Dios kikne̱liá israeli̱tajmej malej iga kue̱kuejkuesiwij
Números 20:1‑12, 22‑29; 21:4‑9, 21‑24; 22:1
51
Asitia̱yay cuarenta año kua̱ꞌ israeli̱tajmej ki̱skej Egipto, iwá̱n kua̱ꞌ nemi ya̱yaj, asikej a̱ltepe̱ꞌ yej ito̱ka̱ꞌ Cades yej onoꞌ ipan desierto yej ito̱ka̱ꞌ Zin. Ompa ateyá a̱ꞌti iga mooniá, iwá̱n la gente monechkoj iga mokuesojkej ico̱ntraj Moisés iwá̱n Aarón, kijtojkej:—¡Maséj nimikíkeja no̱ kua̱ꞌ mikikej tokni̱wa̱n iyi̱xtaj Dios! ¿Te iga anne̱wajligakej iwá̱n noyo̱lka̱mej ipan desierto iga manimikika̱n? ¿Te iga anne̱ki̱xtijkej Egipto iga anne̱wajligakej nigaj? Nigaj ateyi trigo iga mokua, niga a̱ꞌti iga mooniá.
Moisés iwá̱n Aarón yajkij kuetaxtio̱pan iwá̱n ipan kalte̱n motankua̱ketzkej iwá̱n motzonto̱kkej este ipan ta̱jli, iwá̱n iweyipode̱r Dios mone̱xtij ipan yejeme̱n. Ompa Dios kino̱tzaꞌ Moisés, kijlij:
—Xikui mobasto̱n iwá̱n mamitzpale̱wi mokni̱n Aarón iga xiknechko mokni̱wa̱n. Iwá̱n iyi̱xtaj inochi yejeme̱n, xiktekimaka inó̱n weyiteꞌti iga ípan maki̱sa a̱ꞌti iwá̱n tia tikitati iga yawi ki̱sati komati a̱ꞌti iga nochi gente iwá̱n nochi iyo̱lka̱mej makipiaka̱n a̱ꞌti iga makoni̱ka̱n.
Iwá̱n Moisés kikuiꞌ ibasto̱n, ijkó̱n kensan Dios kijlij, Moisés iwá̱n Aarón kinechkojkej nochi gente ite̱noj weyiteꞌti iwá̱n kijlijkej:
—Taꞌ xikakika̱n amejeme̱n yej anyo̱ltakuaktikej, ¿ix nimitzki̱xtili̱skej a̱ꞌti ipan iní̱n weyiteꞌti?
Moisés kajkoꞌ ima̱ꞌ iwá̱n kiwi̱teꞌ weyiteꞌti iga ibasto̱n, o̱me ve̱j. Iwá̱n ki̱saꞌ komati a̱ꞌti, la gente iwá̱n iyo̱lka̱mej a̱tikej.
Eꞌ má̱j má̱j, Dios kijlij Moisés iwá̱n Aarón:
—Amejeme̱n ayá̱ꞌ ane̱weyimatikej iyi̱xtaj la gente kua̱ꞌ ankiki̱xtijkej a̱ꞌti ipan weyiteꞌti; inó̱n iga ayá̱ꞌ niknekis iga amejeme̱n xasika̱n ipan inó̱n ta̱jli yej nimitzijlijkej iga nia nimitzmakatij.
Má̱j má̱j israeli̱tajmej ki̱skej ipan desierto yej ito̱ka̱ꞌ Zin iwá̱n asikej ipan se̱ tepe̱ꞌ yej ito̱ka̱ꞌ Hor. Ompa Dios kijlij Moisés:
—Mokni̱n Aarón yawi mikiti nigaj iwá̱n ayá̱ꞌ yawi asiti ipan ta̱jli yej nimitzijlijkej iga nia nimitzmakatij, iga ayá̱ꞌ kichij ken niktekimáꞌ.
Iwá̱n Dios kijlij Moisés inochi yej yawi kichi̱wati kua̱ꞌ aya miki Aarón, iwá̱n Moisés kichij ken Dios kijtoj. Kiwi̱gaꞌ ipan tepe̱ꞌ Aarón iwá̱n Eleazar, yej ipíltzi̱mpa Aarón. Kua̱ꞌ onóyaja iyi̱xko tepe̱ꞌ, Moisés kiki̱xtilij itzótzol Aarón yej kajakijtoya yej kakiajpa sacerdo̱tejmej iwá̱n kajaki̱ltij Eleazar, iga mane̱si iga yéjya sej mochi̱wa sacerdote. Iwá̱n Aarón ompa miguiꞌ, Moisés iwá̱n Eleazar kito̱kkej Aarón ompa ipan tepe̱ꞌ.
Kua̱ꞌ la gente kimatikej iga míguiꞌya Aarón ipan tepe̱ꞌ, mokno̱matikej iwá̱n cho̱katoyaj treinta día.
Israeli̱tajmej sej ojkuikej, eꞌ kuejkuesitiá̱yajsan ico̱ntraj Dios iwá̱n Moisés, iwá̱n ijkí̱n kijtowa̱yaj:
—¿Te iga anne̱ki̱xtijkej Egipto?; ¿ix iga san manimikika̱n ipan iní̱n desierto? Nigaj ateyi pa̱n niga a̱ꞌti iwá̱n ni alí̱n ayꞌya nikua̱jnekij maná.
Eꞌ Dios kikuesoj iga ino̱mej kue̱kuejkuesiwikej, iwá̱n kiti̱tanilijkej kowa̱mej yej kipiáj ivene̱nojyomej iga makitajtankua̱ka̱n la gente, iwá̱n miaꞌ gente mikikej. Iwá̱n moyo̱lpatakej iwá̱n ijkí̱n yajkij kijli̱toj Moisés:
—Nikchijkej yej aye̱kti iga nitajtojkej ico̱ntraj Dios iwá̱n tej moco̱ntraj. Xikijli Dios iga make̱na ini̱mej kowa̱mej ka̱n nonokej.
Moisés kijlij Dios iga la gente moyo̱lpatákeja, iwá̱n Dios kijlij ijkí̱n:
—Xikchi̱wa se̱ kowa̱ꞌ iga tepos yej ito̱ka̱ꞌ bronce, iwá̱n xikta̱li ipan se̱ kuawiꞌ yej tikto̱kas; iwá̱n siga agaj makitankua kowa̱ꞌ iwá̱n inó̱n yej kitankuajkej, siga makitachi̱li inó̱n kowa̱ꞌ de bronce, ayá̱ꞌ yawi mikiti.
Iwá̱n Moisés kichij se̱ kowa̱ꞌ de bronce iwá̱n kita̱lij ipan se̱ kuawiꞌ yej kito̱gaꞌ. Ijkó̱n kua̱ꞌ agaj kitankua̱j kowa̱ꞌ iwá̱n iga san makitachi̱li kowa̱ꞌ de bronce ayá̱ꞌ mikis.
Má̱j má̱j asikej ipan ita̱lmej tokni̱mej yej kijliáj amorreos iwá̱n Moisés kiti̱tan itati̱tanimej iga matajto̱tij iwá̱n Sehón, yej irre̱y amorreos, iga kijli̱toj iga achi mapano̱ka̱n ipan ita̱lmej. Tati̱tanimej ijkí̱n kijlijkej el rey:
—Nimitzijli̱koj siga wel achi nipano̱skej ipan amóta̱l. Ayá̱ꞌ niktekiskej amou̱vajmej niga nikuiskej a̱ꞌti ipan amopo̱sojmej. Achi manipano̱ka̱n, iga mania̱ka̱n ipan ta̱jli ka̱n Dios ne̱makakej.
Eꞌ inó̱n rey ayá̱ꞌ kineꞌ iga mapano̱ka̱n ipan ita̱lmej, ma̱jwaꞌ kinechkoj ige̱ntej iga mamomijmikti̱ka̱n wa̱n israeli̱tajmej iwá̱n momijmiktijkej. Eꞌ israeli̱tajmej kita̱nkej; kimiktijkej el rey Sehón iwá̱n kita̱lkui̱lijkej. Después ojkuikej sej este que asikej ipan we̱ya̱ꞌ Jordán, pan país yej ito̱ka̱ꞌ Moab. Moab onoya ite̱noj Canaán, san a̱panowa̱yaj iwá̱n israeli̱tajmej asiaja ipan ta̱jli ka̱n Dios kijtoj iga yawi kimakati israeli̱tajmej.