Ipilowa̱n Rubén iwá̱n Gad mocha̱ntiáj iki̱sáya̱mpa to̱nati̱ꞌ, iná̱ꞌ we̱ya̱ꞌ Jordán
Números 32:1‑27, 33
55
Mie̱j israeli̱tajmej cha̱ntitoyaj ite̱noj tepe̱mej de Moab, ipilówa̱mpa ipilowa̱n Rubén iwá̱n Gad yajkij ka̱n onoꞌ Moisés iwá̱n kijlijkej:—Iní̱n ta̱jli poxsan ye̱kti iga moskaliwi yo̱lka̱mej; onoꞌ poxsan sakaꞌ iwá̱n a̱ꞌti. ¿Ix awel anne̱makaskej iní̱n ta̱jli iga mamochi̱wa notatkimej? Amo xine̱cha̱nti̱tij iyi̱ka̱mpa we̱ya̱ꞌ Jordán.
Eꞌ Moisés inó̱n ayá̱ꞌ kiye̱ꞌitaꞌ, iwá̱n kijlijkej:
—Awel améjeme̱nsan nigaj xika̱wika̱n mie̱j amokni̱wa̱n maya̱ka̱n matamijmikti̱tij iga makiki̱xti̱ka̱n yej cha̱ntitokej Canaán. Má̱j ye̱kti iga xonoka̱n ken se̱san ta̱gaꞌ iga wel ximose̱sepampale̱wi̱ka̱n iga amonochi̱n xikpiaka̱n ajacho̱nsan amota̱lmej.
Eꞌ yejeme̱n kijtojkej:
—¡Ayá̱ꞌ!, ayéj ijkó̱n yej niknekij; niknekij iga manikalti̱ka̱n nofami̱liajmej, iwá̱n matzakto iga mu̱rojmej, iwá̱n niknekij manikchi̱waka̱n kóla̱l iga nogana̱dojmej. Iwá̱n nia̱tij ka̱n onokej nokni̱wa̱n iga nikpale̱wi̱skej ka̱n momijmiktilo este que nochi sejsé̱ de yejemej makasi íta̱l yej onoꞌ iyi̱ka̱mpa we̱ya̱ꞌ Jordán. Iwá̱n ayá̱ꞌ nia̱tij nocha̱mej este que nochi sejsé̱ de yejemej makikuika̱n ita̱lmej. Iwá̱n ayꞌya nikojpatajtaniskej ta̱jli yej onoꞌ iyi̱ka̱mpa Jordán, iga nejeme̱n nikpiaja nota̱lmej nijiga.
Iwá̱n Moisés kiye̱ꞌitaꞌ yej kijlijkej, iwá̱n kimakakej inó̱n ta̱jli yej kitapejpen ipilówa̱mpa ipilowa̱n Rubén iwá̱n Gad iwá̱n tajko yej ipilówa̱mpa ipilowa̱n Manasés. Inó̱n ta̱jli onoya iná̱ꞌ we̱ya̱ꞌ yej ito̱ka̱ꞌ Jordán, iki̱sáya̱mpa to̱nati̱ꞌ, iwá̱n yejemej a̱panojkej pan inó̱n a̱ꞌti Jordán iga wel kalakikej ipan ta̱jli yej ito̱ka̱ꞌ Canaán.