Gedeón kita̱niliá madiani̱tajmej
Jueces 7:9‑25; 8:22‑23
66
Madiani̱tajmej iwá̱n amaleci̱tajmeja kiketzkej ikuetaxkajlimej ipan se̱ planada, iwá̱n Gedeón iwá̱n israeli̱tajmej wel kitayaj este ka̱n onoyaj, iga Gedeón onoyaj iyi̱xko tepe̱ꞌ.Inó̱n yówal Dios kijlij Gedeón:
—Ximoketza iwá̱n xaj ka̱n onoꞌ ikuetaxkajlimej madiani̱tajmej, iga níkchija iga xikta̱nili. Siga timajmawi iga tia mose̱lti, xaj iwá̱n momo̱nsoj yej ito̱ka̱ꞌ Fura. Xaj xikakiti yej madiani̱tajmej kijtowaj, iwá̱n yej tikakis kijto̱skej, mitzpale̱wi̱j iga tikta̱nili̱j ino̱mej.
Iwá̱n Gedeón yajki iwá̱n imo̱nsoj yej ito̱ka̱ꞌ Fura ka̱n onoꞌ ikuetaxkajlimej madiani̱tajmej.
Madiani̱tajmej iwá̱n amaleci̱tajmej, yej onoyaj ipan planada, ne̱siáj ken tikita chapulimej iga pox komatimej, iwá̱n icame̱llojmej pox miakejmej, onoyaj ken tikita xa̱jli yej onoꞌ lama̱rte̱noj.
Kua̱ꞌ ichtakaasikej ka̱n kipiáj ikuetaxkajlimej madiani̱tajmej, kikakikej iga se̱ ta̱gaꞌ kipowilijtoya iyikni̱n yej kite̱miꞌ, kijlijtoya:
—Nikte̱miꞌ iga se̱ pa̱n de cebada mimilijtiwa̱laj este ipan tokuetaxkajlimej, iwá̱n kua̱ꞌ motatzi̱nako ipan tokuetaxkajlimej, kiwejwetzi̱ltij.
Iwá̱n iyikni̱n kijtoj:
—Ino̱nwaꞌ ayéj te̱ má̱j, iyespa̱dajb Gedeón yej ipiltzi̱n Joás yej de Israel, yej iga yawi te̱mijmikti̱ti, Dios kíchija iga mate̱ta̱nili̱ka̱n.
Kua̱ꞌ Gedeón kikáꞌ yej kipojtoꞌ yej kite̱miꞌ inó̱n ta̱gaꞌ iwá̱n no̱ kikáꞌ te̱ kito̱jneki, kimá gracias Dios.
Iwá̱n yajki sej ka̱n onoꞌ ikuetaxkajlimej israeli̱tajmej, iwá̱n kijtoj:
—Ximoketzaka̱n iga Dios kíchija iga matikta̱nili̱ka̱n madiani̱tajmej.
Gedeón kichij e̱yi grupo de ino̱mej trescientos tajta̱gaꞌ de Israel iwá̱n sejsé̱ de yejemej kimáꞌ se̱ kua̱kua iwá̱n se̱ ko̱miꞌ iwá̱n se̱ okoꞌ xo̱tatiá iyijtiko inó̱n ko̱miꞌ, iwá̱n kijlijkej:
—Kua̱ꞌ nasis ka̱n onoꞌ ikuetaxkajlimej madiani̱tajmej, xikitaka̱n yej nikchi̱was iwá̱n no̱ xikchi̱waka̱n. Kua̱ꞌ nikpi̱tzaskej kua̱kua wa̱n ino̱mej yej íwa̱n ninemij, no̱ amejeme̱n xitapi̱tzaka̱n iwá̱n xikxa̱xama̱naka̱n ko̱mimej alrededor ikuetaxkajlimej iwá̱n xitzajtzika̱n: “¡Nimitzta̱nili̱skej iga iyespa̱daj Dios iwá̱n iga iyespa̱daj Gedeón!”
Ijkó̱n iga Gedeón iwá̱n ino̱mej cien tajta̱gaꞌ yej íwa̱n senya̱yaj, asikej ka̱n pe̱wa ikuetaxkajlimej madiani̱tajmej, inó̱n me̱roj hora kua̱ꞌ pe̱wa iga mopata yej tacuida̱rowa, yej kalaki tajkoyówal.
Kipi̱tzkej kua̱kuamej iwá̱n kixa̱xama̱nkej ko̱mimej yej kikijki̱tzkijtia̱yaj. Iwá̱n iye̱yixti grupo no̱ kipi̱tzkej kua̱kuamej iwá̱n kixa̱xama̱nkej ko̱mimej; kiki̱tzkijtia̱yaj okoꞌ iga iyo̱pochma̱mej iwá̱n iga iye̱ꞌma̱mej kiki̱tzkia̱yaj kua̱kua yej kipi̱tzayaj iwá̱n tzajtiáj:
—¡Nimitzta̱nili̱skej iga iyespa̱daj Dios iwá̱n iga iyespa̱daj Gedeón!
Israeli̱tajmej kiyawalojkej ikuetaxkajlimej madiani̱tajmej iwá̱n inochi madiani̱tajmej momajtijkej cholojkej iwá̱n tzajtzitiajkij mie̱j inó̱n trescientos israeli̱tajmej kipi̱tztóyajsan kua̱kuamej. Dios kichij iga sekin madiani̱tajmej mosejse̱panmiktijkej iwá̱n sekin cholojkej.
Israeli̱tajmej kitalo̱chtijkej yej cholojtia̱yaj, iwá̱n Gedeón tati̱tan iga makijli̱tij itri̱buj Efraín iwá̱n kijlijkej: “Xa̱ka̱n xikmijmikti̱tij madiani̱tajmej iwá̱n xikchatij kajká̱n wel a̱pano̱lo.” Iwá̱n nochi monechkojkej iga yawij tamijmikti̱tij; iwá̱n kiki̱tzkijkej o̱me jefe yej kimanda̱rowa solda̱dojmej de Madián iwá̱n kimiktijkej.
Iwá̱n israeli̱tajmej kijlijkej Gedeón:
—Niknekij iga tejya xine̱manda̱ro̱ka̱n, iwá̱n no̱ mopilowa̱n iwá̱n monie̱tojmej mane̱manda̱ro̱ka̱n, iga anne̱ma̱nawijkej iga ne̱mikti̱jnekiáj madiani̱tajmej.
Eꞌ Gedeón kijtoj:
—Niga nej, niga nopilowa̱n ayá̱ꞌ niawij nimitzmanda̱ro̱tij amejeme̱n, petz Dios yawi mochi̱wati amoTe̱ko.