Jacob siwa̱yowi
Génesis 29:1–31:3, 17‑33, 55
18
Jacob kikuiꞌ sej Hara̱n‑ojti. Ite̱noj Harán, kitaꞌ se̱ pozo, iwá̱n na̱ꞌsan iga ompa mosejtoyaj komati borre̱gojmej iwá̱n yej kicuida̱rowa̱yaj. Ino̱mej kiki̱xtia̱yaj a̱ꞌti ipan pozo iga ka̱makayaj borre̱gojmej. Jacob kitajtan ino̱mej:—¿Ix anki̱xmatij Labán, yej inie̱toj Nacor?
—Kena, niki̱xmatij —kijtojkej yejeme̱n.
—¿Ix ye̱ktitoꞌ? —ta‑ojpatajtan Jacob.
—Kena, Labán ye̱ktitoꞌ —kijtojkej—. Taꞌ xikita, nepa wi̱ꞌ isiwa̱piltzi̱n yej ito̱ka̱ꞌ Raquel iwá̱n borre̱gojmej.
Mie̱j yéj ta̱tapojtóyaoꞌ iwá̱n yejeme̱n, Raquel asiꞌ iwá̱n iborre̱gojmej itaj.
Kua̱ꞌ Jacob kitaꞌ iga asiꞌ iwá̱n borre̱gojmej, imaní̱n kite̱ntapoj pozo iga kiki̱xtij a̱ꞌti iwá̱n ka̱máꞌ borre̱gojmej, iwá̱n kijlij:
—Nej ipiltzi̱n Rebeca yej motaj isiwa‑ikni̱n.
Iwá̱n Raquel motalojtiajki kipowili̱to itaj.
Kua̱ꞌ Labán kikaguiꞌ iga asiꞌ Jacob yej ipíltzi̱mpa isiwa‑ikni̱n, motalojtiki̱saꞌ iga ki̱xna̱mikito iwá̱n kiwi̱gaꞌ icha̱n.
Labán kipiaya o̱me isiwa̱pilowa̱n; Lea yej ma̱jya katka te̱pij, iwá̱n Raquel yej má̱j te̱tzo̱yo̱ꞌ. Lea pox mo̱nsaj katka iyi̱x; iwá̱n Raquel poxsan katka mo̱nsajtiꞌ. Iwá̱n kua̱ꞌ Jacob onoyay icha̱n Labán se̱ mes, kijlij Labán:
—Nia nitekipano̱ti siete años siga tine̱maka Raquel.
Labán kijtoj:
—Nikye̱ꞌita iga manimitzmaka Raquel, eꞌ xiká̱wiyawaꞌ nowa̱n.
Ijkó̱n tekipanojtoya Jacob siete años iga Raquel. Iga Jacob inó̱n tiempo panoj imani̱nsan iga kipoxnekiá Raquel.
Kua̱ꞌ pánoja siete años, Jacob kijlij Labán:
—Xine̱mákaya mosiwa̱piltzi̱n iga manimona̱mikti iwá̱n yéj, iga támiꞌya el tiempo yej nikijtoj iga nia nitekipano̱ti iga Raquel.
Eꞌ Labán kikajkayaj iwá̱n kimaꞌwaꞌ Lea, takotzi̱n yej ma̱jya te̱pij.
Iwá̱n Jacob kuesiwiꞌ iwá̱n ijkí̱n kijlij Labán:
—¿Te iga inó̱n tine̱chi̱wilij? ¿Aya̱ꞌtaj nitekipanoj iwá̱n tej iga xine̱maka Raquel? Iwá̱n, ¿te iga tine̱kajkayaj?
Iwá̱n Labán kijtoj:
—Nigaj ayá̱ꞌ nikacostumbra̱rowaj iga takotzi̱n yej te̱tzo̱yo̱ꞌ mamona̱mikti achto que yej te̱pij. Xilwichi̱wa se̱ semana iga Lea iwá̱n nia no̱ nimitzmakati Raquel, siga timote̱maka iga titekipanowa nowa̱n seꞌ siete años.
Ijkó̱n Jacob tekipanoj catorce años iga iyo̱mexti isiwa̱ꞌ, iwá̱n tekipánojoꞌ seꞌ seis años iwá̱n Labán iga kita̱nij iyo̱lka̱mej.
Mie̱j Jacob tekipanoj catorce años Harán, isiwa̱tkej kitakej once ipilowa̱n. Iní̱n ito̱ka̱mej ipilowa̱n; Rubén, Simeón, Leví, Judá, Dan, Neftalí, Gad, Aser, Isacar, Zabulón iwá̱n José. Kua̱ꞌ Jacob cha̱ntitoya Harán, iyo̱lka̱mej mochij má̱j komati que yej de Labán. Inó̱n iga Labán iwá̱n ipilowa̱n kijiyayaj Jacob.
Se̱ día Dios kijlij Jacob:
—Xaj ipan móta̱l inó̱n lugar ka̱n cha̱ntitoꞌ motaj iwá̱n nia̱ti mowa̱n.
Jacob kipowilij iyo̱mexti isiwa̱ꞌ yej Dios kijlij, eꞌ até̱ kijlij imontaj. Mie̱j iga Labán yajki seꞌ lado kitejtekili̱to itzojmiyomej iborre̱gojmej, Jacob malista̱roj iga yawi sej Canaán, ka̱n cha̱ntitoya itaj yej ito̱ka̱ꞌ Isaac. Raquel kichtekté̱ꞌ i̱dolojmej, ino̱mej dio̱smej yej itachí̱walpa ta̱gaꞌ yej kipiaya itaj, iwá̱n kiwi̱gaꞌ no̱. Iwá̱n ijkó̱n iga ki̱skej icha̱n Labán.
Kua̱ꞌ pánoja e̱yi día, Labán kimatiꞌ iga Jacob iwá̱n isiwa̱tkej, ipilowa̱n iwá̱n inewi yej kipiaya cholójkeja, iwá̱n no̱ kichtektejkej i̱dolojmej. Entonces kinechkoj iyikni̱wa̱n iwá̱n ki̱saꞌ iga kojtokakej, iwá̱n este ipan siete día kitechojkej ipan tepe̱mej yej onokej Galaad. Iwá̱n kitawe̱lijlij ijkí̱n:
—¿Te iga an‑ichtakaki̱skej? ¿Te iga tikichtekté̱ꞌ no‑i̱dolojmej?
Iwá̱n Jacob kicontesta̱roj Labán:
—Iga nimajmawiꞌ. Nej nikijtoj iga wel tine̱kui̱liá mosiwa̱pilowa̱n. Ayá̱ꞌ nikui̱ga nité̱ yej tej motatki. Eꞌ siga agaj yej nigaj onoꞌ kipiá mo‑i̱dolojmej, mamiki.
Jacob ayá̱ꞌ kimatiá siga Raquel kichteꞌ in i̱dolojmej.
Labán kalaꞌ ipan ikuetaxkajli Jacob, eꞌ ayá̱ꞌ kasiꞌ in i̱dolojmej, iga Raquel ki̱ya̱n itampa xi̱laj, iwá̱n iyakapan mota̱lij. Labán kite̱mojtinemiá no̱ya̱n ipan kuetaxkajli, eꞌ ayá̱ꞌ kasiꞌ.
Ipan seꞌya día yowáltiꞌsan, Labán moketzaꞌ iwá̱n kipipitzoj inie̱tojwa̱n, iwá̱n isiwa̱pilowa̱n; después kite̱ne̱wij Dios iga yejeme̱n maye̱ꞌonoka̱n iwá̱n mokuepaꞌ sej ipan íta̱l ka̱nsan iga wa̱laj.