Moisés kino̱no̱tza israeli̱tajmej
Deuteronomio 1:1, 3; 6:4‑7; 8:1‑3; 14:22; 16:18‑19; 18:9‑15, 18‑19; 21:22‑23; 23:24‑25; 34:1‑8, 10
56
Se̱ día Dios kijlij Moisés:—Xiknechko inochi gente iwá̱n xikne̱xtili inochi leyes iwá̱n mandamiento yej nimitzmáꞌ, ken íkyaya nimitzijlij, iga tej ayá̱ꞌ tia tikalakiti Canaán, sino que tia timikiti iwá̱n ayꞌ tipano̱j we̱ya̱ꞌ Jordán.
Iwá̱n Moisés kino̱tzaꞌ inochi gente, iwá̱n kua̱ꞌ monechkójkeja, kijlijkej:
—Tejeme̱n yej ipilówa̱mpa ipilowa̱n Israel tikpiáj se̱san toTe̱ko, ino̱nwaꞌ Dios. Inó̱n iga xikneki moTe̱ko Dios iga inewi moa̱lmaj, iwá̱n iga inochi moespí̱ritoj iwá̱n inewi motájpal. Xikpiaka̱n ini̱mej tajto̱lmej ipan amoa̱lmajmej. Iwá̱n xikijli̱ka̱n amopilowa̱n, iga yejeme̱n no̱ makichi̱waka̱n ken kijtowa. Nochipa xikta̱tapo̱wi̱ka̱n de toDio̱s, kua̱ꞌ amonokej amocha̱n, o kua̱ꞌ nemi anyawij ipan ojti. Dio̱ssan xikweyimati̱lti̱ka̱n iwá̱n xikchi̱waka̱n kensan yéj kineki. Iwá̱n amo xikyokachi̱waka̱n iga Dios makichi̱wa ken amejemej ankinekij, ken kiyokachijkej amotajwa̱n kua̱ꞌ ki̱saꞌ a̱ꞌti ipan weyiteꞌti. Xikejla̱mikika̱n no̱ya̱n ipan inó̱n ojti ka̱n Dios mitznentia̱yaj cuarenta años ipan desierto; ipan inó̱n tiempo mitzikno̱chijkej iwá̱n mitzchi̱waltijkej ken yéj kiye̱ꞌita iga makita ix te̱ ankejla̱mikiskej iwá̱n siga ankichi̱waskej ken yéj mitztekimakaj o ayá̱ꞌ. Dios mitzikno̱chijkej iwá̱n mitzmaya̱nmiktijkej, eꞌ má̱j má̱j mitzmakakej maná inó̱n yej wetziꞌ ajko iga xikmatika̱n iga ayejsan iga pa̱n wel ono ta̱gaꞌ, no̱ wel ono iga itájto̱l Dios.
’Dios kineki mamitzejla̱nti̱ka̱n ileymej iga amo xike̱lka̱waka̱n:
’Cada año, amo xike̱lka̱waka̱n iga xikuajligaka̱n se̱ parte ipan cada diez de inochi yej ankiki̱xtiáj ipan amómi̱l.
’Xikta̱li̱ka̱n jue̱zmej iwá̱n yej manda̱rowaj ipan inochi amoa̱ltepe̱mej, yejeme̱n kimatiskej ken kichi̱waskej iga la gente maye̱ꞌonoka̱n.
’Amejeme̱n jue̱zmej amo xikchi̱waka̱n yej aye̱kti, amo se̱san xikye̱ꞌitaka̱n. Amo ximonamakaka̱n. Iga yej monamaka, mochi̱wa ken tikita yej ayá̱ꞌ ki̱xmati la ley iwá̱n ayꞌya agaj wel moconfia̱rowa ipan itájto̱l yej ye̱ꞌnemi. Siga ankichi̱waskej yej ye̱kti wel amonoskej ipan ta̱jli yej Dios mitzmakaj.
’Kua̱ꞌ ankalákkeja ipan ta̱jli yej mitzijlijkej iga yawij mitzmakatij, amo xikchi̱waka̱n yej aye̱kti yej la gente de ino̱mej pai̱smej kichi̱waj yej ompa cha̱ntitokej. Yej ompa cha̱ntitokej taachisa̱rowaj iwá̱n onokej yej tajtowaj iwá̱n yej miktókeja; nisé̱ de amejeme̱n amo makitajtanili tejté̱, niga makipaxa̱lowili, iga Dios kijiya yej kichi̱waj ino̱mej. Dios yawi mitzpale̱wi̱tij iga xikta̱nili̱ka̱n iwá̱n iga xiki̱xti̱ka̱n ino̱mej gente iwá̱n ita̱lmej yawij mitzmakatij amejeme̱n. Yawi no̱ asiti día iga Dios yawi kichi̱wati iga maki̱sa ipan amejeme̱n se̱ profetaa ken nej; iwá̱n xikchi̱waka̱n inochi yej yawi kijto̱ti, iga nochi yej ayá̱ꞌ kichi̱was yej yéj kijto̱j, inó̱n Dios kimatis te̱ kichi̱wili̱j.
’Dios no̱ kijtoj, siga se̱ de amejeme̱n tamiktiá no̱ makimikti̱ka̱n, xikechpi̱pilo̱ka̱n ipan se̱ kuawiꞌ, xikejla̱mikika̱n iga amo xikajte̱waka̱n icue̱rpoj ipan kuawiꞌ senyówal. Xikto̱kaka̱n ino̱nsan día, iga yej miki pi̱pilójtoꞌpa ipan kuawiꞌ, inó̱n tokni̱n, Dios kiye̱ꞌita iga kikno̱chijkej.b
’Kua̱ꞌ ankalakiskej ipan iyu̱vajyojc amoveci̱noj wel ankikua̱skej uva este que xixwika̱n; eꞌ awel ankiwi̱gaskej uva ipan amochiki. Kua̱ꞌ ankalakiskej no̱ ipan itri̱gojyoj amoveci̱noj wel ankitekij trigo iga amoma̱ꞌ, eꞌ awel ankitekiskej iga machete ipan ími̱l amoveci̱noj. Ijkó̱n kijtoj Dios.
Kua̱ꞌ támiꞌya kimakakej sekin má̱j imandamie̱ntoj Dios, Moisés tejkaj ipan se̱ tepe̱ꞌ yej ito̱ka̱ꞌ Nebo. Ompa Dios kine̱xtilij inewi ta̱jli yej onoꞌ Canaán, pe̱waꞌ ipan Judá iwá̱n este ipan lama̱rte̱n iwá̱n kijlij:
—Iní̱n ta̱jli yej nikijlij Abraham, Isaac iwá̱n Jacob iga nia nikmakati ipilówa̱mpa ipilowa̱n. Nikneki xikita iga moyi̱x, malej iga ayá̱ꞌ tasis ompa.
Ijkó̱n Moisés, yej isie̱rvoj Dios, miguiꞌ ipan ta̱jli yej ito̱ka̱ꞌ Moab, iwá̱n Dios kito̱gaꞌ ipan se̱ planada, iwá̱n ayagaj nokta kimati este iná̱n ka̱n moto̱gaꞌ. Moisés kipiaya ciento veinte años kua̱ꞌ miguiꞌ; ayí̱ꞌ pachatiáꞌ niga ayá̱ꞌ tamiꞌ itájpal. Israeli̱tajmej cho̱katoyaj iga miguiꞌ Moisés treinta día. Iwá̱n ateyiꞌ má̱j nike̱man seꞌ profeta ipan Israel yej Dios makitapejpena yej mamo‑i̱xtajmakatóka̱mpa iga masenta̱tapowaka̱n ken katka Moisés.