Madiani̱tajmej mikij iga kikajkayajkej israeli̱tajmej
Números 31:1‑18, 25‑54
54
Iwá̱n Dios kijlij Moisés:—Xikmijmikti̱ka̱n madiani̱tajmej iga kikajkayajkej israeli̱tajmej, iwá̱n kua̱ꞌ tíkchija inewi yej nemi nimitzijliá tej tia timikiti.
Iwá̱n Moisés kijlij la gente:
—Xiktapejpenaka̱n mil tajta̱gaꞌ ipan sejsé̱ tribu, iga maya̱ka̱n makimijmikti̱tij madiani̱tajmej ijkó̱n Dios yo̱lki̱sas ipan madiani̱tajmej.
Iwá̱n kitapejpenkej mil tajta̱gaꞌ ipan sejsé̱ tribu, iwá̱n Moisés kiti̱tan ka̱n momijmiktilo. Iwa̱mej ya̱ya no̱ el sacerdote Finees yej kiwi̱gaya tra̱stejmej yej onoya kuetaxtio̱pan iwá̱n itapi̱tzalmej yej mopi̱tza kua̱ꞌ pé̱waya iga momijmiktilo. Israeli̱tajmej momijmiktijkej iwá̱n madiani̱tajmej, iwá̱n kimiktijkej inochi madiani̱tajmej iwá̱n inó̱n cinco irre̱yejmej, ijkó̱n kensan Dios tatekimáꞌ. No̱ kimiktijkej Balaam; eꞌ kiwi̱gakej preso siwa̱tkej iwá̱n ipilowa̱n yej cha̱ntitoyaj Madián, iwá̱n inochi iyo̱lka̱mej iwá̱n nochi yej kipiayaj yej patiyoj. Iwá̱n no̱ kitatilijkej iya̱ltepe̱mej iwá̱n inochi ikuetaxkajlimej, iwá̱n inochi yej kikui̱lijkej, kiwi̱guilijkej Moisés.
Kua̱ꞌ Moisés kitaꞌ iga ayá̱ꞌ kimiktijkej siwa̱tkej, kuejkuesiwiꞌ iwá̱n kijtoj:
—¿Te iga ayá̱ꞌ ankimiktijkej ini̱mej siwa̱tkej? Yejeme̱n kicre̱dojkej itájto̱l Balaam, iwá̱n yejeme̱n itechkomej iga toge̱ntej kiweyimatikej ná̱mo̱l dio̱smej. Iná̱n xikmikti̱ka̱n inochi ipilowa̱n yej choochichi̱n iwá̱n inochi siwa̱tkej yej ayꞌya yéj takotzi̱n; iwá̱n yej takotzi̱noꞌ amo xikmikti̱ka̱n, ino̱mej xikuika̱n iga amejeme̱n.
Iwá̱n Dios kijlij Moisés:
—Tej iwá̱n sacerdote Eleazar, iwá̱n ije̱fejmej la gente, xiconta̱ro̱ka̱n inochi la gente iwá̱n yo̱lka̱mej yej ankikui̱lijkej madiani̱tajmej, iwá̱n xikparti̱ro̱ka̱n o̱me partes. Tajko xikmakaka̱n yej yajkaj tamijmikti̱to̱yaj iwá̱n seꞌ tajko iga yej ka̱wikaj ipan a̱ltepe̱ꞌ. Iwá̱n tia tiktajtaniti se̱ ofrenda iga nej ke̱ꞌ iga mokui̱li̱skej sejsé̱ tajta̱gaꞌ yej yajkaj tamijmikti̱to̱yaj. Ipan cada quinientos, takomej o to̱romej, bu̱rrojmej o borre̱gojmej, tia tikuiti se̱ iwá̱n tia tikmakati el sacerdote Eleazar, inó̱n ken kua̱ꞌ nej anne̱makaskej iga ofrenda iga nej moDio̱s.
’Iwá̱n seꞌ tajko, yej tikmakas yej ayá̱ꞌ yajkaj tamijmikti̱to̱yaj, tia tikuiti se̱ ipan cada cincuenta, ken takomej iwá̱n de inochi yo̱lka̱mej, iwá̱n tia tikmakati ipilowa̱n Leví yej kicuida̱rowaj kuetaxtio̱pan.
Iwá̱n Moisés iwá̱n el sacerdote Eleazar kichijkej kensan Dios tatekimáꞌ.
Inochi yej kikui̱lijkej iyenemi̱gojmej masiꞌ seiscientos setenta y cinco mil borre̱gojmej, iwá̱n setenta y dos mil to̱rojmej, iwá̱n sesenta y un mil bu̱rrojmej. Iwá̱n treinta dos mil yej takómejoꞌ. Iwá̱n kiparti̱rojkej o̱me partes, iwá̱n ompa kikuikej achi iga el sacerdote Eleazar iga ofrenda iga Dios, iwá̱n tajko ka̱wiꞌ iga ipilowa̱n Leví, ijkó̱n ken Dios kitekimáꞌ.
Después ije̱fejmej solda̱dojmej de Israel yajkij ka̱n onoꞌ Moisés iwá̱n kijlijkej:
—Niconta̱rójkeja tajta̱gaꞌ yej tamijmiktiáj yej nejemej niknentiáj iwá̱n ayá̱ꞌ poliwi nisé̱; nigaj nikuajligaj kuajkuantas de oro yej nikasikej: ma̱ko̱skaꞌ, ani̱llojmej iwá̱n ko̱skamej iwá̱n nikmakaskej iga ofrenda Dios iga ne̱pale̱wijkej ka̱n nitamijmiktijkej.
Moisés iwá̱n el sacerdote Eleazar kikuikej inó̱n oro yej solda̱dojmej kiwi̱gakej ipan kuetaxtio̱pan iga ofrenda, iga israeli̱tajmej kiweyimatikej Dios. Iwá̱n iga inóchiya ofrenda monechkoj má̱j de ciento ochenta kilos.