Kén iga mopurifica̱rowa siwa̱ꞌ kua̱ꞌ taonóltija, iwá̱n kén iga makichi̱wa se̱ kua̱ꞌ kipiá lepra
Levítico 12:1‑8; 13:45‑46; 14:1‑13
45
Iwá̱n Dios kijlij Moisés:—Kua̱ꞌ se̱ siwa̱ꞌ kita se̱ ipiltzi̱n yej choochi̱n, yawi onoti ken sokiyoj no‑i̱xtaj siete día. Choochi̱n yawij kicircuncida̱ro̱tija kua̱ꞌ asis ocho día iga nace̱roj, eꞌ iye̱xo̱lo̱ꞌ yawi onoti icha̱n treinta y tres día, iwá̱n welja sej yawi tio̱pan. Eꞌ siga kita ipiltzi̱n yej taochi̱n, yawi onoti ken sokiyoj no‑i̱xtaj, o̱me semanas iwá̱n yáwi‑oꞌ má̱j onoti icha̱n seꞌ sesenta y seis día. Kua̱ꞌ ásisya día, yawi kiwi̱guili̱ti sacerdote iga ofrenda se̱ borre̱gojtzi̱n yej kipiaya se̱ año. Wa̱n siga ayá̱ꞌ kipiá se̱ borre̱gojtzi̱n, wel kiwi̱ga o̱me so̱lin o o̱me jojtoko.
’Kua̱ꞌ se̱ de amejeme̱n makipiá kokolis yej ito̱ka̱ꞌ leprab ipan ikajlo̱ꞌ, ayá̱ꞌ yawi mocha̱nti̱ti iwá̱n sekin. Iwá̱n kua̱ꞌ agaj makina̱ꞌtecho, iwá̱n inó̱n yej le̱prajyoj maxa̱ygatzakto, néma̱nsan matachi̱xto iwá̱n makijto: “Nikokolisyoj, nikokolisyoj.”c Siga inó̱n lepra pojpoliwi, inó̱n ya̱ti ka̱n onoꞌ se̱ sacerdote iga makita siga ye̱ktiaꞌya. Siga inó̱n sacerdote kitas iga ye̱ktítoꞌya, tatekimakas iga mamokuiti o̱me to̱to̱ꞌ. Iwá̱n makimikti se̱ to̱to̱ꞌ ipan a̱ko̱miꞌ, iwá̱n makaki to̱to̱ꞌ yej isatoꞌ ipan esti iwá̱n iga inó̱n esti makajtzelwi inó̱n yej we̱titoya iwá̱n makinojma‑ijto iga ye̱ktiaꞌya. Iwá̱n makimajká̱waya in to̱to̱ꞌ yej isatoꞌ.
’Yej ye̱ktiaꞌya iga kipiaya lepra, yawi motapa̱ki̱ti iwá̱n yawi motzonki̱xti̱ti iwá̱n yawi mote̱ntzonwawa̱nati. Iwá̱n yawi ma̱lti̱ti iwá̱n ka̱wis chipaktiꞌ iwá̱n ijkó̱n wel sej mocha̱ntiá ka̱n onolo̱ꞌ. Kua̱ꞌ pánoja siete día, makiwi̱ga tio̱pan e̱yi borre̱gojtzitzi̱n yej de se̱ año iga ofrenda, o̱me yej okich iwá̱n se̱ yej siwa̱ꞌ, mane̱wajliguili. Iwá̱n íkua̱ꞌya pe̱was iga ye̱ꞌonos no‑i̱xtaj.