Dios kitapejpena Moisés iga makipale̱wi israeli̱tajmej, yej igé̱ntejpa
Éxodo 3:1‑ 4, 18, 20, 27‑31
29
Se̱ día Moisés kicuida̱rojtinemiá iborre̱gojmej imontaj ipan se̱ tepe̱ꞌ yej ito̱ka̱ꞌ Horeb. Iwá̱n ompa iyá̱ngela Dios mi̱xne̱xtij ipan se̱ witztako̱ꞌ, we̱welo̱ntoya, eꞌ inó̱n witztako̱ꞌ ayá̱ꞌ tataya. Iwá̱n Moisés kijtoj: “Nia nikitati te iga ayá̱ꞌ tata ine̱pa witztako̱ꞌ.” Kua̱ꞌ Moisés kina̱ꞌtechojtia̱yay, kikaguiꞌ itájto̱l Dios ipan witztako̱ꞌ, kijlij:—Moisés, amo xine̱na̱ꞌtecho. Xikijki̱xti mogaꞌ iga tej note̱noj tonoꞌ. Nejwaꞌ iDio̱s mo‑ikyapatajwa̱n; Abraham, Isaac iwá̱n Jacob.
Iwá̱n Moisés mo‑i̱xtzakuaꞌ iwá̱n momajtij iga wel miki siga kita Dios. Eꞌ Dios kijlij:
—Nej nikmati iga noge̱ntej yej niktapejpen poxsan kikno̱chijtokej Egipto, inó̱n iga niwa̱laj iga manikma̱nawi̱ka̱n ka̱n kikno̱chijtokej. Nej nia niki̱xtiti Egipto iwá̱n nia nikui̱gatij ipan yé̱ꞌta̱l. Xaj Egipto iga xikijli̱ti rey faraón iga makimajka̱wa noge̱ntej yej ompa onokej.
Iwá̱n Moisés kijlij Dios:
—Eꞌ nej ayéj te̱ noteki iyi̱xtaj faraón iga manikijli iga mane̱majka̱wa nej iwá̱n nokni̱wa̱n israeli̱tajmej.
Iwá̱n Dios kijtoj:
—Nej nia̱ti mowa̱n iwá̱n nia nimitzpale̱wi̱ti. Ijkó̱n wel titajto̱j iyi̱xtaj faraón. Kua̱ꞌ noge̱ntej tikí̱xtija Egipto, yawij wi̱tzetij nigaj iga ne̱weyimati̱lti̱kij ipan iní̱n tepe̱ꞌ.
Moisés kijtoj:
—Eꞌ siga nia̱ti, iwá̱n manikijli noge̱ntej iga Dios ne̱ti̱tan, yejeme̱n ne̱tajtaniskej: “¿Té ito̱ka̱ꞌ inó̱n Dios yej mitzti̱tan?” Iwá̱n ¿kén nikijli̱skej?
Iwá̱n Dios kijtoj:
—Nej yej nochipa Nej. Inó̱n iga ijkí̱n tia tikijli̱ti moge̱ntej: “Jehová yej nochipa Dios, yej iDio̱s to‑ikyapatajwa̱n, Abraham, Isaac iwá̱n Jacob, ne̱ti̱tan.” Despué̱j xiknechko we̱wetkej de Israel iwá̱n xaj iwa̱mej, iga xikitatij nuevo rey de Egipto, iwá̱n xikijli̱ka̱n: “Achi xine̱majka̱waka̱n iga mania̱ka̱n e̱yi día ipan desiertob iwá̱n nochi noge̱ntej iga manikmikti̱tij yo̱lka̱mej iga manikweyimati̱lti̱ka̱n noDio̱s.” Yéj ayá̱ꞌ kinekis iga xa̱ka̱n este que manikne̱xtili miaꞌ ve̱j nopode̱r. Íkua̱ꞌya sí yáwija mitzmajka̱watij iwá̱n anki̱sáskeja. Eꞌ nej nia nikchi̱wati iga egi̱pciojmej mamitzye̱ꞌitaka̱n amonochi̱n iga kua̱ꞌ anki̱saskej, mamitzmakaka̱n kuajkuantas yej poxsan patiyoj. Ijkó̱n iga egi̱pciojmej ankikui̱li̱skej yej yejéme̱mpa itatkimej.
Iwá̱n Moisés kijtoj:
—Yejeme̱n ayá̱ꞌ ne̱cre̱do̱skej. Ne‑ijli̱skej: “Ayéj Dios mitzti̱tan.”
Dios kijlij:
—¿Té̱ tiki̱tzkijtoꞌ?
Iwá̱n Moisés kijtoj:
—Se̱ bastón yej iga nikpe̱wa borre̱gojmej iga amo mapa̱payi̱nika̱n ipan ojti.
Iwá̱n Dios kijlij:
—Inó̱n bastón xikta̱li ta̱lpan.
Kua̱ꞌ Moisés kita̱lij ta̱lpan in inó̱n bastón, mochij kowa̱ꞌ. Moisés kimajmawilij in inó̱n kowa̱ꞌ iwá̱n kicholowilia̱ya. Iwá̱n Dios kino̱tzaꞌ sej, kijlij:
—Xikuitapi̱lki̱tzki.
Moisés kiki̱tzkij iwá̱n sej mochij bastón. Iwá̱n Dios kijlij sej:
—Xikaki moma̱ꞌ mokua̱chtampa.
Iwá̱n Moisés kakij. Iwá̱n kua̱ꞌ kiki̱xtij, kitaꞌ iga ima̱ꞌ kipiayay lepra,c inó̱n lepra yej kixiti̱ntiá tokajlo̱ꞌ. Dios kijlij:
—Iná̱n sej xikaki moma̱ꞌ mokua̱chtampa.
Iwá̱n yéj kakij. Kua̱ꞌ kikí̱xtija, kitaꞌ iga ima̱ꞌ ye̱ktítoꞌya sej.
Iwá̱n Dios kijlij:
—Kua̱ꞌ titajto̱j wa̱n moge̱ntej, xikne̱xtili iní̱n yej nimitzne̱xtilij. Iwá̱n siga ayá̱ꞌ mitzcre̱dowaj malej iga kitaskej ini̱mej yej nimitzne̱xtilij, xikui a̱ꞌti ipan we̱ya̱ꞌ iwá̱n xiktoya̱wa ta̱lpan, iwá̱n mochi̱was esti.
Eꞌ Moisés kijlij sej Dios:
—Atikmatij siga wel nitajto̱j. Nej poxsan nimote̱te̱mpolowa.
Iwá̱n Dios kijlij:
—¿A̱ꞌyéj kimáꞌ ite̱n ta̱gaꞌ? ¿Ix ayéj nej nikmáꞌ? Inó̱n iga nimitzijliá iga xaj, iwá̱n tia tikijto̱ti yej nej nimitzijli̱j.
Moisés kijtoj:
—¿Ix awel tikte̱mo̱j seꞌ yej wel tikti̱tanis?
Dios kikuesowilij Moisés iwá̱n kijlij:
—Mokni̱n Aarón tajto̱lmati. Yéj nemi wi̱ꞌ nijígapa iná̱n. Yéj mochi̱was ken mote̱n iwá̱n Aarón kijto̱j yej tikijli̱j. Xikui̱ga mobasto̱n iga tia tikchi̱wati inó̱n yej nimitzne̱xtilij.
Iwá̱n Moisés yajki cha̱n imontaj, majabia̱roj iwá̱n ki̱skej ompa wa̱n isiwa̱ꞌ iwá̱n ipilowa̱n wa̱n inochi yej kipiaya. Némiya ya̱ya Egipto kiki̱tzkijtia̱ya ibasto̱n, iwá̱n ipan ojti mi̱xna̱n iwá̱n Aarón yej iyikni̱n.
Dios áchtoya ijkí̱n kijlij Aarón:
—Xaj ipan desierto xitajto̱ti iwá̱n Moisés ka̱n onoꞌ tepe̱ꞌ yej ito̱ka̱ꞌ Horeb.
Inó̱n iga masikej ipan ojti, iwá̱n Moisés kipowilij inewi ken iga Dios kijlij. Iwá̱n senyájkija Egipto.
Kua̱ꞌ asikej Gosén, ipan país de Egipto, kinechkojkej inewi we̱wetkej yej de igé̱ntejpa Moisés. Iwá̱n Aarón kijtoj inewi kensan Dios kijlij Moisés, iwá̱n no̱ kine̱xtij inó̱n yej Dios kine̱xtilij Moisés. Ino̱mej israeli̱tajmej kicre̱dojkej yej Moisés iwá̱n Aarón kijtojkej iwá̱n pa̱kikej kua̱ꞌ kimatikej iga Dios kimatiaya inewi iga kikno̱chijtokej iwá̱n iga Dios yawi kima̱nawi̱tij.