Ken iga mamomaka ofrenda Dios
Levítico 1:1‑17; 2:1‑10, 13; 3:1‑17; 4:27‑31; 6:1‑7, 20
42
Iwá̱n Dios kijlij Moisés:—Kua̱ꞌ agaj ne̱makasnekis ofrenda, makiwajliga se̱ toro. Siga ayá̱ꞌ kipiá, wel makiwajliga se̱ borrego o se̱ chivo. Siga ayá̱ꞌ kipiá borrego niga chivo, wel makiwajliga o̱me so̱lin o o̱me jojtoko. Makiwajligaka̱n iyofre̱ndajmej ipansan ikalte̱nyo ipa̱tiojyo kuetaxtio̱pan iwá̱n se̱ sacerdote yawi mitzkui̱li̱tij. Yej ite̱ko toro o borrego yawi kita̱li̱ti ima̱ꞌ ipan itzontekon yo̱lka̱ꞌ, iga mane̱si iga inó̱n yo̱lka̱ꞌ yawi mikiti iga itechko ite̱ko. Iwá̱n sacerdote yawi kinechko̱ti iyesyo iwá̱n yawi kajtzelwi̱ti itejte̱mpan fogo̱n ka̱n onoꞌ tékol. Despué̱j kixi̱pe̱wili̱j ikuetaxyo, kite̱tekis iwá̱n kaki̱j tiko iga matata inewi.
’Si agaj ne̱wajliguili̱jneki ofrenda yej itáto̱ꞌpa, makiwajliga, harina, aceite iwá̱n incienso. Sacerdote kikuis alí̱n harina iwá̱n aceite, eꞌ kikuis inewi incienso, iwá̱n kiwi̱gas ka̱n onoꞌ fogo̱n ipan tékol iwá̱n kitati̱j. Iwá̱n yej ka̱wis harina iwá̱n aceite yawij kikua̱tij sacerdo̱tejmej. Malej iga alí̱n makitati̱ka̱n ofrenda, nej nia nikitati kenkua̱ꞌ inewi ne̱tatilijkej iga nomako̱ka.
’Inewi ofre̱ndajmej yej kiwi̱gaskej nocha̱n, makistawi̱ka̱n.
’Si agaj ne̱wajliguili̱jneki se̱ ofrenda iga ne̱agradece̱rowa iga ye̱ꞌono, makiwajliga se̱ toro, se̱ borrego o se̱ chivo, iwá̱n inó̱n ofrenda makiwajligaka̱n yej má̱j ye̱kti. Inó̱n sacerdote, kimikti̱j iwá̱n iga iyesyo kajtzelwi̱j itejte̱mpan fogo̱n, yáwisan kitati̱ti itomajka, iwá̱n ikuitápi̱l iwá̱n ikuitáxkol. Iní̱n yej amo xikua̱ka̱n: itomajka niga iyesyo.
’Si agaj kichi̱wa yej aye̱kti iwá̱n ayá̱ꞌ kimati siga kichij, málejsan ijkó̱n, kíchijsan yej aye̱kti no‑i̱xtaj. Iwá̱n kua̱ꞌ makimati iga kichij yej aye̱kti, makiwajliga se̱ chivo o se̱ borrego yej ye̱kti, iwá̱n mane̱maka ken se̱ ofrenda. Iwá̱n makita̱li ima̱ꞌ ipan itzontekon yo̱lka̱ꞌ, inó̱n kijto̱jneki iga inó̱n yo̱lka̱ꞌ yawi mikiti iga itechko ite̱ko. Iwá̱n sacerdote yawi kinechko̱ti esti iwá̱n yawi kikajkakalo̱ti ipan na̱wi ikua̱kua fogo̱n. Después yawi kitoya̱wati esti itzi̱ntan fogo̱n iwá̱n yawi kitati̱ti itomájkasan inó̱n yo̱lka̱ꞌ. Inó̱n makichi̱wa el sacerdote wa̱n iyesyo yo̱lka̱ꞌ, iwá̱n nej nia nike̱lka̱wili̱ti iga kichij yej aye̱kti.
’Si agaj kichij yej aye̱kti iga san kikajkayaj agaj iga kikui̱lij tejté̱, o kichi̱wilij tejté̱ yej aye̱kti, makixta̱wa iga tachteꞌ; eꞌ ayá̱ꞌ yawi kixta̱wati ke̱ꞌsan ipati̱ꞌ inó̱n yej kichij, sino que yawi kixta̱wati acha̱ má̱j komati. Ipan ino̱nsan día kua̱ꞌ moyo̱ltá̱lija iwá̱n inó̱n yej kichi̱wilij yej aye̱kti, íkua̱ꞌsan no̱ mane̱wajliguili se̱ ofrenda. Makitapejpena se̱ iborre̱goj yej ye̱kti iwá̱n makiwi̱guili sacerdote iga makimikti iga itechko ite̱ko, iwá̱n nej nia nike̱lka̱wili̱ti iga kichij yej aye̱kti.