Dios kine̱xtiliá israeli̱tajmej yej wel makikua̱ka̱n
Levítico 11:1‑23, 29‑30, 42
44
Dios kijlij Moisés iwá̱n Aarón:—Xikijli la gente: de inochi anima̱lmej yej onoꞌ ipan ta̱jli, welsan kikuaj yej istimaxaltiꞌ iwá̱n yej ki‑ojpakue̱chowa itakuájkual. Eꞌ siga ki‑ojpakue̱chowa itakuájkual, iwá̱n ayá̱ꞌ istimaxaltiꞌ, ken camello, inó̱n awel ankikuaj. O siga istimaxaltikej, eꞌ ayá̱ꞌ ki‑ojpakue̱chowa itakuájkual, ken koyame̱ꞌ, ino̱mpa yo̱lka̱ꞌ amo no̱ xikua̱ka̱n.
’Inochi yo̱lka̱mej yej onokej ipan a̱ꞌti, welsan ankikuaj yej kipiá iya̱stakápal iwá̱n yej kipiá iyajwayo. Eꞌ yej ayá̱ꞌ kipiá iya̱stakápal niga iyajwayo, inó̱n awel ankikuaj.
’Ini̱mej to̱to̱mej yej awel ankikuaj: águila, tekolo̱ꞌ, kui̱xin, mo̱xi, a̱wojno iwá̱n murcie̱goj.
’Amo xikua̱ka̱n nisé̱ ta̱kayo̱ꞌ yej pata̱ni iwá̱n yej nejnemi. Eꞌ siga kipiá imaxaꞌmej iwá̱n iyikxi iga wito̱ni, ken chapolin o no̱ntzi̱n, ini̱mpa kena, wel ankikuaj.
’Iwá̱n amo xikua̱ka̱n iní̱mejpa yo̱lka̱mej: Kuakimichtzi̱n, rato̱n, ka̱la̱ꞌ, witztakuatzi̱n iwá̱n pi̱ni.
’Wa̱n nochi yej moe̱lwawatatzowa iwá̱n nochi yej quipiá na̱wi o má̱j iyikxi yej moe̱lwawatatzowa ipan ta̱jli amo xikua̱ka̱n iga Dios ayá̱ꞌ kiye̱ꞌita iga mamokua.