Dios kimaka a̱ꞌti iga makoni̱ka̱n israeli̱tajmej ipan desierto iwá̱n kipale̱wiáj iga makita̱nili̱ka̱n iyenemi̱gojwa̱n
Éxodo 17:1‑6, 8‑13; 18:25‑26
36
Después israeli̱tajmej sej ojkuikej iwá̱n asikej ipan íta̱l Refidim, iwá̱n ompa kiketzkej ikuetaxkajlimej, iwá̱n ompa ateyá no̱ a̱ꞌti, inó̱n iga israeli̱tajmej sej kikuesowilijkej Moisés, kijlijkej:—Xine̱makaka̱n a̱ꞌti iga manikoni̱ka̱n.
Iwá̱n Moisés kijlij ige̱ntej:
—¿Te iga anne̱kuesowiliáj? Ijkó̱n ankikuesowaj Dios.
Eꞌ israeli̱tajmej atamatiá iga mokuesowa̱yaj poxsan ico̱ntraj Moisés. Iwá̱n Moisés kite̱ne̱wij Dios iwá̱n kijlij:
—¿Té̱ nikchi̱was? Ali̱nsan poliwiá iga ne̱tewiá̱yaja.
Iwá̱n Dios kijlij:
—Xa̱ka̱n iwá̱n sekin we̱wetkej ka̱n onoꞌ se̱ weyiteꞌti yej nej nia nimitzne̱xtili̱ti. Iwá̱n xikwi̱teki teꞌti iwá̱n yawi ki̱sati a̱ꞌti iga amonochimej xikoni̱ka̱n.
Moisés kichij inewi kensan Dios kijlij. Kua̱ꞌ Moisés kiwi̱teꞌ teꞌti, we̱wetkej kitakej ken iga nemi ki̱sa a̱ꞌti, iwá̱n nochi israeli̱tajmej konijkej.
Mie̱j onoyaj Refidim, asikej amaleci̱tajmeja iga kimikti̱jnekiáj israeli̱tajmej. Iwá̱n Moisés kijlij se̱ israelita yej ito̱ka̱ꞌ Josué:
—Xiktapejpena sekin tajta̱gaꞌ iwá̱n xa̱ka̱n xikmijmikti̱tij amaleci̱tajmej. Mo̱sta nitejkawis ipan tepe̱ꞌ iwá̱n nikui̱gas nobasto̱n, iwá̱n Dios yawi te̱pale̱wi̱ti.
Josué kichij ken Moisés kijlij, iwá̱n ipan seꞌya día Moisés tejkaj ipan tepe̱ꞌ iwá̱n Aarón iwá̱n se̱ ta̱gaꞌ yej ito̱ka̱ꞌ Hur. Iwá̱n israeli̱tajmej iwá̱n amaleci̱tajmej pe̱wakej iga momijmiktiáj, iwá̱n mie̱j Moisés kajajkejtoya ima̱ꞌ iwá̱n kiki̱tzkijtoya ibasto̱n, israeli̱tajmej kita̱ntia̱yaj. Eꞌ kua̱ꞌ kitemowia̱ya ima̱ꞌ Moisés, amaleci̱tajmej sej kita̱ntia̱yaj. Iwá̱n kua̱ꞌ Moisés ma̱ko̱tiaꞌya iga kajajkoktoꞌ ima̱ꞌ, Aarón iwá̱n Hur kita̱lilijkej se̱ teꞌti iga mamota̱li iwá̱n kajke̱wilijtoyaj ima̱ꞌ. Ino̱mej o̱me̱n kajkokuilijtoyaj sejsé̱ ima̱ꞌ Moisés. Iwá̱n ijkó̱n ima̱ꞌ Moisés kajke̱wilijtoyaj este kua̱ꞌ kalaꞌ to̱nati̱ꞌ. Iwá̱n Josué kita̱nilij amaleci̱tajmej.
Poxsan tekipanowa̱ya Moisés iga isé̱ltisan kirresolve̱rowa̱ya kua̱ꞌ mokuejkuesowa̱yaj israeli̱tajmej. Inó̱n iga kitapejpen tajta̱gaꞌ yej wel makipale̱wi̱ka̱n. Iwá̱n yejeme̱n kijtowa̱yaj kén iga mamochi̱wa yejsan ga wel; eꞌ yej awel, kipano̱tilia̱yaj Moisés iga yéj makita.