Moisés yawi tajto̱ti iwá̱n faraón de Egipto
Éxodo 5:1‑21; 6:10; 7:6, 8‑13
30
Se̱ día Moisés iwá̱n Aarón yajkij tajto̱toj wa̱n faraón,a kijtojkej:—Yej nejeme̱n noDio̱s ne‑ijlijkej iga manikui̱gaka̱n ipan desierto inochi noge̱ntej iga manikweyimati̱lti̱tij Dios.
Faraón kijtoj:
—¿A̱ꞌyéj moDio̱s? Nej aniki̱xmati iwá̱n ayá̱ꞌ nimitzmajka̱waskej iga xa̱ka̱n. ¿Te iga ankichi̱waj iga la gente makikajte̱waka̱n itekipano̱lmej? Amo xikpolowili̱ka̱n tiempo la gente. Xaxa̱ka̱n xitekipano̱tij. Siga ayá̱ꞌ ankipiáj komati tekipáno̱l, nia nimitzmakatij má̱j.
Iwá̱n ino̱nsan día faraón kitekimakato yej kimanda̱rowaj escla̱vojmej:
—Iná̱n nike̱man amo xikmakaka̱n po̱lo̱ꞌ ini̱mej gente iga makichi̱waka̱n ladrillo ken achto ankichi̱wayaj. Iná̱n sejsé̱ de yejeme̱n makite̱mo̱tij ipo̱lo̱mej. Eꞌ makichi̱waka̱n acho̱nsan ladrillo ke̱ꞌsan achto kichi̱wayaj. Cuidáj ma̱jya alí̱n kichi̱waj; anka ayá̱ꞌ siatokej, inó̱n iga kinekij ma‑ilwichi̱watij ipan desierto.
Iwá̱n ino̱mej yej faraón kita̱lij iga matatekimakaka̱n, kitekimakakej israeli̱tajmej iga makichi̱waka̱n yej kijtoj faraón. Iwá̱n ino̱mej israeli̱tajmej yajkij kite̱mo̱toj po̱lo̱ꞌ este ka̱n kasiáj. Iwá̱n iga ayá̱ꞌ kimaxitia̱yaj itareyajmej, egi̱pciojmej kimagayaj poxsan israeli̱tajmej yej kinentia̱yaj ige̱ntej. Iwá̱n ino̱mej yej kinentia̱yaj israeli̱tajmej, yajkij tajto̱toj iwá̱n faraón iga kitajtanili̱toj iga makikne̱li̱ka̱n. Eꞌ faraón kijtoj:
—Amejeme̱n até̱ ankichijtokej. Iná̱n xa̱ka̱n xitekipano̱tij. Iwá̱n acho̱nsan sej xikchi̱waka̱n ke̱ꞌ achto ankichi̱wayaj.
Kua̱ꞌ yej kinentia̱yaj israeli̱tajmej ki̱skej ompa, kasikej Moisés iwá̱n Aarón iwá̱n kijlijkej:
—Amejeme̱n anne‑ijlijkej iga anyawij anne̱ma̱nawi̱tij; eꞌ iná̱n iga amotechko ma̱jya nemi ne‑ikno̱chi̱waj.
Inó̱n iga israeli̱tajmej kijiyayaj Moisés iwá̱n Aarón. Iwá̱n Moisés tajtoj iwá̱n Dios iga kitajtanilij iga makine̱xtili te̱ yawi kichi̱wati, iwá̱n Dios kijlij:
—Tia tikitati yej nia nikchi̱wili̱ti faraón iwá̱n egi̱pciojmej. Ijkó̱n noge̱ntej wel ki̱saskej.
Iwá̱n Moisés iwá̱n Aarón yajkij sej kitatoj faraón iwá̱n kijlijkej:
—Jehová ijkí̱n kijtoj: “Xikmajka̱wa noge̱ntej iga mane̱weyimati̱lti̱tij.”
Faraón kijtoj:
—¿A̱ꞌyéj o̱n Jehová? ¿Te iga manikchi̱wa ken yéj kijtowa? Ne̱ne̱xtili tejté̱ yej ayi̱ꞌpa mo‑ita iga manicre̱do iga Jehová mitzti̱tankej.
Iwá̱n Aarón kita̱lij ta̱lpan ibasto̱n, iwá̱n inó̱n bastón mochij kowa̱ꞌ. Ompa onoyaj no̱ yej tamatij iwá̱n bro̱jojmej yej tekipanowaj iga faraón. Yejeme̱n no̱ kita̱lkej ibasto̱mej ipan ta̱jli iwá̱n no̱ mochijkej kowa̱ꞌ. Eꞌ kowa̱ꞌ yej kichij Aarón, kijkikuaj ikowa̱mej ino̱mej bro̱jojmej. Despué̱j Aarón kikuitapi̱lki̱tzkij kowa̱ꞌ iwá̱n mochij sej bastón. Eꞌ faraón poxsan katka yo̱ltakuaktiꞌ, niga kitajto̱lkuikej in Moisés iwá̱n Aarón. Iwá̱n ayá̱ꞌ kineꞌ iga israeli̱tajmej maki̱saka̱n Egipto.