Día kua̱ꞌ Dios tae̱lka̱wiliá yej aye̱kti mochi̱wa
Levítico 16
46
Kua̱ꞌ mikíkeja ipilowa̱n Aarón, Dios kijlij Moisés:—Iga amo mamiki Aarón, xikijli amo makalaki ná̱mo̱l hora iyi̱ka̱mpa cortina ka̱n moto̱ka̱wiá “Ka̱n Dios nokta onoꞌ”. Makalákisan se̱ ve̱j al año inó̱n día kua̱ꞌ nike̱lka̱wiliá yej aye̱kti kichi̱waj israeli̱tajmej. Kua̱ꞌ kalakis Aarón, mama̱lti iwá̱n mamotapajpata, makaki itzótzol yej ista̱ꞌ. Mane̱miktili se̱ to̱rojtzi̱n iga manike̱lka̱wili iga kichijkej yej aye̱kti, yéj iwá̱n ipilowa̱n. Iwá̱n inó̱n to̱rojtzi̱n iyesyo makinechkowili iwá̱n makiwi̱ga kuetaxtio̱pan‑ijtiꞌ ka̱n moto̱ka̱wiá “Ka̱n Dios nokta onoꞌ”. Kua̱ꞌ ásisya ompa, mata‑ajtzelwi iga esti iyi̱xko arca. No̱ makiwi̱ga incienso ta‑ijtiꞌ iga ipo̱kyo makitzakua inó̱n arca iga Aarón amo mane‑ita iwá̱n amo mamiki.
’Después ya̱ti ka̱n onoꞌ ikalte̱nyo ikola̱lyo kuetaxtio̱pan, iwá̱n israeli̱tajmej yawij kiwajliguili̱tij o̱me chivoa iga manike̱lka̱wili̱ka̱n iga kichijkej yej aye̱kti. Aarón kikuis se̱, iwá̱n makimikti iwá̱n makinechkowili iyesyo, iga makiwi̱ga ka̱n nej nokta nasi, iwá̱n iga inó̱n esti makajtzelwi arca iwá̱n sej maki̱sa.
’Iwá̱n makikui se̱ chivo, iwá̱n makita̱li iyo̱mexti ima̱ꞌ ipan itzontekon chivo, iwá̱n makitajtanili Dios iga make̱lka̱wili israeli̱tajmej iga kichijkej yej aye̱kti. Inó̱n kijto̱jneki iga chivo kiwí̱gaya yej aye̱kti kichijkej la gente. Después se̱ ta̱gaꞌ makiwi̱ga inó̱n chivo poxsan wejka iwá̱n makimajka̱wa ipan desierto.
’Aarón sej makalaki kuetaxtio̱pan‑ijtiꞌ, mamotapajpata, iwá̱n sej mama̱lti iwá̱n makaki itzótzol yej azu̱ltiꞌ. Kua̱ꞌ kí̱sasya kuetaxtio̱pan‑ijtiꞌ makikui o̱me borrego yej de se̱ año, se̱ iga iyofre̱ndaj yéj iwá̱n iga ipilowa̱n, iwá̱n seꞌ iga la gente. Makimikti inó̱n o̱me borrego iwá̱n makita̱tajkolo iwá̱n makitati. Ijkó̱n iga cada año makitajtani perdón iga yéj iwá̱n iga la gente kichijkej yej aye̱kti.
’Kitati̱j ipan altarb itomajka inó̱n yo̱lka̱ꞌ yej kimiktij iga ofrenda iga mochij yej aye̱kti, iwá̱n kiki̱xti̱j ka̱n onokej inó̱n to̱rojtzi̱n iwá̱n inó̱n chivo iga yej mochij yej aye̱kti iwá̱n kitati̱skej ipan tiꞌti ikuetaxyo, inakayo iwá̱n ikuiꞌ. Inó̱n tokni̱n yej kitati̱j yawi motapa̱ki̱ti, ma̱lti̱j iwá̱n kalakis ka̱n onokej.
’Yej kiwi̱gaꞌ chivo ipan desierto, motapa̱ki̱j iwá̱n ma̱lti̱j iwá̱n kalakis sej ka̱n onolo̱ꞌ.
’Iní̱n mochi̱was se̱ ley yej nochipa yawi onoti iga amejeme̱n: ipan día diez ipan mes siete anyawij anmayuna̱ro̱tij iwá̱n amo xitekipano̱ka̱n niga amejeme̱n yej an‑israeli̱tajmej niga yej ayéj israeli̱tajmej yej onoꞌ iwá̱n amejeme̱n. Porque ipan iní̱n día, se̱ ve̱j al año anne̱sentajtanili̱skej perdón iga ankichijkej yej aye̱kti.