Dios kikno̱chi̱wa sej egi̱pciojmej iwá̱n israeli̱tajmej kí̱saja Egipto
Éxodo 11:1‑2, 4‑7; 12:1‑38
32
Iwá̱n Dios kijlij Moisés:—Iná̱n nia nikchi̱wili̱ti tejté̱ faraón iwá̱n ige̱ntej, iga yéj ima̱tika makijto iga xiki̱sáka̱nya Egipto. Tajkoyówal nia nipano̱ti no̱ya̱n Egipto, iwá̱n yawij mikitij iyokichko̱pompilowa̱n egi̱pciojmej. No̱ mikiskej inewi iyokichko̱pompilowa̱n iyo̱lka̱mej. Eꞌ yej de amejéme̱mpa ni agaj ayá̱ꞌ mikis.
Dios kijlij Moisés iga iní̱n makijli israeli̱tajmej:
—Sejsé̱ yej te̱taj makimikti se̱ borre̱gojtzi̱n iga makisenkua iní̱n yówal iwá̱n ifami̱liaj. Iwá̱n yej ayá̱ꞌ miakejmej iwá̱n awel kitolowaj se̱ borre̱gojtzi̱n, wel kisenkuaj iwá̱n yej najna̱ꞌsan icha̱mej. Iwá̱n xiknechko̱ka̱n iyesyo iwá̱n xikakalo̱ka̱n ipan amokalte̱nketzaya̱n. Inakayo xikua̱ka̱n ta‑íxkal wa̱n kuaxiwiꞌ yej chichi̱ꞌ iwá̱n pa̱n yej ayá̱ꞌ kipiá levadura.a Amo xikua̱ka̱n xoxowiꞌnakaꞌ niga yej tamánal.
’Nimaní̱n xitakua̱ka̱n; eꞌ xitaajakijtóka̱nya, iwá̱n amogaꞌ xikajakijtóka̱nya iwá̱n amobasto̱n xiki̱tzkijtóka̱nya, iga inó̱n día iyilwi yej ito̱ka̱ꞌ la Pascua.b Iwá̱n inó̱n día nej nia nipano̱ti no̱ya̱n Egipto iwá̱n nia nikmikti̱ti iyokichko̱pompilowa̱n egi̱pciojmej iwá̱n iyokichko̱pompilowa̱n iyo̱lka̱mej. Eꞌ san nipano̱j ka̱n nikitas kakalijtoꞌ iyesyo borre̱gojtzi̱n ipan ikalte̱nketzaya̱n; iwá̱n ompa ayagaj mikis.
’Inó̱n día amejeme̱n anyawij ankejla̱mikitij iwá̱n anyawij ankilwichi̱wili̱tij nochipa. Cada año ankichi̱waskej se̱ ilwiꞌ iga anne̱weyimati̱lti̱skej. Siete día ankikuajtoskej pa̱n yej ayá̱ꞌ kipiá levadura; ipan achto día anke̱naskej inewi levadura yej onoꞌ amocha̱mej, iwá̱n ankichi̱waskej pa̱n yej ayá̱ꞌ kipiá levadura, iwá̱n ankijli̱skej amopilowa̱n te̱ mo‑ilwichi̱wiliá.
Moisés kijlij ije̱fejmej israeli̱tajmej inewi kensan Dios kijlij, iwá̱n ijkó̱n kichijkej la gente. Nochi familia kimiktij se̱ borre̱gojtzi̱n; iwá̱n kimano̱jojchijkej kuaxiwiꞌ yej ito̱ka̱ꞌ hisopo,c iga kikakalojkej iyesyo borrego ipan ikalte̱mej. Me̱roj tajkoyówal panoj iyá̱ngeld Dios no̱ya̱n ka̱n icha̱mej egi̱pciojmej iwá̱n mikikej iyokichko̱pompilowa̱n egi̱pciojmej. No̱ miguiꞌ iyokichko̱pompiltzi̱n faraón, iwá̱n inochimej cho̱kayaj iga mokno̱matiáj. Eꞌ israeli̱tajmej iyokichko̱pompilowa̱n ayá̱ꞌ mikikej iga kajkakalijtoya iyesyo borrego ipan ikalte̱mej.
Kua̱ꞌ faraón kimatiꞌ iga miguiꞌ iyokichko̱pompilowa̱n inochi egi̱pciojmej, tati̱tan iga makino̱tzatij Moisés malej iga tayowaka̱n, iwá̱n kijlij:
—¡Xá̱ka̱nyawaꞌ sémisan! Xiki̱saka̱n amonochimej ipan iní̱n nóta̱l iwá̱n xá̱ka̱nya xikweyimati̱lti̱tij amoDio̱s. Xikui̱gaka̱n amova̱cajmej iwá̱n amoborre̱gojmej ken ankijtojkej. Iwá̱n no̱ xiktajtanili̱ka̱n amoDio̱s iga maniye̱ꞌono.
Kua̱ꞌ aya ki̱saj Egipto, israeli̱tajmej kitajtanilijkej egi̱pciojmej yej itatkímejpa: oro, plata iwá̱n tzótzol yej poxsan patiyoj. Dios kichij iga ino̱mej egi̱pciojmej makiye̱ꞌitaka̱n israeli̱tajmej. Iwá̱n kua̱ꞌ ki̱skej israeli̱tajmej kiwi̱gakej miaꞌ yej pox patiyoj yej itatkímejpa egi̱pciojmej.
Kua̱ꞌ israeli̱tajmej ki̱skej Egipto ken seiscientos mil tajta̱gaꞌ, no̱ yajkij siwa̱tkej iwá̱n ko̱kone̱ꞌ; iwá̱n no̱ kiwi̱gakej inochi iyo̱lka̱mej.