Israeli̱tajmej asij ka̱n pe̱wa Canaán
Números 4:1‑49; 10:11‑28; 12:16; 13; 14
49
Nochipa kua̱ꞌ israeli̱tajmej majavia̱rowa̱yaj iga ojkuiaja, sacerdo̱tejmej kixijxiti̱nayaj kuetaxtio̱pan iwá̱n kiyejye̱ꞌta̱lia̱yaj yej kiwi̱gaskej, ijkó̱n kensan Dios tatekimáꞌ. Después wi̱tziayaj sekin yej ipilowa̱n Leví iga kikechpanojtia̱yaj ipan ojti inó̱n yej iga mochi̱wa kuetaxtio̱pan. Ijkó̱n kichijkej cuarenta año kua̱ꞌ onoyaj ipan desierto.Kua̱ꞌ israeli̱tajmej kiwi̱gáyaja ken se̱ xiwiꞌ iga cha̱ntitokej ipan desierto ite̱noj tepe̱ꞌ yej ito̱ka̱ꞌ Sinaí, mixti yej onoya iyi̱xko kuetaxtio̱pan pe̱waꞌ iga nejnen, iwá̱n yejeme̱n kimatikej iga seja maojkuika̱n. Iwá̱n kixijxiti̱nkej nochi yej kipiayaj iwá̱n kiwe̱welpachojkej iwá̱n kikechpanojkej iga kiwi̱gakej, iwa̱nya kuetaxtio̱pan.
Ijkó̱n iga ki̱skej israeli̱tajmej iná̱ꞌ tepe̱ꞌ yej ito̱ka̱ꞌ Sinaí ka̱n Jehová Dios kimáꞌ imandamie̱ntoj, iwá̱n ijkí̱n kichijkej: Itri̱buja Judá tapano̱tia̱yaj, iwá̱n itepotztajmej ya̱yaj itri̱buj Isacar, iwá̱n itepotztajmej itri̱buj Isacar ya̱yaj itri̱buj Zabulón, iwá̱n itepotztajmej itri̱buj Zabulón ya̱yaj itri̱buj Leví, kisa̱lojtia̱yaj kuawimej iwá̱n kuetaxmej yej iga kichi̱waj kuetaxtio̱pan.
Después ya̱yaj itri̱buj Rubén, itri̱buj Simeón iwá̱n itri̱buj Gad. Itepotztajmej yejeme̱n ya̱ya seꞌ grupo yej itrí̱bujsan Leví, kisa̱lojtia̱yaj inó̱n yej ken baúl yej kijliáj arca del pactob, iwá̱n altar ka̱n motatiá ofrenda yej kimakaj Dios, iwá̱n candelabro yej kipiá siete imajma̱ꞌ ka̱n xo̱taj iwá̱n nochi yej moneki kuetaxtio̱pan‑ijtiꞌ. Después ya̱yaj itri̱buj Efraín, itri̱buj Manasés iwá̱n itri̱buj Benjamín iwá̱n yej ma̱jya tatepotztaj ya̱yaj, itri̱buj Dan iwá̱n itri̱buj Aser iwá̱n yej itri̱buj Neftalí.
Nejnenkej miaꞌ día este que asikej ipan se̱ desierto yej ito̱ka̱ꞌ Parán, ka̱n pe̱wa Canaán. Iwá̱n Dios kijlij Moisés:
—Xikti̱tani sekin tajta̱gaꞌ iga maki̱xmatitij kempa ta̱jli yej onoꞌ Canaán yej nia nimitzmakatij.
Moisés kitapejpen se̱ israelita ipan sejse̱pa tribu iwá̱n iga inochímeja masiꞌ doce tajta̱gaꞌ, iwá̱n Moisés ijkí̱n kijtoj:
—Xa̱ka̱n Canaán, iwá̱n xikitaka̱n ix ken onoꞌ in ta̱jli, iwá̱n no̱ xikitaka̱n la gente yej cha̱ntitokej ompa, ix tajpalejkej, ix komatimej iwá̱n xikuajligaka̱n yej kito̱kaj ipan inó̱n país. Xitajtachaka̱n ka̱n anyawij.
Iwá̱n ino̱mej tajta̱gaꞌ yajkij, iwá̱n kitakej no̱ya̱n inó̱n ta̱jli yej onoꞌ Canaán. Kua̱ꞌ asiꞌ cuarenta día nó̱ya̱nya kitakej kén iga onoꞌ inó̱n ta̱jli. Iwá̱n kua̱ꞌ mokuépaja kitektejkej se̱ weyi racimo uva iwá̱n kisenwajligayaj o̱memej ipan se̱ kuawiꞌ. Iwá̱n asikej ka̱n onoya Moisés pan a̱ltepe̱ꞌ Cades yej onoꞌ ipan desierto yej ito̱ka̱ꞌ Parán.
Kua̱ꞌ asíkeja, diez de ino̱mej doce, yejeme̱n kijtojkej:
—Niajkaj Canaán iwá̱n nikitakej iga ipan inó̱n ta̱jli mopoxchi̱wa yej moto̱ka. Nigaj achi nikuajligaj yej ompiga moto̱ka iga xikitaka̱n kén iga onoꞌ ompiga. Eꞌ la gente yej cha̱ntitokej ompa poxsan tajpalejkej, iwá̱n a̱ltepe̱mej no̱ poxsan wejweyi iwá̱n ye̱ꞌchijtoꞌ imu̱rojyomej. Inochi tajta̱gaꞌ yej nikitakej poxsan wejwejkapamej.
Iwá̱n seꞌ ta̱gaꞌ tajtoj yej yajka no̱ Canaán yej ito̱ka̱ꞌ Caleb. Yéj ijkí̱n kijlij la gente:
—Ayꞌ xitzajtzitoka̱n, tiaka̱n sémiya iga matikuíka̱nya inó̱n ta̱jli. Tejeme̱n wel tikuiskej iga Dios yawi te̱pale̱wi̱ti.
Eꞌ ino̱mej diez sej kijtojkej:
—Ayá̱ꞌ wel tiawij, ino̱mej tajta̱gaꞌ yej ompa cha̱ntitokej poxsan tajpalejkej; iwá̱n awel tikta̱nili̱skej iwá̱n iyi̱xtajmej yejeme̱n, tejeme̱n ken tikita tichapolimej.
Kua̱ꞌ kikakikej yej kijtojkej inó̱n diez tajta̱gaꞌ, inochi gente momajtijkej iwá̱n ayá̱ꞌ kicre̱dojkej yej Caleb iwá̱n Josué kijtojkej. Iwá̱n pe̱wakej iga ma̱ltajtojkej iga Moisés iwá̱n Aarón, iwá̱n ijkí̱n mose̱se̱pan‑ijlia̱yaj:
—Matikta̱lí̱ka̱nya seꞌ yej mateojkui̱lti iwá̱n matia̱ka̱n sej Egipto.
Caleb iwá̱n Josué ijkí̱n kijlij la gente:
—Amo ximajmawika̱n. Inó̱n ta̱jli yej onoꞌ Canaán poxsan ye̱ꞌta̱jli. Dios ya̱ti iwá̱n tejeme̱n iwá̱n yawi te̱makati inó̱n ta̱jli. Amo xikchi̱waka̱n yej aye̱kti ico̱ntraj Dios.
Iwá̱n inochi gente kuejkuesiwikej iwá̱n kinekiáj makitewi̱ka̱n, eꞌ iweyipode̱r Dios ne̱siko ipan kuetaxtio̱pan iyi̱xtaj la gente, iwá̱n Dios kijlij Moisés:
—Ini̱mej gente nikne̱xtílija miaꞌya ve̱j nopode̱r iwá̱n aya̱ꞌsan ne̱weyimati̱ltiáj. ¿Este ké̱manoꞌ má̱j anyawij amoconfia̱ro̱tij ipan nej? Iná̱n xikijli̱ka̱n iga inochi̱n yawij mikitij nigaj ipan desierto iwá̱n ayá̱ꞌ yawij kitatij ta̱jli yej nikijlij iga nia nikmakatij. Eꞌ nosie̱rvoj Caleb iwá̱n Josué yej moconfia̱rojkej ipan nej, yejeme̱n kena, yawij kalakitij. Nimitznojma‑ijliáj iga ni agaj de amejeme̱n yawi kalakiti ipan ta̱jli de Canaán; eꞌ amopilowa̱n kena, yawij ki̱xmatitij kua̱ꞌ yo̱léjkeja. Mo̱sta amejeme̱n anya̱tij sej ipan desierto iwá̱n ompiga anyawij annemitij cuarenta años este que ximikika̱n, mochi̱was se̱ año ipan sejsé̱ de ino̱mej día ke̱ꞌ mitzwi̱guilijkej iga ankitato̱yaj ta̱jli. Má̱j má̱j amopilowa̱n iwá̱n amonie̱tojwa̱n yawij kalakitij Canaán.
Iwá̱n inó̱n diez tajta̱gaꞌ yej yajkaj kitato̱yaj ta̱jli iwá̱n Caleb iwá̱n Josué, ino̱mej diez, Dios kichij iga mayojyokamikika̱n iga kidesanima̱rojkej israeli̱tajmej iga amo mamoconfia̱ro̱ka̱n ipan Dios.
Kua̱ꞌ Moisés kijlij inochi gente iga mikikej inó̱n diez tajta̱ga, mokno̱matikej. Eꞌ ipan seꞌya día moketzkej isájpasan, tejkajkej iyi̱xko tepe̱ꞌ iwá̱n kijtojkej:
—Eꞌ iná̱n nigaj tonokej na̱ꞌya Canaán, tiawij tasítijsan ipan ta̱jli ka̱n Dios te̱makasneki.
Eꞌ Moisés kijtoj:
—Amo xikchi̱waka̱n ken Dios ayá̱ꞌ kineki. Siga ijkó̱n ankichi̱waj, Dios ayá̱ꞌ yawij mitzpale̱wi̱tij, ijkó̱n wel mitzmiktiáj yej te‑ijiyaj.
Eꞌ yejeme̱n malej ijkó̱n kijlijkej, yájkijsan Canaán. Iwá̱n tajta̱gaꞌ de Canaán kimiktijkej miaꞌ israeli̱tajmej, kita̱nilijkej iwá̱n kitalo̱chtijkej ipan desierto. Iwá̱n israeli̱tajmej yej ayá̱ꞌ mikikej, yajkij sej ka̱n onoꞌ Moisés.