Yej kichij Jefté
Jueces 11; 12:7
67
Onoya se̱ ta̱gaꞌ yej ito̱ka̱ꞌ Jefté, iní̱n ta̱gaꞌ ayá̱ꞌ majmawiá kua̱ꞌ ya̱ya ka̱n momijmiktilo, iwá̱n iye̱ꞌ najna̱mo̱lnemiá, iwá̱n itaj yajki se̱ israelita ito̱ka̱ꞌ Galaad. Galaad kipiáꞌ no̱ yej imelaꞌsiwa̱ꞌ yej kipiáꞌ no̱ ipilowa̱n, iwá̱n kua̱ꞌ ini̱mej yo̱lasiwikej, kiki̱xtijkej Jefté iwá̱n kijlijkej:—Tej ayá̱ꞌ tia tikuiti nité̱ yej tótajpa itatki iga tej seꞌ moye̱ꞌ.
Jefté kicholowilij iyikni̱wa̱n, iwá̱n yajki mocha̱nti̱to ipan ta̱jli yej ito̱ka̱ꞌ Tob iwá̱n ompa Jefté kinechkoj sekin tajta̱gaꞌ iga tachtekij.
Panoj se̱ tiempo, ipilówa̱mpa Amón yej kijliáj amoni̱tajmej ki‑o̱nkawijkej israeli̱tajmej. Kua̱ꞌ inó̱n kitakej totajwe̱wetkej yej kimanda̱rowa̱ya israeli̱tajmej, yajkij kitatoj Jefté ka̱n onoꞌ ipan ta̱jli yej ito̱ka̱ꞌ Tob, iwá̱n kijlijkej:
—Xiwi̱ki, niknekij tej ximochi̱wa annoje̱fejmej iga xikmijmikti amoni̱tajmej.
Eꞌ Jefté kijtoj:
—¿Ix ayejtaj amejeme̱n anne‑ijiyakej iwá̱n anne̱ki̱xtijkej cha̱n notaj? ¿Te iga iná̱n kua̱ꞌ mitzmijmikti̱jnekij anne̱te̱mókojoꞌ sej?
Iwá̱n totajwe̱wetkej kijtojkej:
—Inó̱n iga nimitzitakoj iga tej ximochi̱wa annoje̱fejmej.
Jefté kijtoj:
—Siga amejeme̱n ankinekij maniá manikmijmikti̱ti amoni̱tajmej iwá̱n siga Dios mane̱pale̱wi iga manikta̱nili, ¿ix nej nonos amoje̱fej?
Totajwe̱wetkej kijtojkej:
—Dios kikaktoꞌ, iga nikchi̱waskej ken tikijtoj.
Iwá̱n Jefté yajki iwá̱n totajwe̱wetkej. Después israeli̱tajmej kita̱lijkej Jefté iga mamanda̱ro pan yejemej.
Jefté kiti̱tan sekin yej yajkij kijli̱toj irre̱y amoni̱tajmej:
—¿Té̱ nimitzchi̱wilijkej iga anne̱mikti̱jnekij?
Iwá̱n irre̱y amoni̱tajmej ijkí̱n kijlij itati̱tanimej Jefté:
—Ijkó̱n ken amo‑ikyapatajwa̱n kikuikej nóta̱l kua̱ꞌ ki̱skej Egipto, iná̱n nikneki xine̱kuepili̱ka̱n tamelá̱.
Jefté sej ki‑ojpati̱tan yej makijli̱tij ijkí̱n irre̱y amoni̱tajmej:
—No‑ikyapatajwa̱n ayá̱ꞌ kiyokakuikej ita̱lmej moabi̱tajmej iwá̱n amota̱lmej, sino que kua̱ꞌ ki̱skej Egipto kipatilijkej Tata̱ꞌláma̱r iwá̱n nejnenkej ipan desierto, ijkó̱n iga asikej ipan a̱ltepe̱ꞌ yej ito̱ka̱ꞌ Cades. Iwá̱n kitati̱tanilijkej el rey de Edom iwá̱n ijkí̱n kijlijkej: “Nimitztajtaniliáj iga achi manipano̱ka̱n ipan móta̱l.” El rey de Edom ayá̱ꞌ kineꞌ.
’No̱ kiti̱tankej tati̱tanimej iwá̱n el rey Moab iwá̱n yéj no̱ ayá̱ꞌ kineꞌ mapano̱ka̱n. Inó̱n iga kiyawalojkej íta̱l Edom iwá̱n ita̱lmej moabi̱tajmej iwá̱n yajkij ipan desierto. Kua̱ꞌ asikej ka̱n íta̱l tokni̱mej yej kijliáj amorreos, ompa kitati̱tanilijkej irre̱y los amorreos yej ito̱ka̱ꞌ Sehón, iwá̱n kijlijkej: “Achi manipano̱ka̱n ipan amóta̱l iga manasika̱n ka̱n nota̱lmej.”
’Eꞌ Sehón modesconfia̱roj iwá̱n no‑ikyapatajwa̱n iwá̱n ayá̱ꞌ kineꞌ iga mapano̱ka̱n ipan íta̱l, sino que kinechkoj isolda̱dojmej iga kimijmiktiáj no‑ikyapatajwa̱n. Iwá̱n Dios kipale̱wij no‑ikyapatajwa̱n iga kita̱nilij rey Sehón iwá̱n inochi ige̱ntej. Amorreo kita̱nilijkej, iwá̱n ita̱lmej ka̱n cha̱ntitoyaj ka̱wiꞌ nochi iga nejemej yej niisraeli̱tajmej. Ijkó̱n iga Dios ne̱makakej ini̱mej ta̱jli, iwá̱n nikta̱nilia̱yaj inochi yej kinekiáj mane̱mijmikti̱ka̱n. ¿Iná̱n tikneki iga manimitzkuepili̱ka̱n yej Dios ne̱makakej? Siga modio̱s yej ito̱ka̱ꞌ Quemos, mitzmaka tejté̱, tikmátiya iga motatki. Pues ijko̱nsan no̱ nejemej; yej Dios ne̱makakej notatkímeja. Tej titapox‑ijiya; Balac, yej ikya katka rey de Moab má̱j katka te‑ijikni̱n que tej. Yéj ayí̱ꞌ mokuejkuesoj iwá̱n no‑ikyapatajwa̱n, niga ayá̱ꞌ momijmiktij iwá̱n yejemej.
’Kiwí̱gaya trescientos años iga nicha̱ntitokej ipan iní̱n ta̱jli, ¿te iga ayá̱ꞌ íkyasan ankitajtankej iní̱n ta̱jli? Nej ayá̱ꞌ te̱ nemi nimitzchi̱wiliáj. Tej yej tikchi̱wa yej aye̱kti iga anne̱mijmikti̱jnekij. NoDio̱s yej melaꞌjuez kimati iga ayá̱ꞌ nemi nitakajkaya̱wa.
Malej iga iní̱n kijlijkej, irre̱y amoni̱tajmej ayá̱ꞌ kitajto̱lkuiꞌ Jefté, sino que pe̱waꞌ tamijmiktiá. IyEspí̱ritoj Dios wa̱laj ipan Jefté iwá̱n yajki momijmikti̱toj iwá̱n amoni̱tajmej. Jefté ijkí̱n kijlij Dios:
—Siga tine̱pale̱wi̱j iga manikta̱nili amoni̱tajmej, nej nia nimitzmakati iga ofrenda se̱ yej achto yawi ne‑i̱xna̱mikiti kua̱ꞌ nimokuepas iga támiꞌya nimomijmiktijkej iwá̱n amoni̱tajmej.
Ijkó̱n iga Jefté wa̱n isolda̱dojmej yajkij momijmikti̱toj iwá̱n amoni̱tajmej iwá̱n Dios kipale̱wij iga kita̱nijkej. Kua̱ꞌ Jefté yájkiya icha̱n, se̱ ise̱lsiwa̱piltzi̱n yej kipiaya, yajki ki̱xna̱mikito iga Jefté akipiaya seꞌ ipiltzi̱n. Kua̱ꞌ kitaꞌ, Jefté kitzaya̱n itzótzol iga poxsan mokno̱matiꞌ iga ijkó̱n kipromete̱rowilij Dios. Iwá̱n Jefté kijlij isiwa̱piltzi̱n:
—¡Nosiwa̱piltzi̱n! Poxsan nimoyo̱lmiktijtoꞌ iga tej, iga Dios nikchi̱wilij se̱ promesa iwá̱n iná̱n nia nikchi̱wati.
Isiwa̱piltzi̱n kijtoj:
—Notaj siga tikchi̱wilij Dios inó̱n promesa, nowa̱n xikchi̱wa ken tikijlij, iga Dios kíchija yej tiktajtanilij, tikta̱nílija amoni̱tajmej yej mitzijiyaj.
Takotzi̱n ijkí̱n kijlij itaj:
—Eꞌ nimitztajtaniliá iga xine̱maka o̱me me̱j iga maniá ipan tepe̱yoj, manicho̱kati iwá̱n noami̱gajmej, iga nia nimikiti áyapa nimona̱miktiá.
—Kena, wel tia, —kijtoj itaj.
Iwá̱n takotzi̱n cho̱katinemiꞌ ipan tepe̱yoj iwá̱n iyami̱gajmej o̱me me̱j, iga ayá̱ꞌ kikajte̱was nisé̱ ipilowa̱n. Panoj o̱me me̱j, wa̱laj icha̱n, iwá̱n itaj kichij yej kijlij Dios.
Iwá̱n ijkó̱n kitekichi̱wayaj cada año, inochi takomej de Israel cho̱katinemij na̱wi días iga kejla̱mikij isiwa̱piltzi̱n Jefté. Jefté manda̱roj ipan país de Israel, seis años iwá̱n miguiꞌ.