Sansón iwá̱n Dalila
Jueces 16:4‑30
71
Má̱j má̱j, Sansón ke̱le̱wij seꞌ siwa̱ꞌ yej igé̱ntejpa filisteojmej yej ito̱ka̱ꞌ Dalila. Se̱ día, filisteojmej yej manda̱rowaj yajkij kitatoj Dalila iwá̱n kijlijkej:—Xikte̱mo ken wel xikyo̱lyama̱na Sansón iga mamitzijli kén kichi̱wa iga pox tajpalej iwá̱n kén iga wel manikta̱nili̱ka̱n, ijkó̱n wel nikilpi̱skej iwá̱n wel nikchi̱wiliáj ken nejeme̱n niknekij. Siga anne‑ijliáj, sejsé̱ de nejemej niawij nimitzmakatij mil cien tomi̱n de plata.
Iwá̱n se̱ día Dalila kijlij Sansón:
—Nimitztajtaniliá iga xine‑ijli kén nokta tikchi̱wa iga tipoxtajpalej iwá̱n kén iga wel mamitzilpi̱ka̱n iga amo wel xicholo.
Sansón kijtoj:
—Siga ne‑ilpiáj iga siete kuamekaꞌ yej xoxówigoꞌ, ijkó̱n ayꞌya nikpiás notájpal iwá̱n nimokuepas ken na̱mo̱lta̱gaꞌ.
Ijkó̱n iga filisteojmej kiwajliguilijkej Dalila siete xoxowiꞌkuamekaꞌ iga makilpi Sansón. Eꞌ achto Dalila ki̱ya̱n filisteojmej ompa kalijtiꞌ, iwá̱n kua̱ꞌ tamiꞌ kilpij, tzajtziꞌ:
—¡Sansón, filisteojmej yáwija mitzmikti̱tij!
Iwá̱n Sansón kiko̱koto̱n kuamekamej yej iga ilpitoya, ken tikita se̱ ipkaꞌ yej kikoto̱na tiꞌti, iwá̱n ayá̱ꞌ kine̱xtij ka̱n wi̱ꞌ itájpal.
Iwá̱n Dalila kijlij:
—Tine̱kajkayaj, ayéj ijkó̱n ken tine‑ijlij. Nimitztekiꞌtajtani, iga iná̱n xine‑ijli ken iga wel mamitzilpi̱ka̱n.
Sansón kijlij:
—Siga mane̱ye̱ꞌilpi̱ka̱n iga reata yej aya semi monentiá, ayꞌya nikpiás notájpal, nimokuepas ken na̱mo̱lta̱gaꞌ.
Iwá̱n Dalila kikuiꞌ reata yej aya semi monentiá iwá̱n kilpij iga inó̱n, iwá̱n kijlij:
—¡Sansón, yáwija mitzmikti̱tij filisteojmej!
Sansón sej kiko̱koto̱n ino̱mej reata ken tikita se̱ ipkaꞌ.
Iwá̱n Dalila kijlij Sansón:
—Tine̱kajkayaj sej, ayá̱ꞌ tine‑ijlij yej cierto. Iná̱n sí, xine̱nojma‑ijli ken iga wel mamitzilpi̱ka̱n.
Iwá̱n Sansón kijlij:
—Siga notzónkal xine̱chi̱wili siete tatzomílpi̱l yej ma‑ijkitito iwá̱n ipkaꞌ, iwá̱n xikye̱ꞌilpi ipan estaca, ijkó̱n ayꞌya nikpiás notájpal.
Dalila kichij ken kijlij Sansón, iwá̱n kitzajtzilij:
—¡Sansón, filisteojmej yáwija mitzmikti̱tij!
Eꞌ Sansón isaté̱ꞌ ka̱n kochtoya, kitila̱n itzontekon wa̱n wiwitaꞌ estaca ka̱n ilpitoya tajkíti̱l.
Iwá̱n Dalila kijtoj:
—¿Kén xine‑ijli iga tine̱neki? Tine̱kajkáyaja e̱yi ve̱j iwá̱n áyasan tine‑ijliá ken tikchi̱wa iga tipoxtajpalej.
Dalila ma̱jsan kitekiꞌtajtan este que kiyo̱lyama̱n, iwá̱n Sansón kijlij ken kichi̱wa iga pox tajpalej.
Iwá̱n Sansón kijtoj:
—Nej ayí̱ꞌ ne̱tzonki̱xtiáj, iga nej ne̱tapejpen Dios. Siga mane̱tzonki̱xti̱ka̱n, nikpolo̱j no̱ notájpal iwá̱n nimochi̱was ken na̱mo̱lta̱gaꞌ.
Kua̱ꞌ Dalila kimatiꞌ iga Sansón kíjtoja yej cierto, Dalila kitati̱tanilij ije̱fejmej filisteojmej iwá̱n kijlij:
—¡Xiwi̱tzeka̱n! Iná̱n sí Sansón ne‑íjlija ken kichi̱wa iga pox tajpalej.
Ije̱fejmej filisteojmej yajkij cha̱n Dalila, no̱ kiwi̱gakej tomi̱n iga kimakaskej Dalila.
Iwá̱n Dalila kikochtij Sansón ipan ipie̱rnaj. Iwá̱n kua̱ꞌ kóchiꞌya, kino̱tzaꞌ se̱ ta̱gaꞌ iga makitzonki̱xti. Iwá̱n Dalila tzajtzajtziꞌ:
—¡Sansón, filisteojmej yáwija mitzmikti̱tij!
Kua̱ꞌ Sansón isate̱waꞌ kijtoj:
—Iná̱n nia sej nimoma̱nawi̱ti ken nochipa nikchi̱wa.
Eꞌ ayá̱ꞌ kimatiá iga ayꞌya kipiaya ipode̱r Dios. Iwá̱n filisteojmej kiki̱tzkijkej Sansón iwá̱n kiji̱xki̱xtijkej iwá̱n kiwi̱gakej a̱ltepe̱ꞌ Gaza, ompa kilpijkej iga cadena ipan molino yej onoꞌ ca̱rcelijti iga makikue̱kuepa.a Ompa pe̱waꞌ iga wejweyáꞌ sej itzónkal.
Se̱ día ije̱fejmej filisteojmej monechkojkej ipan itio̱pamej iga kimakaj gracias Dagón yej idio̱smej, ilwichijkej iga kita̱nilijkej Sansón.
Iwá̱n kijtojkej:
—Xikuajligaka̱n Sansón iga mate‑ilwimati̱lti.
Sansón kiki̱xtijkej ipan cárcel iwá̱n kiwi̱gakej iyi̱xtaj filisteojmej iga makaja̱wilti̱ka̱n ken se̱ ajá̱wil, iwá̱n kiketzkej itajkoya̱n inó̱n o̱me itaketzalyomej tio̱pan. Iwá̱n Sansón kijlij inó̱n mo̱nsoj yej kiwila̱ntia̱ya:
—Xine̱na̱ꞌtecho̱lti̱ ka̱n onoꞌ itaketzalyomej tio̱pan iga ompa manimotetoni.
Ompa onoya tajta̱gaꞌ iwá̱n siwa̱tkej, iwá̱n no̱ onoya inochi yej manda̱rowaj. Ipan seꞌ piso yej ájkopa, onoya ken tres mil tajta̱gaꞌ, iwá̱n siwa̱tkej yej kitztoyaj ken iga kaja̱wiltia̱ya Sansón.
Iwá̱n Sansón kitajtanilij Dios iga makipale̱wi iwá̱n kijlij:
—NoTe̱ko, xineejla̱miki, iwá̱n xine̱maka notájpal ini̱nsan ve̱j. Nimitztekiꞌtajtaniliá, tej noDio̱s iga wel manimoma̱ti iga ne‑i̱xki̱xtijkej.
Iwá̱n Sansón kima̱te̱moj inó̱n o̱me wejweyi takétzal, iwá̱n motaki̱tzkij ipan ino̱mej takétzal, iwá̱n kijtoj:
—¡Mamikika̱n nowa̱n filisteojmej!
Iwá̱n kimáꞌ inochi itájpal iga kitopej inó̱n taketzalmej, iwá̱n wetziꞌ inó̱n tio̱pan iyakapamej ije̱fejmej filisteojmej iwá̱n iyakapamej inochi yej ompa onoyaj.
Mikikej má̱j miaꞌ filisteojmej kua̱ꞌ Sansón miguiꞌ iga kitepachojkej tio̱pan, que yej kimiktij ipan inewi ivi̱daj.
Antes iga filisteojmej makiki̱tzki̱ka̱n Sansón, yéj yajki juez iga manda̱rojtoya veinte años ipan Israel, iwá̱n kua̱ꞌ miguiꞌ iga kitepachoj tio̱pan, kito̱kkej ka̱n to̱ktoꞌ itaj yej ito̱ka̱ꞌ Manoa.