Dios kine̱xtiliá israeli̱tajmej ken makichi̱waka̱n kuetaxtio̱pan
Éxodo 24:12‑18; 25:1‑27:21; 28:1‑4; 29:38‑42, 45; 30:1, 3, 7‑8; 31:1‑6
39
Despué̱j Dios kijlij Moisés:—Xitejkawi ipan tepe̱ꞌ iga niaoꞌ má̱j nita̱tapowati mowa̱n. Nia nimitzmakati o̱me patachteꞌti ka̱n nikijkuiloj yej nikijtowa iga xikchi̱waka̱n iga xikne̱xtili la gente.
Entonces Moisés tejkaj ipan tepe̱ꞌ. Yajkij iwá̱n Josué, iwá̱n Moisés kijlij we̱wetkej:
—Xine̱chaka̱n nigaj. Siga agaj kipiás problema, Aarón iwá̱n Hur yawij mitzpale̱wi̱tij.
Iwá̱n Moisés tejkaj ipan tepe̱ꞌ, iwá̱n mixti kitzakuaꞌ sej inó̱n tepe̱ꞌ. Iwá̱n kua̱ꞌ asiꞌ siete día, Dios tajtoj iwá̱n Moisés ipan mixti. Kua̱ꞌ ne̱siko iweyipode̱r Dios, iga israeli̱tajmej kitakej ken tikita se̱ tiꞌti yej welo̱niko iyi̱xko tepe̱ꞌ. Moisés onoya ompa iwá̱n Dios cuarenta día iwá̱n cuarenta yówal.
Dios kijlij Moisés:
—Xikijli la gente mane̱wajliguili̱ka̱n iga ofrenda ajachi de inochi yej nejpa nikmajmakakej. Mane̱makaka̱n ke̱ꞌya kinekiskej, ini̱mpa mane̱wajliguili̱ka̱n: oro, plata, cobre; tinta yej azu̱ltiꞌ, a̱xokotiꞌ, iwá̱n chi̱ltiꞌ; tzótzol yej poxsan ye̱kti, itzojmiyo chivo,a ikuetaxyo okichborre̱goj eꞌ mapinta̱doj iga yej chi̱ltiꞌ, kuetaxmej yej má̱j ye̱kti, takuaꞌkuawiꞌ; aceite iwá̱n especia.
’Inewi ini̱mej yej yawij kiwajligatij, yawi monekiti iga mochi̱was se̱ kuetaxtio̱panb ka̱n nej nonos tatajkoya̱n ka̱n amonokej. Iní̱n tio̱pan mochi̱was se̱ kuetaxtio̱pan yej wel ankixiti̱naskej nochipa kua̱ꞌ an‑ojkuiskej, iwá̱n wel sej ankiketzaskej ka̱n nej nia nimitzijli̱tij. Inó̱n kuetaxtio̱pan iwá̱n inewi yej onos tio̱pan‑ijtiꞌ mamedi̱ro achí̱n ke̱ꞌsan nia nimitzijli̱ti. 13 metro y medio makipiá iweyajka, 4 metros y medio ikoyajka iwá̱n 4 metros y medio iwejkapanka. Yej iga kola̱ltitos iye̱yixti ipetayo mochi̱was de tabla. Iwá̱n ipan seꞌ ipetayo ankiketzaskej cinco kuawiꞌ iwá̱n ípan ankipilo̱skej se̱ weyi tzótzol iwá̱n inó̱n mochi̱was ikalte̱nyo. Inó̱n kuetaxtio̱pan kipiás na̱wi ika̱pajyo: se̱ de tzótzol, iyi̱xko seꞌ yej ijkititos iga itzojmiyo chivo, despué̱j kiwi̱gas ikuetaxyo borrego yej chi̱ltiꞌ iwá̱n yej iyí̱xkoya makiwi̱ga ye̱ꞌkuetax.
’Iní̱n kuetaxtio̱pan tajkotzaktos iga se̱ weyi tzótzol yej kijliáj cortinac iga mamochi̱wa o̱me cuarto, inó̱n tzótzol mapilojto ipan na̱wi kuawiꞌ yej maa̱ltito iga oro. Ompa ka̱n má̱j ta‑ijtiꞌ moto̱ka̱wi̱j “Ka̱n Dios nokta onoꞌ”.d Ompa ankita̱li̱skej se̱ ken baúl yej chijtoꞌ iga takuaꞌkuawiꞌ yej ito̱ca̱ꞌ acacia iwá̱n maa̱ltito iga oro ka̱n anke̱naskej ino̱mej patachteꞌti ka̱n ijkuilijtoꞌ la ley. Ite̱ntzakka ankichi̱wili̱skej iga melaꞌo̱roj iwá̱n ípan maono o̱me ángel de oro yej tachí̱walpa yej kijliáj querubines. Ino̱mej querubines mamo‑i̱xna̱miktoka̱n iwá̱n iga iya̱stakapalmej makitzaktoka̱n yej ken baúl iwá̱n makitachi̱lijtoka̱n ite̱ntzakka. Inó̱n ken baúl kijliáj arca del pactoe iwá̱n mamedi̱ro se̱ metro wa̱n diez centímetros iweyajka, 65 centímetros ikoyajka iwá̱n 65 centímetros iwejkapanka.
’Iyi̱xko ite̱ntzakka, itajkoya̱n inó̱n o̱me̱n querubines, ompa sacerdote taajtzelwi̱j iga iyesyo yo̱lka̱mej yej kimiktiáj iga manikperdona̱rowili yej la gente kichijkej yej aye̱kti. Iyí̱xkosan arca nia nitajto̱ti iwá̱n nia nimitzijli̱ti yej makichi̱wa israeli̱tajmej.
’Ipan seꞌ cuarto ka̱n má̱j na̱ꞌsan kalte̱n, inó̱n moto̱ka̱wi̱j “Ka̱n yokachijtoꞌ iga Dios”.f Ajkopíkapa ankita̱li̱skej se̱ mesa maa̱ltito iga oro ka̱n ankita̱li̱skej doce pa̱n. Ino̱mej pa̱n kijto̱jneki sejsé̱ amorra̱zaj; ken tikijtowaj, ipilówa̱mpa sejsé̱ de los doce ipilowa̱n Israel.
’Iyi̱ka̱mpa inó̱n cuarto, iyi̱xtaj inó̱n mesa, onos ka̱n mota̱liá candelabro yej kipiás siete imajma̱ꞌ de oro. Ipan sejsé̱ imajma̱ꞌ kipiás se̱ ime̱chajyo ka̱n xo̱tas. Iwá̱n iyi̱xtaj inó̱n cortina ankita̱li̱skej se̱ altar maa̱ltito no̱ iga oro, ompa ankitati̱skej incienso. Nochi ini̱mej onotij ka̱n moto̱ka̱wiá “Ka̱n yokachijtoꞌ iga Dios”. Iwá̱n iga kalte̱n matzakto, xikpilo̱ka̱n se̱ tzótzol ipan cinco kuawiꞌ yej maa̱ltito iga oro.
’Ipan patio, iyi̱xtaj ipue̱rtajyo inó̱n kuetaxtio̱pan, ankita̱li̱skej se̱ ken fogo̱n de tepos ka̱n tita̱li̱skej iga kitati̱skej to̱rojmej iwá̱n borre̱gojmej yej ne̱makaskej. Ipan na̱wi ixomo̱lyo inó̱n altar, ankichi̱wili̱skej ikua̱kuamej de tepos. Xikta̱li̱ka̱n se̱ teposlavade̱roj ka̱n sacerdo̱tejmej kite̱mi̱skej iga a̱ꞌti iga moma̱pa̱kaskej. Ankichi̱waskej se̱ kóla̱l yej matzakto iga ista̱ꞌtzótzol iga makola̱ltito kuetaxtio̱pan, teposlavade̱roj iwá̱n altar. Makipiá 45 metro iweyajka, 22 metro y medio ikoyajka iwá̱n 2 metro wa̱n 25 centímetros iwejkapanka. Inó̱n kóla̱l chijtos iga ista̱ꞌtzótzol iwá̱n makipiá 60 itaketzalyo iwá̱n iga ipue̱rtajyo mochi̱was iga tzótzol yej mo‑ijkítipa, inó̱n mapilojto ipan na̱wi itaketzalyo. Ikalte̱nyo inó̱n kuetaxtio̱pan iwá̱n no̱ ikalte̱nyo inó̱n kóla̱l onotij iki̱sáya̱mpa to̱nati̱ꞌ.
’Niktapejpen Aarón iwá̱n ipilowa̱n yej ito̱ka̱mej: Nadab, Abiú, Eleazar iwá̱n Itamar, iga mamochi̱waka̱n nosacerdo̱tejmej. Aarón mochi̱was jefe de ino̱mej sacerdo̱tejmej iwá̱n amejeme̱n ankichi̱wili̱skej itzótzol yej pox ye̱kti yej makiye̱ꞌtachalti̱ka̱n iga mane̱si te̱ tekipáno̱l kipiá.
’Nochipa yowaltiꞌ kua̱ꞌ tané̱sisya, ankimikti̱skej se̱ borrego yej kipiaoꞌ se̱ año, nochipa xiktapejpenaka̱n yej má̱j ye̱kti iga xine̱makaka̱n. Ankinechko̱skej iyesyo ipan se̱ teposwajkalwé̱j wa̱n ankajtzelwi̱skej iga esti inajnakastan altar. Iyi̱xko altar ankitati̱skej inewi icue̱rpoj borrego. Anne̱makaskej iga ofrenda: harina, aceite iwá̱n u̱vaja̱yo̱ꞌ. Iwá̱n, tio̱taꞌ anne̱makaskej inó̱mpasan ofrenda. Nochipa yowáltiꞌsan iwá̱n kua̱ꞌ némiya takui̱kuiliwi, anne̱tatili̱skej se̱ borrego iga anne̱weyimati̱lti̱skej iga nonoꞌ amowa̱n.
’Nochipa yowaltiꞌ kua̱ꞌ Aarón ka̱ta̱lili̱j mecho̱mej, kitati̱j incienso ipan altar. Iwá̱n kua̱ꞌ Aarón kixo̱talti̱j mecho̱mej kua̱ꞌ nemiy tayowati, kitati̱j no̱ incienso.
’Nej niktapejpen Bezaleel, yej ipiltzi̱n Uri, yej ipíltzi̱mpa Hur, yej itri̱buj Judá, iwá̱n nikmáꞌ noEspí̱ritoj; nikne̱xtílija ken iga wel makichi̱wa kuetaxtio̱pan iwá̱n inewi ino̱mej yej yawi monekiti ipan kuetaxtio̱pan.
’No̱ niktapejpen Aholiab yej ipiltzi̱n Ahisamac yej itri̱buj Dan yej nikchij iga pox makimati inó̱n tekipáno̱l iga makipale̱wi Bezaleel iwá̱n sekin iga makichi̱waka̱n inochi yej nej nikijtoj.