Dios kiyo̱lchika̱wa yej kichi̱wa ken yéj kijtowa, iwá̱n kikno̱chi̱wa yej ayá̱ꞌ kichi̱wa ken Dios kijtowa
Levítico 26
48
Dios no̱ kijlij Moisés:—Nej amoDio̱s, iwá̱n siga ankichi̱waj ken nimitztekimakaj, poxsan nimitzye̱ꞌchi̱waskej. Kua̱ꞌ amasiskej ipan ta̱jli yej nimitzmakaskej, wetzis tiawa̱ꞌ kua̱ꞌ nokta to̱kalo, pox mochi̱was yej ankito̱kaskej iwá̱n kuawimej poxsan ta̱kiskej. Ayá̱ꞌ anmajmaya̱naskej iwá̱n wel anye̱ꞌonoskej. Ateyis aníma̱l yej mitzmajmajti̱skej. Amejeme̱n ankitalo̱chti̱skej yej mitzijiyaj iwá̱n anyawij ankita̱nili̱tij. Iwá̱n nochipa nonos amowa̱n, iga nej amoDio̱s yej nimitztapejpenkej.
’Eꞌ siga ayá̱ꞌ ankichi̱waj ken nimitzijliáj, nia nimitzikno̱chi̱watij iga ximajmawika̱n, anyawij amenferma̱ro̱tij iwá̱n anmokno̱matiskej. Bá̱ldejsan antatojto̱kaskej ipan amómi̱l iga ita̱kilka yawij kikua̱tij yej mitzijiyaj. Anne̱kueso̱skej iwá̱n yej mitzijiyaj mitzta̱nili̱skej, iwá̱n mitzmanda̱ro̱skej. Nimitzti̱tanili̱skej te̱kua̱nimej yej mitzmiktili̱skej amopilowa̱n iwá̱n amoyo̱lka̱ꞌ. Poxsan anmaya̱naskej iga poxsan a̱pistajtiás iwá̱n ankikua̱skej este amopilowa̱n. Wi̱tzeskej yej tachtekij iwá̱n kipolo̱skej amoa̱ltepe̱mej iwá̱n amejeme̱n ancholo̱skej iwá̱n ómpaya ise̱lti ankikajte̱waskej amóta̱l. Iwá̱n anmikiskej ipan ita̱lmej yej mitzijiyaj.
’Malej iga xonoka̱n ipan ipaí̱s ka̱n mitzijiyaj, ayá̱ꞌ nia nimitzpolo̱tij niga nimitzijiyaskej. Ma̱jwaꞌ nikejla̱mikis kua̱ꞌ nimotajto̱ltij iwá̱n Jacob, iwá̱n Isaac iwá̱n Abraham, iwá̱n nimitzikne̱li̱skej iga nej amoDio̱s.