Balac kineki iga Balaam makitajtanili Dios iga amo maye̱ꞌonoka̱n israeli̱tajmej
Números 22:2‑41; 23:3‑24:17
52
Balac rey yej manda̱rowa ipan país yej ito̱ka̱ꞌ Moab. Yéj kitaꞌ ken iga israeli̱tajmej kita̱nilijkej los amorreos. Iwá̱n majmawiá iga ige̱ntej wel kipolowaj siga momijmiktiáj wa̱n israeli̱tajmej iga poxsan katka komatimej. Inó̱n iga tajtoj wa̱n tajwe̱wetkej yej icha̱mej Madián, kijlij:—Ini̱mej gente yawij te̱ta̱nili̱tij iwá̱n yawij te̱kui̱li̱tij tota̱lmej.
Iwá̱n Balac kiti̱tan yej maya̱ka̱n makitatij se̱ ta̱gaꞌ yej ito̱ka̱ꞌ Balaam iga ijkí̱n makijli̱tij:
—Póxsanya komati gente ki̱saꞌ Egipto iwá̱n nó̱ya̱nya nemi mocha̱ntiáj. Xiwi̱ki iná̱n xikmaldeci̱ro̱ki ini̱mej gente, yejemej má̱j miakejmej que nejeme̱n. Anka ijkó̱n wel nikta̱nili̱j iwá̱n wel niki̱xti̱j ipan iní̱n ta̱jli. Nikmatiꞌ iga yej tej tiktajtaniliá Dios iga amo maye̱ꞌono, aye̱ꞌonos; iwá̱n yej tej tiktajtaniliá Dios iga maye̱ꞌono, ye̱ꞌonos.
Iwá̱n ino̱mej we̱wetkej yej tati̱tanímejpa yej cha̱ntitokej Moab iwá̱n yej cha̱ntitokej Madián, yajkij; eꞌ kiwi̱gakej rega̱lojmej iga tajto̱toj iwá̱n Balaam. Iwá̱n ino̱mej tati̱tanimej kijlijkej Balaam kensan kijtoj Balac, iwá̱n ijkí̱n kijtoj Balaam:
—Xikochíka̱noꞌ nigaj iná̱n, iwá̱n mo̱sta nia nimitzijli̱tij yej Dios yawi ne‑ijli̱ti.
Iwá̱n ino̱mej tati̱tanimej ka̱wikej icha̱n Balaam, iwá̱n tayowaka̱n Dios kino̱tzaꞌ Balaam iwá̱n kitajtan:
—¿Ka̱n wa̱lkej in ini̱mej tajta̱gaꞌ yej onokej mocha̱n?
Iwá̱n Balaam kijtoj:
—Balac, yej rey de Moab, kiti̱tankej iga mane‑ijli̱kij iga ipan ipaí̱s nemi mocha̱ntiáj yej ki̱skej Egipto. Kineki iga nej maniá iwá̱n manimitztajtanili iga amo maye̱ꞌonoka̱n israeli̱tajmej, iga makita siga ijkó̱n ix wel kita̱nili̱j iwá̱n ix wel kiki̱xti̱skej ipan ita̱lmej.
Iwá̱n Dios kijlij Balaam:
—Amo xaj iwá̱n yejeme̱n, niga xine̱tajtanili iga amo maye̱ꞌonoka̱n israeli̱tajmej, iga nej nikíjtoja iga ye̱ꞌonoskej.
Iwá̱n Balaam moketzaꞌ yowáltiꞌsan iwá̱n kijlijkej itati̱tanimej Balac:
—Xá̱ka̱nya amocha̱n, iga Dios ayá̱ꞌ kineki maniá amowa̱n.
Ino̱mej tati̱tanimej yajkij sej ka̱n onoꞌ Balac iwá̱n kijlijkej:
—Balaam ayá̱ꞌ kineꞌ wa̱laj.
Eꞌ Balac sej kiti̱tan tajta̱gaꞌ yej má̱j tayaka̱ntokej yej cha̱ntitokej ipan iya̱ltepe̱ꞌ, yej yajkij ijkí̱n kijli̱toj Balaam:
—Balac ijkí̱n kijtowa: “Nimitztekiꞌijliá iga amo ximoyo̱ltakua̱wili iga xiwi̱ki; poxsan nia nimitzweyimatiti iwá̱n nia nikchi̱wati inochi yej tia tine‑ijli̱ti. Eꞌ xiwi̱ki xikmaldeci̱ro̱ki ini̱mej gente.”
Iwá̱n Balaam kijtoj:
—Malej iga Balac mane̱maka íkal yej mate̱nto iga plata iwá̱n oro, eꞌ awel nikchi̱wa yej ayá̱ꞌ kineki Dios; pues nej nose̱lti awel nikchi̱wa nité̱. Xikochíka̱noꞌ nigaj iwá̱n tiawij tikitatij te̱ iteki yej Dios yawi sej ne‑ijli̱ti.
Iwá̱n Dios kino̱tzaꞌ Balaam inó̱n yówal iwá̱n kijlij:
—Ini̱mej tajta̱gaꞌ wa̱lkej mitzno̱tzakoj, xajwaꞌ iwa̱mej; eꞌ tia tikchi̱wati yejsan nia nimitzijli̱ti.
Ipan seꞌya día Balaam moketzaꞌ isajpa, kixi̱lajtij ibu̱rraj iwá̱n yajki iwá̱n itati̱tanimej Balac. Eꞌ Dios kuesitoya iga Balaam iga yéj ayá̱ꞌ kinekiá makichi̱wa ken Dios kineki.
Iwá̱n kua̱ꞌ Balaam ya̱ya ipan ojti tejkatia̱ya ipan ibu̱rraj, ya̱ya iwá̱n o̱me imo̱nsojmej, iyá̱ngela Dios wa̱laj iwá̱n moketzaꞌ tajko ojti, iyi̱xtajmej yejeme̱n. Kua̱ꞌ burra kitaꞌ inó̱n ángel iga kiki̱tzkijtoꞌ espada, ki̱saꞌ ipan ojti iwá̱n kalaꞌ ipan kochkiyoj. Iwá̱n Balaam kimágaꞌpa iga kojkui̱ltij sej; eꞌ inó̱n ángel tapanoj iwá̱n moketzaꞌ ipan se̱ ojti yej panowa̱ya itza̱la̱n o̱me pared de teꞌti yej iga te̱nkola̱ltitoya u̱vajmi̱jlimej. Kua̱ꞌ burra kitaꞌ sej el ángel, motetonij se̱ lado ipan ite̱nkola̱lyo uva mi̱jli, iwá̱n ijkó̱n kikxipitzi̱n Balaam. Iwá̱n yéj, sej ki‑ojpamagaꞌ ibu̱rraj.
El ángel sej tapanoj iwá̱n moketzaꞌ ka̱n ojtzo̱lka̱n ka̱n niga wel kikui seꞌ lado, niga nij, niga neípa. Kua̱ꞌ burra sej kitaꞌ el ángel, mochapa̱n ta̱lpan, Balaam sa̱lijtiajki iyi̱xko, iwá̱n Balaam kuejkuesiwiꞌ iwá̱n kimagaꞌ ibu̱rraj iga ibasto̱n. Iwá̱n Dios kitajto̱ltij burra, iwá̱n burra kijlij Balaam:
—¿Té̱ nimitzchi̱wilij iga tine̱mágaꞌya e̱yi ve̱j?
Iwá̱n Balaam kijlij ibu̱rraj:
—¡Iga tineaja̱wilmatiꞌ! ¡Siga nikpiaya katka se̱ cuchillo sémisan nimitzmiktia̱ya!
Eꞌ burra kijlij Balaam:
—Nej mobu̱rraj, iwá̱n íkyaya tine̱tejkawilijtinemi. Iná̱n xine‑ijli, ¿ix seꞌya ve̱j ijkí̱n nimitzchi̱wilij?
Iwá̱n yéj kijtoj:
—Ayá̱ꞌ.
Iwá̱n Dios ki̱xtapoj Balaam iwá̱n kitaꞌ iyá̱ngel Dios iga onoya ipan ojti, kiki̱tzkijtoꞌ iyespa̱daj.b Balaam motankua̱ketzaꞌ iyi̱xtaj el ángel iwá̱n el ángel kijlij:
—¿Te iga tikmagaꞌ mobu̱rraj e̱yi ve̱j? Taꞌ xikaki, nej niwa̱laj nimitzojtzakuili̱ko iga yej tikejla̱ntoꞌ iwá̱n tikchi̱wasneki, inó̱n aye̱kti. Kua̱ꞌ burra ne‑itaꞌ, ne̱cholowilij; siga ayá̱ꞌ katka cholojka, nimitzmiktíjkaya iwá̱n mobú̱rrajsan isatika̱wiá.
Iwá̱n Balaam kijlij el ángel:
—Nikchij yej aye̱kti, nej ayá̱ꞌ nikmatiá siga tej tine̱ojtzakuilijtoya; eꞌ iná̱n siga tikneki nia sej nimokuepati.
Iwá̱n el ángel kijtoj:
—Xaj iwá̱n ini̱mej tajta̱gaꞌ; eꞌ tajto̱lmej yej nia nimitzijli̱ti, inó̱n tia tikijto̱ti.
Ijkó̱n iga Balaam yajki iwá̱n itati̱tanimej Balac. Kua̱ꞌ Balac kimatiꞌ iga Balaam wi̱tziaya, ki̱saꞌ iga ki‑o̱mema̱wi̱to, iwá̱n kijlij Balaam:
—¿Te iga ayá̱ꞌ tiwa̱laj kua̱ꞌ achto nimitztati̱tanilij? ¿Tej anka tikijtoj awel nimitzmakas yej nimitzijlij?
Balaam kijtoj:
—Nígaja nonoꞌ; eꞌ awel nikijtowa yej nej nikneki. Sino que yejsan Dios kineki iga manikijto, inó̱n nia nikijto̱ti.
Iwá̱n Balac kiwi̱gaꞌ Balaam iyi̱xko se̱ tepe̱ꞌ este ka̱n ne̱sij ikuetaxkajlimej israeli̱tajmej. Iwá̱n Balaam kijlij Balac:
—Nígajoꞌ xine̱chá ka̱n tikmakakej ofrenda Dios. Nej acho̱ꞌ má̱j nia ninejnemiti iga matikitaka̱n te̱ yawi ne‑ijli̱ti Dios.
Balaam yajki ise̱lti iwá̱n Dios kijlij:
—Xaj sej ka̱n onoꞌ Balac iwá̱n xikijli yej nikijtoj.
Iwá̱n yajki ka̱n onoꞌ Balac iwá̱n kijlij:
—Awel nikmaldeci̱rowa yej Dios kíjtoja iga ye̱ꞌonos. Dios kicuida̱rowa ini̱mej gente iwá̱n kibendeci̱rowa, inó̱n iga poxsan miakejmej.
Iwá̱n Balac kijlij Balaam:
—¿Te iga ijkó̱n tine̱chi̱wiliá? Nimitzno̱tzaꞌ iga xikmaldeci̱ro noenemi̱goj wa̱n ma̱jwaꞌ tikbendeci̱roj.
Eꞌ Balaam kijtoj:
—Nimitzíjlija, iga nia nikijto̱ti yejsan Dios ne‑ijli̱j.
Iwá̱n Balac kijlij:
—Xiwi̱ki, tiaka̱n este ka̱n wel xikita iga na̱ꞌya onokej israeli̱tajmej. Este ompa wel tikmaldeci̱rowa inochimej.
Iwá̱n kiwi̱gaꞌ iyi̱xko se̱ tepe̱ꞌ yej ito̱ka̱ꞌ Pisga. Ompa kitatijkej yo̱lka̱ꞌ iga ofrenda iga Dios. Iwá̱n Balaam kijtoj:
—Xine̱chá nigaj ka̱n tikmakakej iyofre̱ndaj Dios, mie̱j nej acho̱ꞌ má̱j nia nitapano̱ti iga manikita te̱ ne‑ijli̱j Dios.
Iwá̱n Dios kino̱tzako iwá̱n kijlij yej yawi kijli̱ti Balac. Iwá̱n Balaam yajki sej ka̱n onoꞌ Balac, iwá̱n Balac kitajtan:
—¿Té̱ mitzijlij Dios?
Iwá̱n Balaam kijtoj:
—Dios ayéj ken ta̱gaꞌ iga takajkaya̱wa, niga kipátaoꞌ sej yej kíjtoja. Yej kíjtoja, inó̱n yawi kichi̱wati. Yéj kíjtoja iga maye̱ꞌonoka̱n ini̱mej gente; iwá̱n kita iga yejeme̱n ayá̱ꞌ kichijtokej yej aye̱kti. Inó̱n iga yéj onoꞌ iwá̱n yejeme̱n iwá̱n kipale̱wiáj.
Iwá̱n Balac kijlij:
—Siga awel tikmaldeci̱rowa, niga no̱ xiye̱ꞌtajto iga yejemej.
Eꞌ Balaam kijtoj:
—Nimitzíjlija iga yejsan Dios mane‑ijli iga manikijto, inó̱n nikijtowa.
Iwá̱n Balac kijlij Balaam:
—Xinejnemi, nia nimitzwi̱gati ipan seꞌ tepe̱ꞌ iwá̱n este ompa tia tikmaldeci̱ro̱ti.
Balac kiwi̱gaꞌ Balaam iyi̱xko se̱ tepe̱ꞌ yej kito̱ka̱wia̱yaj Peor. Eꞌ Balaam kimatiaya iga Dios ayá̱ꞌ kinekiá mamomaldeci̱ro israeli̱tajmej; iwá̱n tacháꞌ ka̱n onoya inochi ikuetaxkajlimej, iwá̱n iyEspí̱ritoj Dios wa̱laj iyakapan, iwá̱n kijtoj:
—Iní̱n gente de Israel kipoxye̱ꞌita Dios. Dios kiki̱xtij Egipto iwá̱n kipoxpí̱wija, iwá̱n kita̱nilij inochi iyenemi̱gojwa̱n.
Iwá̱n Balac poxsan kikuesowilij Balaam, iwá̱n este momajma̱wi̱teꞌ iwá̱n kijlij:
—Nimitzno̱tzaꞌ iga xikmaldeci̱ro noenemi̱gojwa̱n, iwá̱n ayéj ijkó̱n tikchij, ma̱jwaꞌ e̱yi ve̱j tiktajtanilij Dios iga maye̱ꞌonoka̱n. Mataj áyꞌyawaꞌ katka nimitztati̱tanilijka iga xiwi̱ki. Iná̱n xaj sej ka̱nsan tiwa̱laj. Nej nimitzweyimati̱ltia̱ya, eꞌ Dios ayá̱ꞌ kineꞌ.
Iwá̱n Balaam kijtoj:
—Nej nikijlij motati̱tanimej, malej iga xine̱maka mókal yej mate̱nto iga plata iwá̱n oro, nej awel nikpata yej Dios ne‑ijlij; yej Dios mane‑ijli, inó̱n nia nikijto̱ti. Niá̱tiya iná̱n ipan noa̱ltepe̱ꞌ, eꞌ achto xikaki yej Dios kijliá Israel.
Iwá̱n Balaam kijtoj iní̱n yej Dios kine̱xtilij:
—Nikita tejté̱ yej wi̱‑oꞌ, nikita tejté̱ ne‑iga poxsan wejka: ipan iní̱n gente de Israel yawi ki̱sati se̱ rey yej yawi kikua̱tepacho̱ti Moab, iwá̱n ijko̱nsan no̱ yawi kichi̱wili̱ti inochi iyenemi̱gojwa̱n Israel.