Dios kipale̱wiá Gedeón iga kitapejpena isolda̱dojmej
Jueces 6:33–7:8
65
Má̱j má̱j solda̱dojmej de Madián iwá̱n amaleci̱tajmej,a monechkojkej ipan se̱ planada iga yawij momijmikti̱tij iwá̱n israeli̱tajmej. Iwá̱n iyEspí̱ritoj Dios wa̱laj ipan Gedeón, iwá̱n kua̱ꞌ tapi̱tzaꞌ iga ikua̱kua borrego, na̱wi tribu de Israel monechkoj iga yawij tamijmikti̱tij. Kua̱ꞌ nechkatókeja, Gedeón kijlij Dios:—Siga melá̱ꞌ iga tia tine̱pale̱wi̱ti iga manikma̱nawi noge̱ntej ijkó̱n ken tikijtoj, ijkí̱n nikneki mamochi̱wa: Nia nikta̱li̱ti ikuetaxyo borrego yej pox tzojmiyoj ka̱n mochijchi̱wa trigo, siga yowaltiꞌ nikitas ajwicha̱ꞌ wetziꞌ ipansan itzojmiyo iní̱n kuetax, iwá̱n ta̱jli yej ite̱noj kuetax mawa̱kto, ijkó̱n nikmatis iga tia tine̱pale̱wi̱ti iga manikma̱nawi noge̱ntej kensan tine‑ijlij.
Iwá̱n ijkó̱n mochij, yowaltiꞌ kua̱ꞌ Gedeón isaꞌ, kipa̱tzkaꞌ ikuetaxyo borrego, iwá̱n iga inó̱n ajwicha̱a̱yo̱ꞌ te̱miꞌ se̱ posi̱yoj.
Eꞌ Gedeón kijlij Dios:
—Amo xine̱kuesowili iga yej nia sej nimitzijli̱ti; iná̱n nikneki ijkí̱n mamochi̱wa iwá̱n iní̱n ikuetaxyo borrego. Nimitztekiꞌijliá iga iná̱n ikuetaxyo borrego mawa̱ktika̱wi, iwá̱n ajwicha̱ꞌ mawetzi ipan ta̱jli.
Inó̱n yówal Dios kichij ijkó̱n. Inó̱n kuetax wa̱ktoya, eꞌ ipan ta̱jli no̱ya̱n tapa̱tzijtoya. Kua̱ꞌ isakej yowaltiꞌ, Gedeón iwá̱n inochi yej onoyaj íwa̱n, senyajkij, iwá̱n ka̱wikej ite̱noj se̱ pozo, iwá̱n ikuetaxkajlimej madiani̱tajmej ka̱wiꞌ tani ipan planada. Iwá̱n Dios kijlij Gedeón:
—Pox miaꞌ gente wi̱ꞌ mowa̱n, siga nimitzpale̱wiáj iga xikta̱nili̱ka̱n madiani̱tajmej, anmoweyimatiskej iwá̱n ankijto̱skej: “Noga̱najmej nimoma̱nawijkej.” Inó̱n iga xikijli la gente: “Yej majmawij, wel mo̱sta maya̱ka̱n icha̱mej.”
Iwá̱n kua̱ꞌ tane̱siꞌ yajkij icha̱mej veintidos mil tajta̱gaꞌ, ka̱wíkejsan diez mil.
Iwá̱n Dios kijlij Gedeón:
—Pox komati ónogoꞌ moge̱ntej. Xikui̱gaka̱n a‑ijtiꞌ iwá̱n ompa yawi mone̱xti̱ti aja̱ꞌyéj ya̱ti mowa̱n. Yej nej manimitzijli: “Iní̱n ya̱ti mowa̱n”, inó̱n ya̱ti, eꞌ yej manimitzijli: “Iní̱n ayá̱ꞌ ya̱ti mowa̱n”, inó̱n amo mayawi.
Iwá̱n Gedeón kiwi̱gaꞌ tajta̱gaꞌ a‑ijtiꞌ iwá̱n Dios kijlij:
—Nochi ino̱mej yej ayá̱ꞌ motankua̱ketzáskejpa iga koni̱skej a̱ꞌti, sino que iga ima̱mej kikuiskej a̱ꞌti iwá̱n kipajpaló̱skejpa iga koni̱skej, ino̱mej tia tiktapejpenati.
Kua̱ꞌ tajta̱gaꞌ pe̱wakej iga koniáj a̱ꞌti, miaꞌ motankua̱kétzkejpa iga konijkej. Petz trescientos yej ayá̱ꞌ motankua̱ketzkej, yejemej kikuikej iga ima̱mej iwá̱n san‑kipajpalojtiajkij iga konijkej a̱ꞌti.
Iwá̱n Dios kijlij Gedeón:
—Iga iní̱n trescientos tajta̱gaꞌ nia nimitzpale̱wi̱ti iga xikta̱nili̱ka̱n madiani̱tajmej. Iwá̱n sekin welja yawij icha̱mej.
Ijkó̱n iga Gedeón kiti̱tan sekin israeli̱tajmej iga maya̱ka̱n icha̱mej, ká̱wiꞌsan iwá̱n yéj trescientos tajta̱gaꞌ.