Dios kita̱liá jue̱zmej iga makima̱nawi Israel
Jueces 2:7, 10‑19; 3:7‑15, 29‑30; 4:1‑6, 23‑24; 6:1‑10
63
Kua̱ꞌ israeli̱tajmej kita̱nilijkej Canaán, ayá̱ꞌ inewi gente kiki̱xtijkej yej ompa cha̱ntitoyaj ipan inó̱n ta̱jli. Inó̱n iga onóyajoꞌ sekin a̱ltepe̱mej de inó̱mejpa gente, eꞌ ino̱mej kipiayaj idio̱smej. Iwá̱n kua̱ꞌ panoj miaꞌ años, israeli̱tajmej pe̱wakej iga kichijkej yej aye̱kti iyi̱xtaj Dios iwá̱n kiweyimati̱ltijkej idio̱smej yej ompa cha̱ntitokej Canaán. Kikajtejkej yej melaꞌDio̱s iwá̱n kiweyimati̱ltijkej dio̱smej yej ito̱ka̱ꞌ Baal iwá̱n Astarot. Inó̱n iga Dios kikuesowilij israeli̱tajmej iwá̱n kichij iga makipolo̱ka̱n iyi̱xtaj iyenemi̱gojmej.Iwá̱n má̱j má̱j Dios kichij iga makita̱li̱ka̱n jue̱zmej iga makimanda̱ro̱ka̱n israeli̱tajmej iwá̱n iga makima̱nawi̱ka̱n ipan ima̱mej iyenemi̱gojmej. Eꞌ aya̱ꞌsan kitajto̱lkakiáj ino̱mej jue̱zmej, ma̱jwaꞌ kiweyimati̱ltia̱yaj i̱dolojmej. Ijkó̱n kua̱ꞌ Dios kita̱lia̱ya se̱ juez, Dios onoya íwa̱n, nochipa kima̱nawia̱ya ipan ima̱ꞌ iyenemi̱gojmej. Eꞌ kua̱ꞌ mikiá inó̱n juez, la gente sej kiweyimati̱ltia̱yaj i̱dolojmej.
Inó̱n iga Dios kichij iga rey yej manda̱rowa Mesopotamia, makimanda̱ro israeli̱tajmej, iwá̱n tekipanojkej ocho años iga inó̱n rey. Iwá̱n israeli̱tajmej kite̱ne̱wijkej Dios iwá̱n Dios kiti̱tanilij se̱ ta̱gaꞌ yej ito̱ka̱ꞌ Otoniel iga makima̱nawi israeli̱tajmej, iwá̱n kima̱nawij. Otoniel onoya de juez cuarenta años, eꞌ kua̱ꞌ míguiꞌya Otoniel, israeli̱tajmej pe̱wakej sej iga kichijkej yej aye̱kti. Inó̱n iga Dios kipale̱wij rey yej kimanda̱rowa país Moab iga kita̱nilij Israel. Iwá̱n israeli̱tajmej tekipanojkej iga inó̱n rey dieciocho años. Eꞌ israeli̱tajmej sej kite̱ne̱wijkej Dios, iwá̱n Dios kitapejpen se̱ ta̱gaꞌ de yejemej ito̱ka̱ꞌ Aod, iwá̱n mie̱j Aod onoya iga juez israeli̱tajmej onoyaj tamelá̱ ochenta años.
Kua̱ꞌ miguiꞌ Aod, israeli̱tajmej sej pe̱wakej iga kiweyimati̱ltijkej i̱dolojmej. Iwá̱n Dios kichij iga israeli̱tajmej mawetzika̱n ipan ima̱ꞌ rey de Canaán. Kua̱ꞌ kiwi̱gayay veinte años iga tekipanojtokej iga rey de Canaán, israeli̱tajmej kitajtanilijkej Dios iga makipale̱wi̱ka̱n. Íkua̱ꞌ manda̱rowa̱ya ipan Israel se̱ siwa̱ꞌ ito̱ka̱ꞌ Débora. Débora kitati̱tanilij se̱ ta̱gaꞌ yej ito̱ka̱ꞌ Barac iga makimanda̱ro solda̱dojmej de Israel. Débora iwá̱n Barac kima̱nawijkej israeli̱tajmej ipan ima̱ꞌ rey de Canaán, iwá̱n Israel cuarenta años onoyaj tamelá̱.
Eꞌ israeli̱tajmej sej kiweyimati̱ltijkej na̱mo̱ldio̱smej iwá̱n iní̱n ve̱j Dios kichij iga matamanda̱ro̱ka̱n madiani̱tajmej siete años. Israeli̱tajmej inó̱n iga mocha̱ntijkej ipan xapomej iwá̱n ipan tepe̱mej iga kipoxikno̱chi̱wayaj madiani̱tajmej. Kua̱ꞌ israeli̱tajmej kipiayaj itato̱ꞌmej ipan imi̱lmej, ya̱yaj madiani̱tajmej iwá̱n amaleci̱tajmeja iga kimijmiktilia̱yaj itato̱ꞌmej. Akikajte̱wilia̱yaj nité̱ iga makikua̱ka̱n israeli̱tajmej. No̱ kikui̱lia̱yaj nochi iyo̱lka̱mej israeli̱tajmej. Ini̱mej iyenemi̱gojmej asiáj iwá̱n iyo̱lka̱mej iwá̱n kuetaxmej yej iga kichi̱waj ikalmej iwá̱n mocha̱ntia̱yaj ka̱n cha̱ntitokej israeli̱tajmej. Ino̱mej enemi̱gojmej poxsan katka komatimej ken tikita chapolimej este ayꞌya wel moconta̱rowa, ijko̱nsan no̱ icame̱llojmej.b Kimijmiktilia̱yaj itato̱ꞌmej israeli̱tajmej iwá̱n ijkó̱n israeli̱tajmej nité̱ ayꞌya kipiayaj iga itechko madiani̱tajmej.
Iwá̱n israeli̱tajmej kite̱ne̱wijkej Dios iga makima̱nawi̱ka̱n ka̱n kikno̱chijtokej. Iwá̱n Dios kitajto̱lkáꞌ, iwá̱n kitapejpen se̱ de yejemej iga mochi̱was profeta,c iwá̱n ijkí̱n kijtoj:
—Ijkí̱n kijtoj Dios: “Nej nikma̱nawij amo‑ikyapatajwa̱n Egipto ka̱n ken kua̱ꞌ pre̱sojtitoyaj. Ayejsan iga nikma̱nawij ipan egi̱pciojmej, no̱ nikpale̱wij iga makita̱nili̱ka̱n nochi iyenemi̱gojmej iwá̱n nikui̱lijkej ita̱lmej iga nikmáꞌ amo‑ikyapatajwa̱n. Iwá̱n nikijlijkej iga amo makiweyimati̱lti̱ka̱n idio̱smej tokni̱mej yej kijliáj amorreos yej onokej ka̱n ancha̱ntitokej, iga nej amoDio̱s. Eꞌ amejeme̱n ayá̱ꞌ anne̱tajto̱lkakij.”