Sansón mone̱xtiá iga pox tajpalej
Jueces 14:20‑16:3
70
Imontaj Sansón kijtoj anka Sansón ayꞌya kineki isiwa̱ꞌ iwá̱n kina̱miktij iwá̱n seꞌ ta̱gaꞌ.Ayá̱ꞌ wejkatiꞌ, Sansón yajki kitato isiwa̱ꞌ. Eꞌ kua̱ꞌ asito kimatiꞌ iga isiwa̱ꞌ kitógaꞌya seꞌ ta̱gaꞌ. Sansón poxsan kuejkuesiwiꞌ iga kisiwa̱kui̱lijkej. Iwá̱n yajki kikitzki̱to trescientos koyo̱mej, iwá̱n kikuijkuitapi̱lilpij ojo̱memej, iwá̱n ipan cada o̱me koyo̱ꞌ ikuitápi̱l kilpij se̱ tálpi̱l wa̱ꞌsakaꞌ. Iwá̱n Sansón kitijtikuiltij wa̱ꞌsakaꞌ yej ijilpitoꞌ ipan ikuitapi̱lmej koyo̱mej iwá̱n kimajmajkaj ipan imi̱lmej filisteojmej. Ijkó̱n iga kitatij inochi tri̱gojyoj, iwá̱n miaꞌ u̱vajyoj,a iwá̱n oli̱vojyoj.b
Filisteojmej kimatikej iga Sansón inó̱n kichij, iga imontaj kikui̱lij isiwa̱ꞌ. Iwá̱n filisteojmej kitatijkej inó̱n yej katka isiwa̱ꞌ Sansón iwá̱n imontaj. Kua̱ꞌ Sansón kimatiꞌ iga kitatijkej yej katka isiwa̱ꞌ, Sansón yajki ka̱n onoꞌ filisteojmej, iwá̱n kimiktij miaꞌ filisteojmej, iwá̱n mi̱ya̱nato ipan se̱ texapowé̱j ipan íta̱l Judá. Iwá̱n filisteojmej yajkij Judá iga kiki̱tzki̱toj Sansón.
Tajta̱gaꞌ de Judá tatajtankej:
—¿Te iga anwa̱lkej iga xine̱mijmikti̱ka̱n?
Iwá̱n filisteojmej kijtojkej:
—Niwa̱lkej nikte̱mo̱koj Sansón, iga makixta̱wa inochi yej ne̱chi̱wilijkej.
Iwá̱n monechkoj tres mil tajta̱gaꞌ de Judá iwá̱n yajkij ka̱n onoꞌ texapowé̱j ka̱n miya̱ntoꞌ Sansón, iwá̱n kijlijkej Sansón:
—¿Ix ayá̱ꞌ tikmati iga filisteojmej te̱ta̱niliáj? ¿Te iga iní̱n anne̱chi̱wilijkej? Iná̱n niwa̱lkej nimitzkuikoj iga mamitzwi̱gaka̱n filisteojmej.
Iwá̱n Sansón kijtoj:
—Onoꞌ bien, eꞌ xine‑ijli̱ka̱n iga amejeme̱n ayá̱ꞌ anne̱mikti̱skej.
Tajta̱gaꞌ de Judá kijtojkej:
—Ayá̱ꞌ, ayá̱ꞌ nimitzmikti̱skej. Niáwijsan nimitzwi̱gatij ka̱n onoꞌ filisteojmej, eꞌ ayá̱ꞌ nimitzmikti̱skej.
Iwá̱n Sansón kilpijkej iga o̱me reata yej aya agaj kinentiá iwá̱n kiwi̱gakej ka̱n onoꞌ filisteojmej.
Kua̱ꞌ filisteojmej kitakej iga Sansón ilpitiwi̱ꞌ, filisteojmej ki̱xna̱mikitoj este wi̱wito̱nij iga pa̱kij. Iwá̱n iyEspí̱ritoj Dios asiꞌ ipan Sansón, iwá̱n Sansón kiko̱koto̱n reata, mochij ken tikita tzótzol yej tátaꞌya.
Iwá̱n kipejpen se̱ ikejtzon burro iwá̱n iga inó̱n kimiktij mil filisteojmej.
Iwá̱n Sansón poxsan a̱tanéꞌ, iwá̱n Sansón kijlij Dios:
—Dios, tej tine̱pale̱wij iga nej nikta̱nilij noenemi̱gojmej; ¿iná̱n tine̱semakas iga mani‑a̱taneꞌmiki iwá̱n mane̱mikti̱ka̱n yej ne‑ijiyaj?
Iwá̱n Dios kikoyo̱n se̱ xapoꞌ ipan se̱ teꞌti, iwá̱n ompa ki̱saꞌ a̱ꞌti. Sansón ompa konij a̱ꞌti, iwá̱n sej asiꞌ itájpal.
Se̱ día Sansón yajki Gaza, se̱ iya̱ltepe̱ꞌ filisteojmej. Ompa kitaꞌ se̱ siwa̱ꞌ yej najna̱mo̱lnemi iwá̱n kalaꞌ icha̱n iga kochiꞌ íwa̱n.
Kua̱ꞌ filisteojmej yej cha̱ntitokej Gaza kimatikej iga Sansón onoꞌ ipan inó̱n a̱ltepe̱ꞌ, kipi̱piakej. Inó̱n a̱ltepe̱ꞌ kola̱ltitoya, iwá̱n ipan ipue̱rtajyomej kipi̱piakej semilwiꞌ iga Sansón amo maki̱sa. Eꞌ kua̱ꞌ tayowatiꞌ yajkij kochitoj, puej yejemej kijtojkej, este matané̱si‑oꞌ kua̱ꞌ ísasya Sansón, yawij kimikti̱tij.
Eꞌ Sansón isaꞌ tajkoyówal iwá̱n kiwijwiwitaꞌ ipue̱rtajyomej inó̱n a̱ltepe̱ꞌ iwa̱nya iyo̱mexti itaketzalyomej, iwá̱n kikechpanoj, iwá̱n kika̱wato iyi̱xko se̱ tepe̱ꞌ yej onoꞌ iyi̱xtaj a̱ltepe̱ꞌ Hebrón. Ijkó̱n iga Sansón kine̱xtij iga yéj ayagaj wel kiki̱tzkiá.