Mona̱miktiá Sansón
Jueces 14:1‑19
69
Kua̱ꞌ Sansón chokótzi̱nya, ke̱le̱wij se̱ takotzi̱n yej igé̱ntejpa filisteojmej, iwá̱n kineꞌ mamona̱mikti íwa̱n. Sansón kimati̱ltij itaj iwá̱n iye̱ꞌ, eꞌ itaj iwá̱n iye̱ꞌ ayá̱ꞌ kinekiáj iga inó̱n takotzi̱n igé̱ntejpa filisteojmej yej akicre̱dowaj Dios iwá̱n kijiyaj israeli̱tajmej.Itaj iwá̱n iye̱ꞌ ayá̱ꞌ kimatiáj iga Dios kinekiá iga Sansón mamona̱mikti iwá̱n inó̱n takotzi̱n yej igé̱ntejpa filisteojmej, iga sanmakiyojyo̱lte̱mo̱ka̱n filisteojmej ka̱nsan makuesiwika̱n iwá̱n Sansón makimijmikti filisteojmej.
Eꞌ Sansón kinekiá mamona̱mikti iwá̱n inó̱n takotzi̱n, iwá̱n kiti̱tan itaj iga makijtanili̱tij.
Má̱j má̱j, kua̱ꞌ yajki kipaxa̱lowili̱to yej mochi̱was isiwa̱ꞌ, ipan ojti se̱ te̱kua̱ni kinekiá makikua Sansón. Iwá̱n iyEspí̱ritoj Dios asiꞌ pan Sansón, iwá̱n kita̱tajkotzaya̱n inó̱n te̱kua̱ni iga ima̱ꞌ, eꞌ ayá̱ꞌ kijlij itaj niga iye̱ꞌ yej kichij.
Panoj días, Sansón yajki sej ipan inó̱n ojti iga mona̱mikti̱to iwá̱n takotzi̱n, mie̱j nemi ya̱ya pan ojti, Sansón yajki kiyoka‑itato inó̱n te̱kua̱ni yej kimiktij. Ipan te̱kua̱ni kasito komati mi̱mia̱wamej iwá̱n nekti. Kikuiꞌ nekti iwá̱n ojkuiꞌ, kikuajtiajki inó̱n nekti. Kua̱ꞌ kitechoj itaj iwá̱n iye̱ꞌ, kimáꞌ no̱ iga makikua̱ka̱n inó̱n nekti, eꞌ ayá̱ꞌ kijlij iga inó̱n nekti kiki̱xtij ipan te̱kua̱ni.
Kua̱ꞌ itaj Sansón asiꞌ icha̱n takotzi̱n, Sansón ilwichij siete día, iga yejemej ijkó̱n kichi̱wayaj kua̱ꞌ mona̱miktilo. Itaj takotzi̱n kitati̱tanilij treinta iyami̱gojmej iga iwa̱mej ompa maonoka̱n, iwá̱n Sansón ijkí̱n kijlij ino̱mej:
—Taꞌ xine‑ijli̱ka̱n te̱ iteki in iní̱n adivinanza, ankipiáj siete día iga xine‑ijli̱ka̱n te̱ kijto̱jneki mie̱j nentoꞌ ilwiꞌ. Siga anne‑ijliáj, nia nimitzmakatij treinta sota̱ntzótzol, eꞌ siga awel anne‑ijliáj te̱ kijto̱jneki iní̱n yej nemi nimitztajtanij, amejemej anyawij anne̱makatij treinta sota̱ntzótzol.
Yejemej kijtojkej:
—Taꞌ xine‑ijlí̱ka̱nwaꞌ.
Iwá̱n Sansón kijtoj:
—Ipan yej te̱kua, ki̱saꞌ yej mokua, iwá̱n ipan yej tajpalej ki̱saꞌ yej tzope̱liꞌ.
Kua̱ꞌ yejemej kitakej iga awel kijtowaj te̱ kijto̱jneki, ijkí̱n kijlijkej isiwa̱ꞌ Sansón:
—Xikyo̱lyama̱na mowé̱j iga mamitzijli te̱ kijto̱jneki in inó̱n yej ne̱tajtankej, siga ayá̱ꞌ anne‑ijliáj, niawij nimitztati̱tij tej iwá̱n motaj íkal iga ne̱yokatati̱tanilijkej iga san mane̱kui̱li̱ka̱n yej nikpiáj.
Ijkó̱n isiwa̱ꞌ Sansón cho̱kaya ite̱noj Sansón iwá̱n kijlia̱ya:
—Tej tine‑ijiya, ayá̱ꞌ tine̱neki; iga ayá̱ꞌ tine‑ijliá te̱ kijto̱jneki inó̱n yej tiktajtan noge̱ntej.
Iwá̱n Sansón kijtoj:
—Niga notaj ni noye̱ꞌ ayá̱ꞌ nemi nikijliáj, ¿te iga nia nimitzijli̱ti tej?
Isiwa̱ꞌ Sansón cho̱katóyasan inewi inó̱n siete día kua̱ꞌ nentoya ilwiꞌ. Iwá̱n inó̱n día kua̱ꞌ ásiꞌya siete día, Sansón kijlij isiwa̱ꞌ te̱ kijto̱jneki inó̱n adivinanza iga ayoꞌ má̱j kijyo̱wij iga yeguin yeguin kitajtanij. Iwá̱n isiwa̱ꞌ Sansón, kua̱ꞌ kimátiꞌya te̱ kijto̱jneki inó̱n adivinanza, yajki kijli̱to ige̱ntej. Íkua̱ꞌsan, kua̱ꞌ aya kalaki to̱nati̱ꞌ, filisteojmej yajkij kijli̱toj Sansón:
—Yej má̱j tzope̱liꞌ ino̱nwaꞌ nekti, iwá̱n yej má̱j tajpalej ino̱nwaꞌ te̱kua̱ni.
Iwá̱n Sansón kijtoj:
—Siga ayá̱ꞌ ankitekimakayaj nosiwa̱ꞌ iga mane̱tajtani, ayá̱ꞌ ankimatiáj te̱ iteki in inó̱n yej nimitztajtanij.
Iwá̱n iyEspí̱ritoj Dios wa̱laj ipan Sansón, iwá̱n yajki ipan a̱ltepe̱ꞌ yej ito̱ka̱ꞌ Ascalón. Ompa Sansón kimiktij treinta filisteojmej iwá̱n kikui̱lij isota̱ntzotzolmej, iwá̱n kimáꞌ ino̱mej yej kijtojkej te̱ kijto̱jneki inó̱n adivinanza.
Kua̱ꞌ kimajmaꞌya isota̱ntzotzolmej ino̱mej, Sansón kikajtej isiwa̱ꞌ cha̱n imontaj, iwá̱n yajki cha̱n itaj. Pox kuejkuesitoya iga isiwa̱ꞌ kikajkayaj iga kijlij ige̱ntej te̱ kijto̱jneki inó̱n adivinanza, inó̱n iga kikajtej.