Dios kimaka diez mandamiento israeli̱tajmej ipan tepe̱ꞌ yej ito̱ka̱ꞌ Sinaí
Éxodo 19:1‑6, 10‑18; 20:1‑17
37
Israeli̱tajmej nejnenkej e̱yi mes kua̱ꞌ asikej tepe̱te̱noj yej ito̱ka̱ꞌ Sinaí. Iwá̱n Dios kijlij Moisés iga matejkawi ipan tepe̱ꞌ iga matajto íwa̱n, iwá̱n ijkí̱n kijlij:—Amejeme̱n ankitakej ken nimitzki̱xtijkej Egipto. Siga inochi̱n ne̱cre̱dowaj iwá̱n kichi̱waskej ken nej nikijtowa, mochi̱waskej noge̱ntej yej niktapejpen iwá̱n nochipa nikpale̱wi̱skej. Mo̱sta se̱ día niwi̱ꞌ ipan se̱ weyimixti iga nitajto̱ki iwa̱mej. Xikijli̱ka̱n inochi̱n mama̱lti̱ka̱n iwá̱n mamotapajpataka̱n, iga íkua̱ꞌ niwi̱ꞌ ipan iní̱n tepe̱ꞌ iga nitajto̱ki iwa̱mej. Inochi̱n wel wi̱tzej iga makikakikij yej nia nikijto̱ti, eꞌ amo agaj matejkawi ipan tepe̱ꞌ niga makichijchimi. Niga va̱cajmej niga borre̱gojmej amo matejkawika̱n, yej yawi tejkawiti yawi mikiti.
Moisés temoj ipan tepe̱ꞌ iwá̱n kijlij ige̱ntej iga Dios tatekimáꞌ iga inochi mama̱lti̱ka̱n iwá̱n mamotapajpataka̱n.
Kua̱ꞌ asiꞌ e̱yi día, asiꞌ se̱ mixti este á̱tiꞌsan iwá̱n kitzakuaꞌ inó̱n tepe̱ꞌ. Tatikui̱niꞌ iwá̱n tapeta̱niꞌ iwá̱n tapo̱ktajtiáꞌ. Iwá̱n na̱watiꞌ pox recio ken ina̱wati̱lka se̱ trompeta. Ki̱saꞌ komati po̱kti ipan tepe̱ꞌ, iga Jehová temoj ipan tiwelo̱n, iwá̱n inochi momajtijkej. Iwá̱n Moisés kiwi̱gaꞌ israeli̱tajmej tepe̱tzi̱ntan. Inó̱n tepe̱ꞌ mo̱li̱naya kua̱ꞌ Dios tajtojtoya. Iwá̱n kijtoj ijkí̱n:
—Nej niJehová yej amoDio̱s. Nej yej nimitzki̱xtijkej Egipto ka̱n mitzikno̱chijtoyaj iga an‑escla̱vojtitoyaj.
’Amo xikweyimatika̱n seꞌ dios yej ayéj nej. Nejsan nose̱lti xine̱weyimatika̱n.
’Amo xikyokachi̱waka̱n tejté̱ yej mane̱si ken yej onoꞌ ipan cielo, niga yej ken onoꞌ ipan ta̱jli, niga yej onoꞌ ipan a̱ꞌti. Amo no̱ ximotankua̱ketzaka̱n ite̱noj ino̱mpa imagen niga xikweyimati̱lti̱ka̱n, iga nej niJehová yej amoDio̱s. Nejsan xine̱weyimati̱lti̱ka̱n. Yej ayá̱ꞌ ne̱weyimati̱lti̱skej niga no̱ ayá̱ꞌ ne̱nekiskej, nia nikikno̱chi̱watij, ijko̱nsan no̱ ipilowa̱n iwá̱n inie̱tojwa̱n iwá̱n inie̱tojwa̱n ipilowa̱n. Eꞌ nikyo̱lchika̱waskej yej kichi̱waskej ken nikijtowa iwá̱n yej ne̱nekiskej.
’Amo xikaja̱wilmatika̱n noto̱ka̱ꞌ. Nej nia nikikno̱chi̱wati yej kaja̱wilmatis noto̱ka̱ꞌ.
’Xikejla̱mikika̱n te̱ día mose̱wilo iwá̱n ximose̱wi̱ka̱n. Xitekipanó̱ka̱nsan seis día, eꞌ ipan siete día ximose̱wi̱ka̱n iwá̱n xine̱weyimati̱lti̱ka̱n. Inó̱n día amo matekipano ni agaj yej cha̱ntitoꞌ amocha̱n, niga moescla̱voj, niga moescla̱vaj, niga mokawa̱yoj, niga mobu̱rrojmej, niga mopaxa̱lowa̱ni, iga seis día ne̱wi̱guilij iga nikchij ta̱jli iwá̱n cielo, a̱ꞌti iwá̱n inochi yej onoꞌ, iwá̱n nimose̱wij ipan día siete. Inó̱n iga niktapejpen se̱ día iga amejeme̱n ximose̱wi̱ka̱n, yej mose̱wi̱j inó̱n día moye̱ꞌchi̱was.
’Xik‑respeta̱ro motaj iwá̱n moye̱ꞌ iwá̱n wel amonoskej miaꞌ año ipan inó̱n ta̱jli yej nimitzmakaj iga nej moDio̱s.
’Amo xitamikti̱ka̱n.
’Amo xike̱le̱wi isiwa̱ꞌ seꞌ ta̱gaꞌ, niga siwa̱ꞌ amo make̱le̱wi iwé̱j seꞌ siwa̱ꞌ.
’Amo xitachtekika̱n.
’Amo xitapanti̱ka̱n.
’Amo xikpiasnekika̱n yej agaj itatki; niga íkal, niga isiwa̱ꞌ, niga imo̱nsojmej, niga iyo̱lka̱mej, nité̱ nokta amo xikui̱li̱jneki moveci̱noj.
Nochi gente nechkatoyaj tepe̱tzi̱ntan, kikaktoyaj iga tatikui̱ntoya iwá̱n na̱watitoya trompeta, iwá̱n kitztoyaj iga tapeta̱ntoya iwá̱n ki̱stoya po̱kti ipan tepe̱ꞌ, iwá̱n pox majmawikej. Iwá̱n kijlijkej Moisés:
—Tej, Moisés, wel titajtowa iwá̱n Dios iwá̱n wel sej anne‑ijliáj yej kijtoj. Eꞌ amo mane̱no̱tzaka̱n Dios, iga amo nimikiskej.
Iwá̱n Moisés kijlij:
—Amo ximajmawika̱n, Dios nemi mitzne̱xtiliáj yej wel nokta kichi̱wa iga xikmajmawili̱ka̱n iga amo xikchi̱waka̱n yej aye̱kti iyi̱xtaj.