Se̱ ángel tajtowa iwá̱n Gedeón
Jueces 6:11‑31
64
Se̱ día wa̱laj iyá̱ngela Dios iwá̱n mota̱lij itampa se̱ kuawiꞌ yej onoya a̱ltepe̱ꞌ yej ito̱ka̱ꞌ Ofra, ipan íta̱l se̱ israelita yej ito̱ka̱ꞌ Joás. Ipiltzi̱n Joás, yej ito̱ka̱ꞌ Gedeón, tekipanojtoya, eꞌ mi̱ya̱ntóyapa, kichijchijtoya trigo ipan lagarb ka̱n mopa̱tzka uva iga ompa mi̱ya̱ntoya iga kimajmawilia̱ya madiani̱tajmej. Iwá̱n ompa iyá̱ngel Dios mochij ken se̱ ta̱gaꞌ iga ki̱xne̱xtilij Gedeón, iwá̱n kijlij:—Dios onoꞌ mowa̱n, mitzmaꞌya motájpal iwá̱n mitzpale̱wij iga amo ximajmawi.
Eꞌ Gedeón kijtoj:
—¡NoTe̱ko!, siga Dios onoꞌ nowa̱mej ¿te iga kiye̱ꞌita iga ne‑ikno̱chijtokej yej ne‑ijiyaj? Iwá̱n ¿te iga iná̱n Dios ayꞌya kichi̱wa milagro ipan nejemej ken ikya kichij iwá̱n no‑ikyapatajwa̱n ken yejeme̱n ne̱powilijkej, kua̱ꞌkiꞌ Dios kiki̱xtijkej Egipto? Iná̱n Dios ne̱senmakákeja iwá̱n kineꞌ iga madiani̱tajmej mane̱ta̱nili̱ka̱n iwá̱n mane̱chi̱waka̱n iyescla̱vojmej.
Iwá̱n toTe̱ko, kitachi̱lij Gedeón, iwá̱n kijlij:
—Nej nimitzmaꞌya motájpal; xaj iwá̱n xikma̱nawi moge̱ntej de ino̱mej madiani̱tajmej. Nej yej nimitzti̱tani.
Iwá̱n Gedeón kijtoj:
—NoTe̱ko, ¿kén nej manikma̱nawi noge̱ntej? Notaj wa̱n nokni̱wa̱n ni alí̱n amotapialiáj, iwá̱n nej yej má̱j nite̱tzo̱yo̱ꞌ de inochi nokni̱wa̱n.
Eꞌ Dios kijtoj:
—Nej nonos mowa̱n iwá̱n tikta̱nili̱j madiani̱tajmej ken tikita tikta̱niliá se̱tzi̱n ta̱gaꞌ.
Iwá̱n Gedeón kijtoj:
—Nimitztajtaniliá iga xine̱ne̱xtili tejté̱ iga manikmati iga tej nokta in yej tine̱no̱tzaꞌ. Nimitzijliá iga aya xaj este que maniwi̱ki iwá̱n manikta̱li mo‑i̱xtaj noofre̱ndaj.
Iwá̱n toTe̱ko kijlij:
—Nia nimitzchati este que xiwi̱ki.
Gedeón yajki icha̱n iwá̱n kimiktij se̱ ca̱brajtzi̱nc iwá̱n kimanaꞌ iwá̱n no̱ kichij pa̱n. Iwá̱n nakaꞌ kakij ipan se̱ chikiwiꞌ, iwá̱n iya̱yo kakij ipan se̱ ko̱miꞌ, iwá̱n kika̱wili̱to el ángel.
Iwá̱n iyá̱ngel Dios kijlij:
—Xikui inó̱n nakaꞌ iwá̱n pa̱n iwá̱n xikta̱li iyi̱xko inó̱n tewé̱j iwá̱n iya̱yo xiktoya̱wa iyi̱xko moofre̱ndaj.
Ijkó̱n kichij Gedeón. Iwá̱n iyá̱ngel Dios kajkoꞌ ibasto̱n yej kiki̱tzkijtoya, iwá̱n kua̱ꞌ kichijchin iga ibasto̱n inó̱n nakaꞌ iwá̱n pa̱n, ki̱saꞌ tiꞌti ipan tewé̱j iwá̱n tataꞌ inó̱n ofrenda iwá̱n aka̱wiꞌ nité̱. Iwá̱n iyá̱ngel Dios sampolijte̱waꞌ iyi̱xtaj Gedeón.
Gedeón kimatiaya iga ta̱tapojtoya nokta iwá̱n iyá̱ngel Dios, iwá̱n kijtoj:
—¡NoDio̱s!, niknojma‑ítaꞌya moá̱ngel.
Iwá̱n Dios kijlij:
—Amo ximajmawi, ayá̱ꞌ timikis iga tikitaꞌ.
Iwá̱n Gedeón ompa kichij se̱ altard iga Dios.
Ino̱nsan yówal Dios kijlij Gedeón:
—Xiki̱tzki se̱ ito̱roj motaj, iwá̱n xaj xikxi̱xiti̱nati inó̱n altar ka̱n motaj kiweyimati̱ltiá ídolo yej ito̱ka̱ꞌ Baal. Iwá̱n xiktzonteki no̱ inó̱n ídolo de kuawiꞌ yej ito̱ka̱ꞌ Asera yej onoꞌ ite̱noj Baal, iwá̱n ompa xine̱chi̱wili se̱ altar, iga nej moDio̱s. Iwá̱n xiktati inó̱n toro iga moofre̱ndaj, xikui iga kuajkuáwil inó̱n ídolo de kuawiꞌ yej ito̱ka̱ꞌ Asera yej kiweyimati̱ltiáj.
Ijkó̱n Gedeón kikuiꞌ diez imo̱nsojmej iwá̱n kichij ken Dios kijlij. Eꞌ kichij tayowaka̱n iga kimajmawiliá itaj, iyikni̱wa̱n iwá̱n yej ompa cha̱ntitoyaj.
Kua̱ꞌ tane̱siꞌ, yej ompa cha̱ntitoyaj isakej, kitakej iga iyalta̱r Baal xití̱ntoꞌya iwá̱n ídolo yej ito̱ka̱ꞌ Asera, tzontéktoꞌya iwá̱n ómpasan onóyaya seꞌya altar iwá̱n inexyo toro yej kitatijkej. Iwá̱n mose̱se̱pantajtaniáj:
—¿A̱ꞌyéj a̱n ijkí̱n kichij?
Iwá̱n kijtojkej:
—Kichij Gedeón ipiltzi̱n Joás.
Iwá̱n tajta̱gaꞌ yej ompa cha̱ntitoyaj kijlijkej Joás:
—Xiki̱xti mopiltzi̱n. Yéj yawi mikiti iga kixiti̱n iyalta̱r Baal iwá̱n iga kitzonteꞌ ídolo Asera yej tikweyimati̱ltiáj.
Iwá̱n Joás kijlij inochi gente yej monechkojkej.
—¿Anyawij ankima̱nawi̱tij Baal? ¿Ix kineki mamoo̱mema̱wijto? Siga Baal melaꞌdio̱s, ima̱tika mamoma̱ti ipan yej kixiti̱nilij iyalta̱r.