Israeli̱tajmej panowaj ipan Tata̱ꞌláma̱r
Éxodo 13:17‑19, 21‑22; 14:5‑14, 19‑15:1
34
Kua̱ꞌ faraón kimájkaja israeli̱tajmej iga maki̱sáka̱nya, Dios kine̱xtilijkej ojti yej panowa ipan desiertoa yej yawi ipan láma̱r yej ito̱ka̱ꞌ Tata̱ꞌláma̱r. Kiwi̱gayaj yej iga moma̱nawiáj. Iwá̱n no̱ kiwi̱gayaj iyomiyomej José, iga yéj kua̱ꞌ aya miki, kijtoj ijkí̱n: “Nej nikmati iga se̱ día Dios yawij mitzki̱xti̱tij Egipto iga mitzwi̱gaskej ipan ta̱jli ka̱n Dios kijlij totajwa̱n iga yawij kimakatij, iwá̱n kua̱ꞌ anki̱saskej, nikneki xikui̱gaka̱n noomiyomej ompiga.”Dios tapano̱tia̱ya iga kojkui̱ltijtia̱ya israeli̱tajmej ka̱n nemi ya̱yaj. Ipan día iwa̱mej ya̱ya se̱ weyimixti iga kojkui̱ltijtia̱yaj, iwá̱n tayowaka̱n, iwa̱mej ya̱ya se̱ tiwelo̱n iga kita̱wijtia̱yaj, iga wel manejnemika̱n semilwiꞌ iwá̱n senyówal. Kua̱ꞌ faraón kitaꞌ iga israeli̱tajmej kí̱skeja Egipto, sejoꞌ kijtoj, “Mataj ayá̱ꞌ katka nikmajka̱wayaj”, iwá̱n kijlij ige̱ntej:
—Aye̱kti iga ki̱skej israeli̱tajmej; iná̱n ayꞌya tikpiáj yej tiktekipano̱ltiáj.
Iwá̱n kinechkoj inewi isolda̱dojmej iwá̱n yajkij kojtokatoj iga makikuepalti̱ka̱n sej Egipto.
Kua̱ꞌ israeli̱tajmej asikej ipan a̱te̱n Tata̱ꞌláma̱r, poxsan majmawikej iga ateyá ka̱n wel macholo̱ka̱n; iyo̱mexti lado onoya tepe̱ꞌ, iwá̱n itepotztajmej kitalo̱chtijtiwi̱tziayaj egi̱pciojmej. Iwá̱n israeli̱tajmej kijlijkej Moisés:
—¿Te iga anne̱wajligakej iga manimikika̱n ipan desierto? Áyoꞌwaꞌ katka niki̱skaj Egipto, máleja manonoka̱n iga escla̱vojmej.
Eꞌ Moisés ijkí̱n kijtoj:
—Amo ximomajti̱ka̱n, xonóka̱nsan, iwá̱n xikitaka̱n ken Dios yawi mitzma̱nawi̱tij.
Takó̱miya kua̱ꞌ asikej ipan láma̱r. Iwá̱n inó̱n mixti yej tapano̱tia̱ya ka̱wiꞌ tatepotztaj, iwá̱n mixti ka̱wiꞌ tajkoya̱n. Tapano̱tia̱yaj israeli̱tajmej iwá̱n itepotztaj mixti kitalo̱chtijtia̱yaj egi̱pciojmej. Ijkó̱n iga inó̱n mixti kojtzakuayaj egi̱pciojmej, iga inó̱n mixti kitako̱mitialtij ka̱n nemi ya̱yaj egi̱pciojmej iwá̱n awel asikej este ka̱n onoyaj israeli̱tajmej. Eꞌ israeli̱tajmej kita̱wijtia̱yaj tiwelo̱n.
Iwá̱n Dios kitekimáꞌ Moisés iga makajkokui ibasto̱n lama̱rkóbapa. Iwá̱n Dios kiti̱tan ejekaꞌ yej pox tajpalej iwá̱n nentoya senyówal. Iwá̱n ijkó̱n a̱ꞌti tajkowa̱guiꞌ iga moyojyokatij o̱me lado, iwá̱n israeli̱tajmej wel panojkej tajkoláma̱r, iga tapowiꞌ se̱ ojti ipan láma̱r iwá̱n sejsé̱ lado ne̱siá ken se̱ muro, iyo̱pochka̱mpa iwá̱n ila̱doj iye̱ꞌma̱ꞌ. Inó̱n iga kua̱ꞌ egi̱pciojmej asikej ipan lama̱rte̱n, kitakej iga láma̱r tajkowa̱ktoꞌ, inó̱n iga yejeme̱n moconfia̱rojkej iga kalakkej iwá̱n ikuacarre̱tajmej iwá̱n ikawa̱yojmej iga kitalo̱chtijtia̱yaj israeli̱tajmej. Dios kitaꞌ iga egi̱pciojmej yáwija kitecho̱tij israeli̱tajmej, inó̱n iga kirruejrrue̱dajki̱xtij ikuacarre̱tajmej egi̱pciojmej. Iwá̱n egi̱pciojmej kijtojkej:
—Maticholo̱ka̱n iga Dios nemi kipale̱wiá israeli̱tajmej.
Iwá̱n Dios kijlij Moisés:
—Xiktachalti mobasto̱n ipan a̱ꞌti iwá̱n yawij a̱tepachiwitij egi̱pciojmej iwá̱n yawij a̱mikitij.
Iwá̱n Moisés kajkoꞌ ibasto̱n iwá̱n láma̱r mosenechkoj. Inó̱n a̱ꞌti sej kitzakuaꞌ ojti; eꞌ faraón iwá̱n isolda̱dojmej a̱mikikej. Kua̱ꞌ tane̱siko, israeli̱tajmej kitakej egi̱pciojmej mijmiktókeja ipan a̱te̱n. Iwá̱n israeli̱tajmej takui̱kakej iga kiweyimati̱ltijkej Dios iga kima̱nawijkej kua̱ꞌ kitalo̱chtijtia̱yaj egi̱pciojmej.