Josué pe̱wa iga kimanda̱rowa israeli̱tajmej
Josué 1:1‑7; 2:1‑24
57
Kua̱ꞌ Moisés míguiꞌya, Dios kijlij Josué:—Nosie̱rvoj Moisés míguiꞌya. Iná̱n tej sej xikojkui̱lti inochi ini̱mej gente a̱sentápal Jordán. Nia nimitzmakati ta̱jli ka̱nsan iga xaj, ijkó̱n kensan nikijlijka Moisés. Ayagaj yawi mitzta̱nili̱ti mie̱j tisatos, iga nej nia nonoti mowa̱n, ken nonoya iwá̱n Moisés. Nochipa nonos mowa̱n, iwá̱n nochipa nimitzpale̱wi̱j. Nej nimitzmakas motájpal iwá̱n iga amo ximosemaka, iga tej tia tikmajmakati la gente de Israel inó̱n ta̱jli yej nikijlij mo‑ikyapatajwa̱n iga nikmakaya. Inó̱n iga amo ximajmawi; ma̱jwaꞌ xikchi̱wa iga inochi moa̱lmaj yej kijtowa la ley yej nikmáꞌ Moisés iga amejeme̱n mamitzne̱xtili̱ka̱n.
Iwá̱n Josué kichij ken kijtoj Dios, kiti̱tan ichtákasan o̱me̱n yej matapi̱piatij Canaán, iwá̱n ijkí̱n kitekimakakej:
—Xa̱ka̱n Jericó, inó̱n weyi‑a̱ltepe̱ꞌ yej onoꞌ a̱sentápal iwá̱n xikitaka̱n inochi yej ompa onoꞌ.
Yejeme̱n yajkij iwá̱n asikej Jericó, cha̱n se̱ siwa̱ꞌ yej najna̱mo̱lnemi yej ito̱ka̱ꞌ Rahab, iwá̱n ompa ka̱wikej. Eꞌ sekin yej ompa cha̱ntitokej yajkij kimati̱lti̱toj rey de Jericó, kijlijkej:
—Niwa̱lkej nimitzmati̱lti̱koj iga yeguin kua̱ꞌ tayówaya asikej o̱me̱n tajta̱gaꞌ de Israel ipan iní̱n a̱ltepe̱ꞌ iga te̱pi̱piakoj iga makimatika̱n ken iga tonokej, iwá̱n onokej cha̱n Rahab.
Iwá̱n rey de Jericó tati̱tan iga kijli̱toj Rahab:
—Xiki̱xti ino̱mej tajta̱gaꞌ yej onokej mocha̱n, iga inó̱mejwaꞌ yej tapi̱piáj.
Eꞌ íkua̱ꞌwaꞌ Rahab kí̱ya̱nya ino̱mej tajta̱gaꞌ iwá̱n kijtoj:
—Kena, wa̱lkaj sekin tajta̱gaꞌ nigaj nocha̱n, eꞌ ayá̱ꞌ nikmati de ka̱n wa̱lkej, iwá̱n kua̱ꞌ tako̱mítiꞌya, kua̱ꞌ iga yáwija kitzakuatij ipue̱rtajyo imu̱rojyo a̱ltepe̱ꞌ, kijki̱skej iwá̱n ayá̱ꞌ nikmati kaígapa yajkij. Siga ankojtokaj iná̱n, anka wel ankitecho̱skej.
Eꞌ inó̱n siwa̱ꞌ kitejkawi̱ltij iyi̱xko kajli in ino̱mej yej tapi̱piáj iwá̱n ki̱ya̱ntoyaj itampa ka̱n onoya miaꞌ talpi̱lkuaxiwiꞌ yej ito̱ka̱ꞌ lino yej kisojtoya iga mawa̱ki.
Iwá̱n tajta̱gaꞌ yej itati̱tanímejpa el rey kite̱mo̱toj ipan inó̱n ojti yej yawi we̱ya̱ꞌ Jordán, iwá̱n asikej ka̱n a̱pano̱lo ka̱n tapanka̱n. Iwá̱n kua̱ꞌ ino̱mej yej taojtokaj ki̱skej, ipue̱rtajyo imu̱rojyo a̱ltepe̱ꞌ kitzakkej.
Iwá̱n íkua̱ꞌ Rahab tejkaj imani̱nsan iyi̱xko kajli kua̱ꞌ aya kochij ino̱mej o̱me̱n israeli̱tajmej, iwá̱n kijlijkej:
—Nikmati iga Dios mitzmakakej iní̱n ta̱jli, iwá̱n nochi nejeme̱n nimitzmajmawiliáj. Nikmatikej iga Dios kiwa̱ki̱ltij Tata̱ꞌláma̱r amo‑i̱xtaj kua̱ꞌ iga anki̱skej Egipto, iwá̱n no̱ nikmatij ken iga ankimiktijkej iyo̱mexti re̱yejmej a̱sentápal we̱ya̱ꞌ Jordán iwá̱n nochi ige̱ntej. Kua̱ꞌ iní̱n nikmatikej, poxsan nimajmawikej iwá̱n ayagaj mi̱xe̱wiá iga mitzkuejkuesowaj iga nikmatij iga amoDio̱s onoꞌ ajko ipan cielo iwá̱n ipan ta̱jli. Inó̱n iga nimitzijliáj iná̱n iga xine̱nojma‑ijli̱ka̱n iyi̱xtaj Dios, ijkó̱n ken nej nimitzpale̱wijkej, ijko̱nsan no̱ amejeme̱n xikpale̱wi̱ka̱n nofami̱liaj. Xine̱ne̱xtili̱ka̱n tejté̱ yej ankichi̱waskej, xine̱nojma‑ijli̱ka̱n iga anyawij ankima̱nawi̱tij notaj, noye̱ꞌ, nookichikni̱wa̱n iwá̱n nosiwa‑ikni̱wa̱n iga amo mamikika̱n.
Yejeme̱n kijtojkej:
—Siga ayá̱ꞌ anne̱kajkaya̱waj, niawij nikchi̱watij yej tiktajtani, iwá̱n kua̱ꞌ Dios mane̱makaka̱n iní̱n ta̱jli, poxsan niawij nimitzye̱ꞌitatij iwá̱n inochi mofami̱liaj.
Iwá̱n inó̱n siwa̱ꞌ kijlij ino̱mej tajta̱gaꞌ iga yawi kitemowi̱tij iga se̱ mekaꞌ ipan ventana, iga íkal tantoꞌ ipan muro, iwá̱n ijkí̱n kino̱no̱tzkej:
—Kua̱ꞌ antemo̱skej, xa̱ka̱n ipan tepe̱mej iga amo mamitzasika̱n yej mitzte̱mowaj, iwá̱n ompa ximi̱ya̱ntoka̱n e̱yi día, este que kua̱ꞌ yejeme̱n mokuépkeja. Después wel sej an‑ojkuiskej.
Iwá̱n yejeme̱n kijtojkej:
—Kua̱ꞌ nikalakiskej iwá̱n noge̱ntej ipan amóta̱l, xikilpi iní̱n mekaꞌ yej chi̱ltiꞌ yej iga anne̱temowijkej ipan ventana iga mane̱si katiapa mókal; iwá̱n xiknechko mocha̱n motaj iwá̱n moye̱ꞌ iwá̱n mokni̱wa̱n iwá̱n inochi yej ifami̱liaj motaj, iwá̱n siga se̱ de yejeme̱n ki̱sa kalijtiꞌ, yawi mikiti. Eꞌ yej onoskej kalijtiꞌ, inó̱n sí, nejemej notechkomej siga agaj tejté̱ kichi̱wiliá.
—Ijkó̱n tika̱wij —kijtoj Rahab.
Iwá̱n kinawatijkej, kitemowijkej ipan ventana iwá̱n yajkij; iwá̱n inó̱n siwa̱ꞌ kilpij inó̱n chi̱ltiꞌmekaꞌ ipan ventana.
Ino̱mej tajta̱gaꞌ nejnenkej este ipan tepe̱mej iwá̱n e̱yi día ompa mi̱ya̱ntoyaj, este que mokuepkej ino̱mej tajta̱gaꞌ yej kojtokakaj iga kite̱mojtinemiáj no̱ya̱n ipan ojti, iwá̱n ayá̱ꞌ kasikej. Iwá̱n ijkó̱n iga iyo̱mexti israeli̱tajmej yajkij sej ka̱n onoꞌ ikuetaxkajlimej; temojkej ipan tepe̱yoj, iwá̱n kipatilijkej Jordán. Kua̱ꞌ asikej ka̱n onoꞌ Josué kijlijkej:
—Dios te̱maꞌya inochi inó̱n ta̱jli iga inochi yej onokej ipan inó̱n país te̱majmawiliáj.