Dios ko̱mema̱wiá Moisés kua̱ꞌ xó̱lo̱oꞌ
Éxodo 1:6‑16, 22; 2:2‑23
28
Dios kipatilij ito̱ka̱ꞌ Jacob iga Israel, inó̱n iga ipilowa̱n kijliáj israeli̱tajmej.Israeli̱tajmej poxsan pi̱wikej Egipto. Iwá̱n panoj miaꞌ xiwiꞌ, miguiꞌ José iwá̱n nochi ino̱mej yej onoyaj inó̱n tiempo. Despué̱j pe̱waꞌ iga manda̱rowa seꞌ rey yej no̱ kijlia̱yaj faraón, iwá̱n inó̱n akimatiꞌ siga José panoj iga gobernador. Iwá̱n inó̱n nuevo faraón kijlij ige̱ntej:
—Israeli̱tajmej má̱j tajpalejkej iwá̱n má̱j miakejmej que tejeme̱n; matikchi̱waka̱n tejté̱ iga ayꞌya má̱j mapi̱wika̱n.
Inó̱n iga egi̱pciojmej kikuikej israeli̱tajmej iga iyescla̱vojmej. Poxsan kitekipano̱ltia̱yaj iwá̱n kipoxmagayaj, ayá̱ꞌ kikne̱lia̱yaj. Ino̱mej israeli̱tajmej kichi̱waltijkej o̱me wejweyi a̱ltepe̱ꞌ iwá̱n kichi̱wilijkej imu̱rojyo. Nochipa kichi̱wayaj ladrillo iga sokiꞌ iwá̱n po̱lo̱ꞌ. Se̱ día faraón kitekimáꞌ ige̱ntej, kijlij:
—Nochi choochichi̱n israelita yej nace̱rowaj, xikaki̱ka̱n a̱tampa iga maa̱mikika̱n.
Ayá̱ꞌ wejkatiꞌ, onoko se̱ chooli̱ntzi̱n israelita este poxye̱ꞌne̱siꞌ, iwá̱n iye̱ꞌ ki̱ya̱ntoya e̱yi me̱j. Eꞌ awel ma̱joꞌ ki̱ya̱n. Iwá̱n inó̱n siwa̱ꞌ kichij se̱ chikiwiꞌ iwá̱n kitzajtzakuaꞌ iga sása̱l iga amo maa̱kalaki. Ipan inó̱n chikiwiꞌ kakij xo̱lo̱ꞌ iwá̱n kajki̱lti̱to a‑ijtiꞌ. Iwá̱n isiwa‑ikni̱n inó̱n xo̱lo̱ꞌ ompa ka̱wiꞌ iga makita a̱ꞌ kasis.
Iwá̱n despué̱j isiwa̱piltzi̱n faraón yajki ma̱lti̱to a‑ijtiꞌ. Kua̱ꞌ kitaꞌ se̱ chikiwiꞌ a̱ajkitoꞌ ipan a̱ꞌti, kiti̱tan se̱ iyescla̱vaj iga makikui̱li̱ti. Kua̱ꞌ kite̱ntapoj inó̱n chikiwiꞌ, kitaꞌ iga xo̱lo̱ꞌ cho̱katoꞌ. Iwá̱n kikne̱lij, iwá̱n kijtoj:
—Ini̱nwaꞌ xo̱lo̱ꞌ israelita.
Iwá̱n isiwa‑ikni̱n inó̱n xo̱lo̱ꞌ kitecho̱to isiwa̱piltzi̱n faraón iwá̱n kijlij:
—¿Ix tikneki iga manimitzte̱mowili se̱ siwa̱ꞌ iga makichi̱chiti iní̱n xo̱lo̱ꞌ?
Isiwa̱piltzi̱n faraón kijtoj:
—Kena. Xine̱te̱mowili se̱ siwa̱ꞌ.
Iwá̱n inó̱n takotzi̱n yajki kikui̱li̱to yej íye̱ꞌpa nokta inó̱n xo̱lo̱ꞌ.
Isiwa̱piltzi̱n faraón kijlij yej íye̱ꞌpa xo̱lo̱ꞌ:
—Xikui̱ga iní̱n xo̱lo̱ꞌ iwá̱n xine‑iskaltili, iwá̱n nia nimitzmakati tomi̱n iga tine‑iskaltili̱j.
Iwá̱n inó̱n siwa̱ꞌ yej iye̱ꞌ xo̱lo̱ꞌ, kiwi̱gaꞌ iwá̱n kiskaltij. Kua̱ꞌ chooli̱n acha̱ yo̱lejtzi̱n, kiwi̱gákeja cha̱n faraón. Isiwa̱piltzi̱n faraón kito̱ka̱wij Moisés inó̱n chooli̱n. Ijkó̱n iga moskaltij Moisés cha̱n faraón iwá̱n ompa kine̱xtilijkej nochi yej yejemej kimatij.
Se̱ día Moisés kitaꞌ iga kimagatoyaj se̱ yej de yejéme̱mpasan, tamagatoya se̱ egipcio. Moisés kimiktij inó̱n egipcio iwá̱n kito̱gaꞌ ipan xa̱jli, yéj kijtoj anka ayagaj kitaꞌ iga kimiktij inó̱n egipcio.
Ipan seꞌ día Moisés ki̱saꞌ iwá̱n kitaꞌ o̱me yej de yejéme̱mpasan, nemi momagaj. Iwá̱n kijlij yej momagatoyaj:
—¿Te iga anmomagaj, esi de amejéme̱mpasan?
Yej takuejkuesoj kijtoj:
—Tej ayagaj mitzta̱lij iga xine̱manda̱ro̱ka̱n. ¿Tia tine̱mikti̱ti ken ya̱lwa tikmiktij se̱ egipcio?
Moisés majmawiꞌ iwá̱n kijtoj: “Mataj momátiya yej nikchij.”
Kua̱ꞌ faraón kimatiꞌ yej kichij Moisés, kinekiá makimikti. Inó̱n iga Moisés choloj iwá̱n yajki mocha̱nti̱to ipan ita̱lmej madiani̱tajmej. Iwá̱n ompiga mona̱miktij iwá̱n tekipánoja iwá̱n imontaj yej ito̱ka̱ꞌ Jetro. Kicuida̱rowilijtinemiá iborre̱gojmej. Moisés cha̱ntitoya ompa cuarenta año iwá̱n kipiáꞌ o̱me ipilowa̱n. Mie̱j Moisés onoya ipan íta̱l Madián, faraón de Egipto miguiꞌ.