Yej kichij Rut, se̱ siwa̱ꞌ yej ayéj de Israel
Rut 1:1‑2:23; 4:13‑17
72
Kua̱ꞌ jué̱zmejoꞌ manda̱rowa̱yaj, poxsan a̱pistajtiáꞌ ipan país de Israel. Inó̱n iga se̱ ta̱gaꞌ de Belén, yej onoꞌ ipan estado de Judá, yajki ipan país de Moab,a iyi̱ka̱mpa we̱ya̱ꞌ Jordán, inó̱n ta̱gaꞌ iwá̱n isiwa̱ꞌ iwá̱n o̱me ipilowa̱n. Inó̱n ta̱gaꞌ ito̱ka̱ꞌ Elimelec, isiwa̱ꞌ ito̱ka̱ꞌ Noemí, ipilowa̱n ito̱ka̱ꞌ Mahlón iwá̱n Quelión. Asikej ipan inó̱n país iwá̱n ompa ka̱wikej.Elimelec, yej Noemí iwé̱j, miguiꞌ, iwá̱n Noemí ka̱wiꞌ ise̱lti iwa̱nsan inó̱n o̱me ipilowa̱n, inó̱n o̱me ipilowa̱n siwa̱yowikej Moab. Yej achto ipiltzi̱n, isiwa̱ꞌ ito̱ka̱ꞌ Orfa, iwá̱n seꞌ ipiltzi̱n isiwa̱ꞌ ito̱ka̱ꞌ Rut. Ompa cha̱ntitoyaj ken diez años, iwá̱n má̱j má̱j Mahlón iwá̱n Quelión mikikej. Ijkó̱n Noemí ka̱wiꞌ ise̱lti iga mikíkeja ino̱mej o̱me ipilowa̱n iwá̱n iwé̱j.
Iwá̱n Noemí iwá̱n iyo̱mexti isiwa̱mon pe̱ꞌ iga ki̱saj ipan inó̱n país de Moab iga Noemí kimatiꞌ iga pánoja a̱pis ipan iya̱ltepe̱ꞌ. Ki̱skej iwá̱n iyo̱mexti isiwa̱mon ka̱n cha̱ntitoyaj, ojkuikej iga yawij sej Judá. Iwá̱n Noemí kijlij isiwa̱momej:
—Ximokuepaka̱n, xa̱ka̱n cha̱n amotaj iwá̱n Dios mamitzikne̱li̱ka̱n kensan no̱ kichij iwá̱n nopilowa̱n iwá̱n nej, iwá̱n xikasika̱n sejsé̱ de amejeme̱n seꞌ amowé̱j.
Kipipitzoj isiwa̱momej, iwá̱n siwa̱momej cho̱kakej, iwá̱n kijtojkej:
—Ayá̱ꞌ. Nejemej niknekij mania̱ka̱n mowa̱n ipan moa̱ltepe̱ꞌ.
Iwá̱n Noemí kijtoj:
—Xá̱ka̱nya cha̱n amotaj nopilowa̱n. ¿Te iga anya̱skej nowa̱n? Ayꞌya nikpiá má̱j nopilowa̱n iga mamochi̱waka̱n amowé̱j. Má̱j ye̱kti xá̱ka̱nya cha̱n amotaj.
Eꞌ yejemej ayá̱ꞌ tamatij iga cho̱kaj, iwá̱n Orfa kipipitzoj imona̱n wa̱n yajki cha̱n itaj, eꞌ Rut ka̱wiꞌ iwá̱n imona̱n.
Iwá̱n Noemí kijlij:
—Taꞌ xikita, mosiwa̱mon‑ikni̱n yájkiya sej ícha̱n, ka̱n onoꞌ idio̱smej. ¿Te iga ayá̱ꞌ tiaya no̱ ipan moa̱ltepe̱ꞌ?
Iwá̱n Rut kijtoj:
—Amo xine̱tejtekiꞌkuepalti iga matimoka̱kajte̱waka̱n, iga ka̱nsan tia̱j, nia̱ti no̱, iwá̱n ka̱n timocha̱nti̱j, ompa no̱ nimocha̱nti̱j. Moa̱ltepe̱ꞌ mochi̱was no̱ noa̱ltepe̱ꞌ, iwá̱n moDio̱s no̱ mochi̱was noDio̱s.
Kua̱ꞌ Noemí kitaꞌ iga Rut kimelaꞌnekiá iga mayawi iwá̱n yéj, ayꞌya má̱j kijlij iga mayawi cha̱n itaj. Iwá̱n iyo̱mextimej yajkij Belén.
Se̱ ta̱gaꞌ cha̱ntitoya Belén ito̱ka̱ꞌ Booz yej iparié̱ntejpa Elimelec yej iwe̱jpa katka Noemí.
Kua̱ꞌ Noemí iwá̱n Rut asikej Belén, me̱roj kua̱ꞌ nemi pe̱wa moteki cebada. Se̱ día Rut yajki ka̱n nemi moteki cebada, ya̱ya itepotztaj tekipanowa̱nimej iwá̱n kipejpenaya mia̱waꞌ yej wetzi. Rut akimatiá iga ómpawaꞌ imi̱lpan Booz, iwá̱n kua̱ꞌ Booz kitaꞌ Rut, yajki ka̱n onoꞌ yej kimanda̱rowaj la gente iwá̱n kitajtan:
—¿A̱ꞌyéj in ine̱pa siwa̱ꞌ?
Iwá̱n inó̱n yej kimanda̱rowa tekipanowa̱nimej kijlij:
—Se̱ siwa̱ꞌ de Moab, yej isiwa̱mon Noemí.
Iwá̱n Booz yajki tajto̱to iwá̱n Rut iwá̱n kijlij:
—Wel tiwi̱ꞌ tikpejpenaki cebada nigaj, nochipa kua̱ꞌ tej tiknekis. Iwá̱n siga ti‑a̱taneki, xaj ka̱n onoꞌ a̱ko̱mimej iwá̱n xa̱ti ompa.
Rut motzontó̱ꞌ iyi̱xtaj Booz iwá̱n kijlij:
—¿Te iga tine̱ye̱ꞌita esi nej ayéj ni de nijpa?
Iwá̱n Booz kijlij:
—Nikmátiꞌya inochi yej tikchij, iga tikpoxcho̱kiliá momona̱n. Iwá̱n nikmatiꞌ no̱ iga tikmelaꞌcré̱doja Jehová yej noDio̱s.
Kua̱ꞌ Booz iwá̱n itekipanowa̱nimej takuajkej, no̱ kitamakej Rut. Kua̱ꞌ Rut tamiꞌ takuaj, moketzaꞌ iga ma̱joꞌ kipejpena cebada. Booz kijlij itekipanowa̱nimej:
—Amo te̱ xikijli̱ka̱n iní̱n siwa̱ꞌ, ma̱jwaꞌ xikyokatzejtzelo̱ka̱n in cebada iga xikxi̱xi̱ni̱ka̱n iga yéj makipejpena, iwá̱n amo xikajajwaka̱n iga inó̱n kipejpena.
Rut ma̱joꞌ kipejpen cebada imi̱lpan Booz este tio̱taꞌ, wa̱n yajki sej cha̱n imona̱n. Kua̱ꞌ Noemí kitalij ke̱ꞌ kipejpen, kijlij:
—¿Ka̱n titekipanoj yeguin? ¿Ka̱n tikpejpen este achó̱n cebada? Dios makiye̱ꞌita inó̱n yej mitzpale̱wij.
Iwá̱n Rut kipowilij imona̱n ka̱n tekipanoj iwá̱n kijlij a̱ꞌyéj ite̱ko inó̱n mi̱jli.
Ijkó̱n iga Rut ma̱joꞌ kipejpen cebada iwá̱n ino̱mej siwa̱tkej yej itekipanowa̱nimej Booz, este que tamiꞌ moteguiꞌ cebada.
Má̱j má̱j Booz mona̱miktij iwá̱n Rut, iwá̱n Rut kitaꞌ se̱ ipiltzi̱n yej kitoka̱wijkej Obed. Iní̱n yajki itajwé̱j David.