José ayá̱ꞌ kichi̱wa yej aye̱kti iga kimajmawiliá Dios
Génesis 39
21
Kua̱ꞌ José kiwi̱gakej Egipto, se̱ egipcio yej ito̱ka̱ꞌ Potifar kikowilij tanamakanimej. Potifar capitán katka de isolda̱dojmej faraón rey de Egipto. Dios kipale̱wia̱ya José, iwá̱n ye̱ꞌonoya mie̱j iga cha̱ntitoya cha̱n Potifar. Potifar kimatiꞌ iga Dios kipale̱wia̱ya José, inó̱n iga inochi yej kichi̱waya, ye̱ꞌki̱saya. Inó̱n iga kita̱lij iga makimanda̱ro íkal iwá̱n iga makicuida̱ro, iwá̱n kika̱wilij ipan ica̱rgoj inewi yej kipiaya. Desde inó̱n día, Dios kipale̱wij poxsan Potifar iga ompa onoya José.José ye̱ꞌchokotzi̱n katka iga ye̱ꞌtachaya. Iwá̱n isiwa̱ꞌ Potifar ke̱le̱wij José. Siwa̱ꞌ tae̱le̱wij. Iwá̱n se̱ día siwa̱ꞌ kijlij:
—Ximote̱ka nowa̱n.
Iwá̱n José kijlij:
—Ayá̱ꞌ. Awel inó̱n nikchi̱wa. Taꞌ xine̱kaki, nopatró̱n neencarga̱roj inochi yej kipiá, iwá̱n como nej nigaj nonoꞌ, yéj ayꞌya kejla̱ntinemi nité̱ yej onoꞌ icha̱n. Ipan iní̱n kajli ayagaj má̱j manda̱rowa que nej; nopatró̱n nité̱ ayá̱ꞌ nemi ne̱nega̱rowiliá má̱j que tejsan mose̱lti, iga tej isiwa̱ꞌ; inó̱n iga ¿kén nia nikchi̱wati tejté̱ yej aye̱kti iyi̱xtaj Dios?
Malej iga siwa̱ꞌ nochipa kitejteki‑ijlia̱ya José iga mamote̱ka íwa̱n, José ayá̱ꞌ kitajto̱lkui̱lia̱ya. Se̱ día José kalaꞌ ikalijtiꞌ Potifar iga kichi̱wa itekipáno̱l, iwá̱n como ayagaj onoya ompa, siwa̱ꞌ kiki̱tzkilij itzótzol José iwá̱n kijlij:
—Ximote̱ka nowa̱n.
Eꞌ José motalojtiki̱saꞌ, iwá̱n itzótzol kiki̱tzkijtika̱wiꞌ siwa̱ꞌ iga kitila̱nilij. Kua̱ꞌ kitaꞌ iga ki̱saꞌ José wa̱n kiki̱tzkijtika̱wiꞌ itzótzol, kino̱tzaꞌ imo̱nsojmej. Kua̱ꞌ asikej, kijlij:
—Taꞌ xikitaka̱n, nowé̱j kiwajli̱ꞌ se̱ israelita yej iná̱n moburla̱rowa iga nejeme̱n. Kinekiá mane̱ki̱tzki, eꞌ nej niwajwa̱ꞌtzajtziꞌ. Kua̱ꞌ ne̱kaguiꞌ iga niwajwa̱ꞌtzajtziꞌ iga inochi notájpal, motalojtiki̱saꞌ iwá̱n este itzótzol kikajtej nigaj.
Iwá̱n inó̱n siwa̱ꞌ ke̱naꞌ itzótzol José este que iwé̱j asiꞌ icha̱n. Potifar poxsan kuejkuesiwiꞌ kua̱ꞌ kikaguiꞌ yej kipowilij isiwa̱ꞌ. Iwá̱n kitati̱tanilij José iwá̱n kakij ipan cárcel. Malej iga José onoya ipan cárcel, eꞌ Dios kichij iga makiye̱ꞌita yej manda̱rowa ipan cárcel iwá̱n kika̱wilij ipan ica̱rgoj José inochi pre̱sojmej. Iwá̱n yéj tatekimakaya ipan inochi yej ompa mochi̱waya.