Israeli̱tajmej kichi̱waj kuetaxtio̱pan
Éxodo 34:1‑4, 10‑16, 27‑35; 35:4‑36:4; 39:32‑43; 40:1, 17, 34‑38
41
Iwá̱n Dios kijlij Moisés:—Xine̱wajliguili o̱me patachteꞌti kensan yej tikta̱tapa̱n iwá̱n nia sej nikijkuilo̱ti ino̱mej diez mandamiento.
Iwá̱n Moisés kiwi̱gaꞌ ipan tepe̱ꞌ o̱me patachteꞌti, iwá̱n Dios kijlij:
—Nia nimitzpale̱wi̱tij poxsan ipan inó̱n ta̱jli ka̱n anyawij amocha̱nti̱tij. Yej iná̱n cha̱ntitokej ompa ayá̱ꞌ ne̱cre̱dowaj, iwá̱n nia niki̱xti̱tij ompa inó̱n seis nacio̱mej iga amejeme̱n xika̱wika̱n ompa. Eꞌ ximocuida̱ro̱ka̱n, amo ximoye̱ꞌitaka̱n iwá̱n yejeme̱n niga wel no̱ anmona̱miktiáj iwá̱n yejeme̱n; xikxiti̱nili̱ka̱n iyalta̱rmej ka̱n kiweyimati̱ltiáj idio̱smej iwá̱n xikpo̱postekili̱ka̱n iyi̱dolojmej. No̱ xiktzontekili̱ka̱n kuawimej iwá̱n kuatepomej ka̱n kiweyimati̱ltiáj iyi̱dolojmej yej onoꞌ ite̱noj alta̱rmej, iga amejeme̱n amo no̱ ankiweyimati̱lti̱skej. Petz nejsan nose̱lti xine̱weyimati̱lti̱ka̱n.
’Xikijkuilo iní̱n pacto yej nikchij mowa̱n iwá̱n israeli̱tajmej.
Kua̱ꞌ pánoja cuarenta día Moisés yajki sej ka̱n onoyaj la gente. Mie̱j iga onoya ipan tepe̱ꞌ, ayá̱ꞌ semi takuaj iwá̱n nité̱ ayá̱ꞌ konij. Kua̱ꞌ mokuepaꞌ kiwajligayay sej o̱me patachteꞌti ka̱n Dios kijkuiloj sej ino̱mej diez mandamientos. La gente kitalijkej ixa̱yaꞌ iga xo̱taya este ta‑i̱xse̱wia̱ya, iwá̱n poxsan majmawikej, ayagaj wel kitachi̱lia̱ya. Inó̱n iga Moisés moxa̱ygatzakuaꞌ iga se̱ kanaꞌtzótzol. Iwá̱n Moisés kijlij la gente:
—Amo ximajmawika̱n, xine̱na̱ꞌtecho̱ka̱n iga xikakika̱n yej Dios ne‑ijlij.
Iwá̱n ijkí̱n kichi̱waya Moisés. Kua̱ꞌ Moisés ta̱tapowaya iwá̱n Dios, moxa̱ygatapowa̱ya, iwá̱n kua̱ꞌ ta̱tapowaya iwá̱n ino̱mej gente moxa̱ygatzakuaya iga nochi majmawiáj iga kitachi̱lia̱yaj.
Iwá̱n Moisés kijlij israeli̱tajmej yej Dios kijlij iga makichi̱waka̱n ka̱n makiweyimati̱lti̱ka̱n. Iwá̱n kijlij iga makiwajligaka̱n ke̱ꞌya iga wel, inochi yej Dios kijtoj iga monekis.
Iwá̱n nochi yej kiye̱ꞌitakej, kiwijwi̱gakej yej iga mochi̱was kuetaxtio̱pan este pox pa̱panoj ke̱ꞌ Dios kitajtan.
Kua̱ꞌ nóchiya monechkoj, Moisés kino̱tzaꞌ Bezaleel, Aholiab iwá̱n inewi ino̱mej yej Dios kitapejpen iga inó̱n tekipáno̱l, iwá̱n kimakakej inochi yej iga mochi̱wa kuetaxtio̱pan.
Sejsé̱ de ini̱mej tajta̱gaꞌ kipe̱waltijkej iga kichi̱waj itekipano̱lmej. Iwá̱n kua̱ꞌ kitzo̱pi̱ltíjkeja, kiwi̱guilijkej Moisés. Iwá̱n Moisés kitaꞌ iga inewi inó̱n yej mochij, ka̱wiꞌ kensan Dios kijtoj iga mamochi̱wa. Iwá̱n Moisés kitajtanilij Dios iga ino̱mej gente maye̱ꞌonoka̱n.
Dios kijlij Moisés:
—Kua̱ꞌ asis año iga anki̱skej Egipto, ankiketzáskeja in kuetaxtio̱pan.
Iwá̱n ijkó̱n kichijkej kensan Dios kijtoj; kua̱ꞌ asiꞌ año iga ki̱skej Egipto, kiketzkej kuetaxtio̱pan.
Kua̱ꞌ tamiꞌ kichijkej inó̱n kuetaxtio̱pan ijkó̱n kensan Dios kijtoj, mixti yej kojmakatia̱yaj ipan desierto, moketzaꞌ iyi̱xko kuetaxtio̱pan iwá̱n iweyipode̱r Dios kite̱mij inó̱n kuetaxtio̱pan. Iwá̱n íkua̱ꞌya inó̱n mixti yej Dios kiti̱taniá nochipa onoya iyi̱xko kuetaxtio̱pan iwá̱n tayowaka̱n onoya se̱ tiwelo̱n iyi̱xko. Nochipa kua̱ꞌ inó̱n mixti majkokuiá, israeli̱tajmej kimatiaja iga yáwija sej ojkuitij.