoꞌ. ¿Te iga tine̱no̱tzaꞌ?
Elí kijtoj:
—Nej ayá̱ꞌ nimitzno̱tzaꞌ. Xaj sej ximote̱kati.
Iwá̱n Samuel yajki sej mote̱kato. Iwá̱n Dios sej kino̱tzaꞌ, iwá̱n yéj moketzaꞌ, yajki ka̱n onoꞌ Elí wa̱n kijlij:
—Nigaj nonoꞌ. ¿Te iga tine̱no̱tzaꞌ?
Elí kijlij:
—Nopiltzi̱n, nej ayá̱ꞌ nimitzno̱tzaꞌ. Xaj sej ximote̱kati.
Como iní̱n achto ve̱joꞌ iga Dios kino̱tzaꞌ Samuel, inó̱n iga aya kitajto̱lkaguiꞌ siga Dios.
Iwá̱n Dios kino̱tzaꞌ sej, iga iní̱n e̱yi ve̱ja, iwá̱n Samuel moketzaꞌ sej, yajki ka̱n onoꞌ Elí wa̱n kijlij:
—Nigaj nonoꞌ. ¿Te iga tine̱no̱tzaꞌ?
Iwá̱n Elí kimatiꞌ iga Dio̱swaꞌ in yej nemi kino̱tza choochi̱n Samuel, wa̱n kijlij:
—Nopiltzi̱n, xaj ximote̱kati, iwá̱n siga sej mitzno̱tzas, xikijli: “Xitajto noTe̱ko, motekipanowa̱ni mitzkaki.”
Samuel yajki sej mote̱kato ka̱n kochi.
Iwá̱n panoj se̱ ra̱toj wa̱laj Dios, wa̱n kino̱tzaꞌ sej ken yeguimpa:
—¡Samuel! ¡Samuel!
Iwá̱n Samuel kijlij:
—Xitajto, motekipanowa̱ni mitzkaki.
Wa̱n Dios kijlij Samuel:
—Nikneki xikmati yej nia nikchi̱wati iyi̱xtaj la gente. Nia nikikno̱chi̱wati inochi ipilowa̱n Elí iga yejemej no̱ sacerdo̱tejmej, iwá̱n kichi̱waj yej aye̱kti, wa̱n Elí kimati, eꞌ ayá̱ꞌ kijliá iga amo makichi̱waka̱n.
Kua̱ꞌ tane̱siꞌ, Samuel moketzaꞌ iwá̱n kitajtapoj ikalte̱nyomej tio̱pan. Akinekiá makijli nité̱ in Elí yej Dios kijlij tayowaka̱n. Majmawiá. Ijkó̱n iga Elí kino̱tzaꞌ Samuel wa̱n kijlij:
—Nopiltzi̱n, ¿ix te̱ mitzijlij Dios? Nimitztajtaniliá iga amo xine‑i̱ya̱nili yej Dios mitzijlij.
Iwá̱n Samuel kijlij inochi, nisé̱ tájto̱l ayá̱ꞌ ki̱ya̱nilij, iwá̱n Elí kijtoj:
—ToTe̱ko makichi̱wa ken yéj kiye̱ꞌita.