Dios kijtowa iga yawi onoti Sansón
Jueces 13:1‑24
68
Israeli̱tajmej ayá̱ꞌ kichijkej ken kiye̱ꞌita Dios iga kiweyimati̱ltijkej i̱dolojmej. Inó̱n iga Dios kichij iga filisteojmeja makimanda̱ro̱ka̱n israeli̱tajmej. Filisteojmej manda̱rojtoyaj cuarenta años.Inó̱n ve̱j onoya se̱ ta̱gaꞌ israelita yej itrí̱bujpa Dan, ito̱ka̱ꞌ Manoa. Isiwa̱ꞌ ayí̱ꞌ kitaya ipiltzi̱n. Se̱ día iní̱n siwa̱ꞌ ki̱xne̱xtilij se̱ iyá̱ngelb Dios, iwá̱n kijlij:
—Nej nikmati iga ayí̱ꞌ tikpiá mopiltzi̱n, eꞌ iná̱n tia tikpiati se̱. Inó̱n iga iná̱n amo xikoni vino, iwá̱n amo xikoni nité̱ yej tata̱wa̱ntiá, amo xikua yej Dios kijtowa iga amo mamokua.c Iwá̱n mopiltzi̱n yej tia tikpiati, ayá̱ꞌ tia tiktzonki̱xti̱ti, iga Dios kitapejpen iga makima̱nawi israeli̱tajmej ka̱n kimanda̱rojtokej filisteojmej.
Iní̱n siwa̱ꞌ kipowilij iwé̱j inochi yej iyá̱ngel Dios kijlij. Iwá̱n Manoa tajtoj wa̱n Dios iwá̱n kijlij:
—NoTe̱ko, nimitztajtaniliá iga inó̱n moá̱ngel yej tikti̱tanka, sej xikti̱tani iga mane̱ne̱xtili̱ka̱n te̱ niawij nikchi̱watij iwá̱n choochi̱n yej onos.
Dios kikaguiꞌ itájto̱l Manoa, iwá̱n iyá̱ngel Dios sej ki̱xne̱xtilij siwa̱ꞌ kua̱ꞌ nemiá mi̱lijtiꞌ, eꞌ iwé̱j ayá̱ꞌ ompa onoya. Iwá̱n inó̱n siwa̱ꞌ motalojtiajki iga kimati̱lti̱to iwé̱j, iwá̱n senyajkij ka̱n onoꞌ iyá̱ngel Dios. Manoa kitajtan:
—¿Ix tej in yej titajtoj yawi̱pta iwá̱n nosiwa̱ꞌ?
—Kena, nej —kijtoj iyá̱ngel Dios.
Iwá̱n Manoa kijtoj:
—Kua̱ꞌ mamochi̱wa ijkó̱n ken tikijtoj, ¿kén niawij nikiskalti̱tij inó̱n choochi̱n, iwá̱n te̱ niawij nikchi̱watij iwá̱n yéj?
Iwá̱n iyá̱ngel Dios kijlij:
—Mosiwa̱ꞌ makichi̱wa kensan nikijlij. Amo makoni vino iwá̱n nité̱ yej tata̱wa̱ntiá iwá̱n amo makikua yej Dios kijtowa iga amo mamokua. Makichi̱wa inochi yej nikijlij.
Iwá̱n Manoa kijlij iyá̱ngel Dios:
—Nimitzijliá iga xiká̱wi‑oꞌ iga matisentakua̱ka̱n. Nia nikmikti̱ti se̱ chi̱vojtzi̱nd iga matikua̱ka̱n.
Iwá̱n iyá̱ngel Dios kijtoj:
—Malej iga manika̱wi, nej awel nikua̱j motákual. Eꞌ siga tikneki, inó̱n chi̱vojtzi̱n xiktati iga ofrenda iga Dios.
Manoa ayá̱ꞌ kimatiá iga inó̱n yej íwa̱n ta̱tapojtoꞌ iyá̱ngel Dios, iga ne̱siá ken na̱mo̱lta̱gaꞌ.
Iwá̱n Manoa kijlij inó̱n ángel:
—Xine‑ijli̱ka̱n te̱ moto̱ka̱ꞌ, iga manimitzmakaka̱n gracias kua̱ꞌ mochí̱wasya ijkó̱n ken tikijtoj.
Iwá̱n inó̱n ángel kijtoj:
—¿Te iga tikmatisneki noto̱ka̱ꞌ? Noto̱ka̱ꞌ awel ankimatij iga awel ankentende̱ro̱skej.
Manoa kiki̱tzkij se̱ chi̱vojtzi̱n iwá̱n kitatij iyi̱xko se̱ tewé̱j iga kimáꞌ ofrenda iga Dios. Iwá̱n kua̱ꞌ inó̱n tiꞌti we̱welo̱niꞌ, iyá̱ngel Dios tejkaj ipan cielo ipan tiwelo̱n, iyi̱xtaj Manoa iwá̱n isiwa̱ꞌ. Iwá̱n yejemej motzonto̱kkej este asiꞌ ipan ta̱jli itzontekomej.
Íkua̱ꞌya Manoa kimatiꞌ iga iyá̱ngel Dios yej íwa̱n ta̱tapojtoya, iwá̱n kijlij isiwa̱ꞌ:
—Iná̱n sí tiawij timikitij iga tikitákeja Dios.
Isiwa̱ꞌ Manoa kijtoj:
—Siga Dios kinekiá iga mate̱mikti, ayá̱ꞌ te̱kui̱lia̱ya to‑ofre̱ndaj, iwá̱n ayá̱ꞌ te‑ijlia̱ya yej te‑ijlij.
Má̱j má̱j isiwa̱ꞌ Manoa kitaꞌ se̱ ipiltzi̱n iwá̱n kito̱ka̱wij Sansón. Iní̱n choochi̱n weyáꞌ, iwá̱n Dios kipoxpale̱wij.